27:1 | Bila sudah siang hari, smoa kpala-kpala imam sama ktua-ktua bangsa itu berbichara mlawan Isa mau bunoh dia: |
27:2 | dan bila dia-orang sudah ikatkan dia, dia-orang bawa dia pergi, dan srahkan sama gobernor Pilatus. |
27:3 | Kmdian deri-pada itu, Yudas, yang srahkan dia, bila dia tengok yang Isa punya hukuman sudah tntu, dia mnysal, dan bawa balek itu tiga-puloh kping punya wang perak sama kpala-kpala imam dan ktua-ktua, |
27:4 | dan kata, "Sahya sudah berdosa, sbab sahya sudah srahkan darah orang yang t'ada salah." Ttapi dia-orang kata, "Kita apa pduli? itu angkau punya fasal." |
27:5 | Dan Yudas champakkan wang perak itu dalam ka'abah, dan kluar; kmdian dia pergi gantong diri-nya. |
27:6 | Dan kpala-kpala imam ambil itu wang perak, dan kata, "T'ada halal masokkan ini wang sama wang persmbahan, sbab ini wang herga darah orang." |
27:7 | Dan dia-orang bichara, dan dngan itu wang bli tanah tukang priok, spaya jadi tmpat kubor orang dagang. |
27:8 | Itu sbab-lah itu tanah di-sbot "tanah darah" sampai ini hari. |
27:9 | Itu ktika sudah-lah di-bnarkan itu perkata'an yang nabi Armia kata, ia'itu, "Dan dia-orang sudah ambil itu tiga-puloh kping punya wang perak, herga orang yang di-hergakan itu, sperti yang anak-anak Isra'el sudah hergakan; |
27:10 | dan dia-orang kasi itu wang mau bli itu tanah tukang priok, sperti Tuhan sudah tntukan kerna sahya." |
27:11 | Dan Isa berdiri di dpan gobernor: dan gobernor tanya dia, "Angkau raja orang Yahudi-kah?" Isa kata sama dia, "Sperti angkau bilang." |
27:12 | Dan bila kpala-kpala imam sama ktua-ktua d'awa dia, satu pun dia t'ada jawab. |
27:13 | Itu ktika Pilatus kata sama Isa, "T'ada-kah angkau dngar brapa banyak perkara dia-orang saksikan atas angkau?" |
27:14 | Ttapi Isa t'ada jawab sama dia satu patah pun: sampaikan itu gobernor naik hairan skali. |
27:15 | Ktika hari-bsar gobernor sudah biasa lpaskan kerna orang-banyak satu orang jel, barang-siapa yang dia-orang suka. |
27:16 | Itu waktu ada satu orang jel yang mashhur, nama-nya Bar-Abbas. |
27:17 | Sbab itu bila smoa-nya sudah berhimpon, Pilatus kata sama dia-orang, "Siapa-kah kamu suka sahya lpaskan kerna kamu? Bar-Abbas-kah, atau Isa yang di-sbot Almaseh?" |
27:18 | Kerna dia tahu yang sbab dngki dia-orang sudah srahkan Isa. |
27:19 | Dan waktu Pilatus dudok di atas krusi bichara, dia punya bini suroh orang pergi kata sama dia, "Jangan-lah skali-kali masok tangan dalam itu orang bnar punya fasal: kerna ini hari sahya sudah kna banyak seksa dalam mnimpi sbab dia." |
27:20 | Kpala-kpala imam sama ktua-ktua usutkan orang-banyak itu, spaya dia-orang boleh minta Bar-Abbas dan binasakan Isa. |
27:21 | Itu gobernor jawab kata sama dia-orang, "Dalam ini dua orang, mana satu kamu suka sahya lpaskan kerna kamu?" Dia-orang kata, "Bar-Abbas." |
27:22 | Pilatus kata sama dia-orang, "Kalau bgitu, apa-kah sahya msti buat sama Isa yang di-sbot Almaseh?" Dia-orang smoa kata, "Biar dia kna salib." |
27:23 | Dia kata, Apa kjahatan pula dia sudah buat?" Ttapi dia-orang bertriak-triak bukan sikit lagi, kata, "Biar dia kna salib." |
27:24 | Jadi bila Pilatus tengok yang t'ada guna lagi dia punya perkata'an, balek ada jadi satu gadoh, dia ambil ayer, chuchi tangan di dpan orang-banyak, dan kata, "Sahya Ipas deri-pada ini orang bnar punya darah itu pulang sama kamu." |
27:25 | Dan smoa orang bangsa itu jawab kata, "Darah-nya atas kita, dan atas anak-anak kita pun." |
27:26 | Habis itu, Pilatus lpaskan Bar-Abbas sama dia-orang: ttapi Isa dia ssahkan, dan srahkan spaya kna salib. |
27:27 | Kmdian deri-pada itu, gobernor punya soldado bawa Isa masok istana, dan himponkan s-gnap pasokan kliling dia. |
27:28 | Dia orang bukakan pakaian Isa, dan kasi dia pakai baju werna ungu. |
27:29 | Dan bila dia-orang sudah anyamkan satu makota deri-pada duri, dia-orang tarohkan atas kpala-nya, dan satu bambu di tangan kanan-nya; dan dia-orang berlutut dpan dia, dan tertawakan dia, kata, "Tabek, Raja orang Yahudi." |
27:30 | Dan dia-orang ludahkan dia, dan ambil itu bambu pukol kpala-nya. |
27:31 | Dan bila dia-orang sudah tertawakan dia, dia-orang bukakan itu baju ungu, dan pakaikan pakaian-nya sndiri, dan bawa dia pergi mau salibkan dia. |
