15:1 | Habis itu ada orang Farisi sama orang pnulis datang sama Isa deri Yerusalim, kata, |
15:2 | "Knapa guru punya murid-murid langgar ktua-ktua punya pngajaran? kerna dia-orang t'ada chuchi tangan bila mau makan." |
15:3 | Dia jawab kata sama dia-orang, "Knapa kamu pula langgar hukum Allah dngan kamu punya pngajaran? |
15:4 | Kerna Allah sudah kata, 'Hormatkan-lah angkau punya mak-bapa:' dan lagi 'Siapa-siapa chakap jahat deri-hal bapa atau mak-nya, patut-lah kna hukum mati.' |
15:5 | Ttapi kamu pula kata, 'Siapa-siapa yang kata sama bapa atau sama mak, "Apa deri-pada sahya yang boleh kasi untong sama mak dan sama bapa, sudah jadi persmbahan k-pada Allah," |
15:6 | ta'usah dia hormatkan mak-bapa-nya lagi.' Jadi kamu sudah hilangkan kuasa perkata'an Allah sbab pngajaran kamu. |
15:7 | Hei orang pura-pura, patut skali nabi Yash'aya sudah bernabuat fasal kamu, |
15:8 | 'Ini bangsa hormatkan sahya sama mulut-nya. Ttapi hati-nya ada jauh deri-pada sahya. |
15:9 | Jadi perchuma saja dia-orang smbah sama sahya, Sdang dia-orang ajar manusia punya psanan mnjadi pngajaran-nya.'" |
15:10 | Dan Isa panggil orang-banyak, dan kata sama dia-orang, "Dngar-lah dan mngerti. |
15:11 | Bukan-nya apa yang masok dalam mulut yang najiskan orang; ttapi apa yang kluar deri dalam mulut ini-lah yang najiskan orang." |
15:12 | Kmdian murid-murid datang kata sama dia, "Ada-kah Tuhan tahu yang orang Farisi itu sudah terantok bila dia-orang dngar ini chakap?" |
15:13 | Ttapi Isa jawab kata, "Tiap-tiap tanaman yang sahya punya Bapa yang di shorga t'ada tanamkan, nanti kna chabot. |
15:14 | Diamkan dia-orang: itu smoa pmimpin yang buta. Dan kalau orang buta pimpin orang buta, dua-dua nanti jatoh dalam lobang." |
15:15 | Petrus jawab kata sama Isa, "Trangkan-lah sama kita ini perumpama'an." |
15:16 | Dan dia kata, "Sampai skarang-kah kamu ini pun kurang mngerti? |
15:17 | T'ada-kah kamu mngerti yang apa-apa yang masok dalam mulut lalu di prot, dan kna buang di jamban? |
15:18 | Ttapi apa-apa yang kluar deri dalam mulut itu kluar deri dalam hati, dan itu-lah yang najiskan orang. |
15:19 | Kerna deri dalam hati-lah kluar fikiran jahat, bunoh, zina, persundalan, churi, saksi bohong, umpat: |
15:20 | ini smoa-lah yang najiskan orang; ttapi makan dngan t'ada chuchi tangan, itu t'ada najiskan orang." |
15:21 | Isa kluar deri situ, dan undor masok jajahan Tur dan Sidon. |
15:22 | Ada satu prempuan Kana'an deri itu jajahan, yang kluar bertriak, kata, "Ya Tuhan, ya Anak Da'ud, ksiankan-lah sama sahya; anak prempuan sahya ada terkna jin terlalu kras." |
15:23 | Ttapi s-patah kata pun Isa t'ada jawab sama dia. Dan dia punya murid-murid datang minta sama dia, dan kata, "Suroh-lah ini prempuan pergi; kerna dia ada bertriak-triak di blakang kita." |
15:24 | Ttapi Isa jawab kata, "Bukan-nya sahya sudah di-hantarkan k-pada orang yang lain, chuma k-pada kambing-kambing yang sudah hilang deri antara isi rumah Isra'el saja." |
15:25 | Ttapi itu prempuan datang berlutut dpan dia, dan kata, "Ya Tuhan, tolong-lah sama sahya." |
15:26 | Ttapi Isa jawab, kata, "T'ada baik ambil anak-anak punya roti champakkan k-pada anjing." |
15:27 | Dan itu prempuan kata, "Btul, Tuan; kerna anjing pun dapat makan sisa-sisa yang jatoh deri tuan-nya punya meja." |
15:28 | Kmdian Isa jawab, kata sama dia, "Hei nyonya, bsar-lah angkau punya perchaya; jadi-lah pada angkau sperti angkau punya mau." Dan dia punya anak prempuan itu jam juga sudah baik. |
15:29 | Isa berjalan deri situ, dan sampai dkat tasek Galil; dan dia naik gunong dudok di sana. |
15:30 | Dan banyak skali orang datang sama dia, bawa orang tempang, orang buta, orang bisu, orang kodong, dan banyak lain-lain lagi, dan smoa ini dia-orang ltakkan di kaki Isa; dan dia smbohkan smoa-nya; |
15:31 | sampaikan sgala orang-banyak jadi hairan tengokkan orang bisu berchakap, orang kodong jadi baik, orang tempang berjalan, dan orang buta mlihat; jadi dia-orang muliakan orang Isra'el punya Allah. |
15:32 | Isa panggil murid-murid-nya, dan kata, "Sahya rasa ksian sama ini orang banyak, sbab sudah tiga hari dia-orang sama-sama sahya, dan dia-orang t'ada apa-apa mau makan; sahya ta'mau lpaskan dia-orang dngan lapar, kerna barangkali dia-orang nanti pengsan di tngah jalan." |
15:33 | Ttapi murid-murid kata sama dia, "Deri mana kita ini boleh dapat bgitu banyak punya roti dalam tmpat sunyi, spaya knnyangkan ini macham banyak punya orang?" |
15:34 | Dan Isa kata sama dia-orang, "Brapa biji roti kamu ada?" Dia-orang kata, "Ada tujoh biji, sama sikit ikan kchil-kchil." |
15:35 | Isa suroh orang-banyak dudok di tanah; |
15:36 | dan dia ambil itu tujoh biji roti sama ikan, dan bila sudah mnguchap shukor, dia pchahkan, dan bhagikan sama murid-murid, dan murid-murid pula sama orang-banyak. |
15:37 | Smoa-nya makan, sampai knnyang; dan orang pungut sisa-sisa, ada tujoh kranjang punya pnoh. |
15:38 | Orang yang makan, banyak-nya orang dlaki saja ampat-ribu orang, lain deri-pada prempuan sama budak-budak |
15:39 | Kmdian Isa lpaskan orang-banyak, dan naik prahu pergi jajahan Magadan. |