13:1 | Itu hari Isa kluar deri rumah, dan dudok di tpi tasek. |
13:2 | Dan banyak skali orang berhimpon datang sama dia, sampaikan dia naik prahu dan dudok: dan sgala orang-banyak berdiri di tpi pantai. |
13:3 | Dan Isa berchakap sama dia-orang banyak perkara dngan perumpama'an dan kata, "Ada orang pnabur itu kluar mau mnabur: |
13:4 | dan dalam dia mnabur sparoh bneh jatoh di tpi jalan, dan burong-burong datang makan sampai habis: |
13:5 | dan sparoh jatoh di tmpat-tmpat yang berbatu, di situ t'ada banyak tanah: dan itu juga itu bneh bertumboh, sbab tanah-nya t'ada dalam; |
13:6 | dan bila kluar matahari, dia jadi kring, dan sbab t'ada akar dia layu. |
13:7 | Dan sparoh jatoh di tngah pokok duri; dan pokok itu bertumboh, dan lmaskan itu bneh: |
13:8 | dan sparoh jatoh di tanah yang baik, dan kluarkan buah berganda-ganda, ada yang s-ratus, ada yang anam-puloh, ada yang tiga-puloh ganda. |
13:9 | Siapa ada kuping, biar-lah dia dngar." |
13:10 | Dan murid-murid datang kata sama dia"Knapa guru chakap sama dia-orang dngan perumpama'an?" |
13:11 | Isa jawab kata sama dia-orang, "K-pada kamu sudah di-brikan boleh tahu kraja'an shorga punya ruhsia, ttapi k-pada dia-orang t'ada di-brikan. |
13:12 | Kerna barang-siapa yang ada apa-apa, k-pada dia nanti di-brikan, dan dia nanti ada banyak skali: ttapi barang-siapa yang t'ada apa-apa, deri-pada dia sampaikan apa yang dia ada pun nanti kna ambil. |
13:13 | Itu sbab-lah sahya berchakap sama dia-orang dngan perumpama'an; kerna sunggoh pun dia-orang tengok, ttapi t'ada juga tengok, dan sunggoh pun dia-orang dngar, ttapi t'ada juga dngar atau mngerti. |
13:14 | Jadi k-pada dia-orang sudah di-bnarkan nabi Yash'aya punya perkata'an, 'Kamu dngar punya dngar, ttapi skali-kali t'ada kamu nanti mngerti; Dan tengok punya tengok, ttapi skali-kali t'ada kamu nanti nampak: |
13:15 | Kerna ini bangsa punya hati sudah jadi kras, Dan dia-orang punya kuping sudah brat mau dngar, Dan mata-nya pun sudah dia-orang tutopkan; Spaya jangan skali-kali dia-orang nampak dngan mata-nya, Dan dngar dngan kuping-nya, Dan mngerti dngan hati-nya, Dan bertobat, Dan sahya smbohkan dia-orang.' |
13:16 | Ttapi berkat-lah mata kamu, sbab boleh tengok; dan kuping kamu pun, sbab boleh dngar. |
13:17 | Kerna dngan sunggoh sahya kata sama kamu, banyak juga nabi-nabi dan orang-orang bnar sudah ingin mau tengok apa yang kamu tengok, ttapi ta'dapat nampak; dan mau dngar apa yang kamu dngar, ttapi ta'dapat dngar. |
13:18 | Sbab itu kamu ini baik dngar perumpama'an orang pnabur. |
13:19 | Bila barang-siapa dngar perkata'an kraja'an itu, dan t'ada mngerti, datang-lah si-jahat, dan mrbot apa yang sudah di-taburkan dalam hati-nya. Ini-lah dia yang tertabur di tpi jalan. |
13:20 | Dan yang tertabur di tmpat berbatu, ini-lah dia yang dngar itu perkata'an, dan itu juga dia trima dngan suka-hati: |
13:21 | ttapi dia t'ada akar dalam diri-nya sndiri, ttapi chuma tahan sikit tempo saja, dan bila ksusahan atau aniaya datang kerna itu perkata'an punya sbab, itu juga dia terantok. |
13:22 | Dan yang tertabur di tngah-tngah pokok duri, ini-lah dia yang dngar itu perkata'an: ttapi ini dunia punya khuatir sama kkaya'an punya tipu lmaskan itu perkata'an sampaikan dia mnjadi ta'berbuah. |