27:32 | Bila dia-orang kluar dia-orang jumpa satu orang Kurini, bernama Simon: dan dia-lah dia-orang paksa suroh pikul Isa punya kayu salib. |
27:33 | Dan bila dia-orang sampai satu tmpat yang bernama Golgota, arti-nya tmpat tngkorak, |
27:34 | dia-orang kasi Isa minum ayer-anggor champur hmpdu: dan bila dia sudah kchap, dia ta'mau minum. |
27:35 | Bila dia-orang sudah salibkan dia, dia-orang bhagikan pakaian-nya dngan buang undi: |
27:36 | dan dia-orang dudok jaga sama dia di sana. |
27:37 | Dan di sblah atas kpala-nya dia-orang knakan surat d'awa'an-nya, "INI-LAH ISA RAJA ORANG YAHUDI." |
27:38 | Itu ktika ada dua orang pnyamon yang kna salib sama-sama Isa, satu sblah kanan, satu sblah kiri. |
27:39 | Dan orang-orang yang lalu di situ umpatkan dia, dan gonchang-gonchang kpala, |
27:40 | kata, "Hei angkau yang rubohkan ka'abah, dan naikkan dalam tiga hari, slamatkan angkau punya diri: jikalau btul angkau Anak Allah, turun-lah deri itu salib." |
27:41 | Bgini juga kpala-kpala imam sama orang pnulis dan ktua-ktua tertawakan dia, dan kata, |
27:42 | "Lain orang dia sudah slamatkan; ttapi diri-nya sndiri dia ta'rupa slamatkan! Dia Raja orang Isra'el; biar dia skarang turun deri salib, dan kita nanti perchaya sama dia. |
27:43 | Dia sudah taroh harap sama Allah; jikalau Tuhan suka sama dia, biar Tuhan slamatkan dia skarang: kerna dia sudah kata, 'Sahya Anak Allah.'" |
27:44 | Dan itu dua pnyamon pun yang kna salib sama-sama dia maki dia bgitu juga. |
27:45 | Dan deri-pada pukol dua-blas tngah hari mnjadi glap sluroh tanah itu, sampai pukol tiga ptang. |
27:46 | Dan ada pukol tiga ptang bgitu Isa bertriak dngan suara yang bsar, dan kata, "Ili, Ili, lama sabaktani," arti-nya, "Tuhan-ku, Tuhan-ku, knapa tinggalkan sahya?" |
27:47 | Bila s-tngah orang yang berdiri di sana dngar itu, dia-orang kata, "Dia ini ada triak Ilia." |
27:48 | Dan itu juga satu orang deri-pada itu orang ambil lumut-karang, dan isikan chuka dan taroh di hujong bambu kasi dia minum. |
27:49 | Ttapi lain orang pula kata, "Diamkan: biar kita tengok kalau Ilia nanti datang slamatkan dia." |
27:50 | Dan Isa bertriak lagi skali dngan suara yang bsar, dan srahkan roh-nya. |
27:51 | Dan tengok, ka'abah punya tirai blah dua, deri atas sampai bawah; dan bumi pun gmpa; dan batu-batu gunong pun terblah; |
27:52 | dan kubor-kubor pun terbuka; dan banyak mayat orang suchi yang sudah tidor pun berbangkit pula; |
27:53 | dia-orang kluar deri kubor, kmdian deri-pada kbangkitan Isa, dan masok negri suchi, dan ternampak sama banyak orang. |
27:54 | Itu hulubalang, dan orang-orang yang jaga perkara-perkara yang sudah jadi, naik takot skali, dan kata, "Btul-lah dia ini Anak Allah." |
27:55 | Dan di sana ada banyak prempuan-prempuan yang pandang deri jauh, yang dhulu sudah ikut Isa deri Galil dan layankan dia: |
27:56 | antara dia-orang ada Mariam orang Magdala, sama Mariam mak Yakob dan Yosis, sama anak-anak Zabdi punya mak. |
27:57 | Bila sudah ptang, ada satu orang kaya datang, bernama Yusof deri Arimatiah, dan dia pun satu anak-murid Isa: |
27:58 | ini orang pergi sama Pilatus minta Isa punya mayat. Kmdian Pilatus suroh kasikan. |
27:59 | Dan Yusof ambil itu mayat, gulongkan itu dngan kain khasah halus yang berseh, |
27:60 | dan taroh dalam kubor-nya sndiri yang bharu, yang dia sudah pahatkan dalam batu gunong: dan bila dia sudah golekkan satu batu yang bsar di pintu kubor itu, dia jalan pergi. |
27:61 | Dan di situ ada Mariam orang Magdala, sama Mariam yang lain, dudok di dpan itu kubor. |
27:62 | Besok-nya, ia'itu hari yang kmdian deri-pada hari-sdiakan, kpala-kpala imam sama orang Farisi mnghadap Pilatus, |
27:63 | kata, "Tuan, kita ingat itu orang pnipu sudah kata waktu dia lagi hidop, 'Kmdian deri-pada tiga hari sahya nanti bangkit.' |
27:64 | Sbab itu baik tuan suroh orang tgohkan itu kubor sampai hari yang ktiga, spaya jangan pula murid-murid-nya datang churi sama dia, dan kata sama ini bangsa, 'Dia sudah bangkit deri antara orang mati,' dan tipu-daya yang kmdian punya nanti jadi lbeh jahat deri-pada yang mula-mula punya." |
27:65 | Pilatus kata sama dia-orang, "Kamu ada orang jaga: pergi-lah dan tgohkan itu kubor s-brapa boleh." |
27:66 | Jadi itu, dia-orang pergi tgohkan itu kubor, dngan silkan itu batu, dan orang jaga pun ada sama-sama dia-orang. |