13:23 | Dan yang tertabur di tanah yang baik, ini-lah dia yang dngar itu perkata'an dan mngerti; dia-lah berbuah berganda-ganda, ada yang s-ratus, ada yang anam-puloh dan ada yang tiga-puloh ganda." |
13:24 | Lain satu perumpama'an Isa kluarkan sama dia-orang, dan kata, "Kraja'an shorga ada di-samakan dngan satu orang yang sudah tabur bneh yang baik di ladang-nya: |
13:25 | ttapi ktika orang tidor, dia punya musoh datang, dan tabur bneh lalang pula di tngah-tngah trigu, habis itu dia pergi. |
13:26 | Ttapi bila daun sudah bertumboh dan buah sudah kluar, bharu-lah itu lalang pun ternampak. |
13:27 | Dan itu tuan-ladang punya hamba smoa datang kata sama dia, 'Tuan, bukan-kah tuan sudah tabur bneh yang baik di ladang tuan? bagimana pula ini ladang sudah ada lalang?' |
13:28 | Dia kata sama dia-orang, 'Satu musoh punya kerja ini.' Itu hamba smoa kata sama dia, 'Tuan mau-kah kita pergi kumpolkan itu lalang?' |
13:29 | Ttapi dia kata, 'Ta'usah; kerna sambil kamu kumpolkan lalang, barangkali kamu nanti chabotkan trigu skali. |
13:30 | Biar dua-dua itu bertumboh sama-sama sampai musim mnuai, dan tempo musim mnuai sahya nanti kata sama orang yang mnuai, "Mula-mula kumpolkan itu lalang, dan buat bbrapa ikat, spaya boleh bakar; ttapi trigu itu bawa masok dalam gudang sahya."'" |
13:31 | Lain satu perumpama'an Isa kluarkan sama dia-orang, dan kata, "Kraja'an shorga ada sama sperti satu biji ssawi, yang satu orang ambil tanamkan dalam dia punya ladang: |
13:32 | ini yang kchil skali punya biji; ttapi bila sudah bertumboh, mnjadi lagi bsar deri-pada sgala sayur-sayur, dan mnjadi satu pokok bsar, sampaikan burong-burong datang mnumpang di dahan-dahan-nya." |
13:33 | Lain satu perumpama'an dia chakapkan sama dia-orang: "Kraja'an shorga ada sama sperti ragi, yang satu prempuan ambil smbunyikan dalam tiga sukatan punya tpong, sampaikan smoa-nya sudah berragi." |
13:34 | Smoa ini perkara Isa chakapkan sama orang-banyak dngan perumpama'an; dan kalau dngan t'ada satu perumpama'an dia t'ada chakap sama dia-orang: |
13:35 | spaya boleh di-bnarkan apa yang itu nabi sudah kata, "Sahya nanti bukakan mulut sahya chakap perumpama'an, Sahya nanti mnguchap perkara-perkara yang sudah tersmbunyi deri asal dunia." |
13:36 | Habis itu, Isa tinggalkan orang-banyak dan masok rumah: dan dia punya murid-murid datang sama dia, kata, "Trangkan sama kita itu chrita deri-hal itu lalang yang di ladang." |
13:37 | Dia jawab kata, "Yang mnabur bneh yang baik dia-lah Anak-manusia; |
13:38 | dan ladang itu-lah dunia; dan bneh yang baik itu-lah anak-anak kraja'an; dan lalang itu-lah anak-anak si-jahat; |
13:39 | dan musoh yang sudah tabur itu lalang dia-lah iblis; dan musim mnuai itu-lah ksudahan jman ini; dan orang yang mnuai itu-lah mla'ikat. |
13:40 | Sbab itu sperti lalang kna kumpol dan kna bakar dngan api; bgitu-lah nanti jadi bila ksudahan jman ini. |
13:41 | Anak-manusia nanti hantarkan dia punya mla'ikat-mla'ikat, dan dia-orang nanti kumpolkan kluar deri-pada dia punya kraja'an s-lagi perkara yang kasi orang terantok, dan orang-orang yang buat jahat, |
13:42 | dan nanti buangkan smoa masok dapur yang berapi; di situ-lah nanti ada mratap sama gertak gigi. |
13:43 | Itu ktika orang yang bnar nanti berchahya-chahya sperti matahari di dalam Bapa-nya punya kraja'an. Siapa ada kuping, biar-lah dia dngar. |
13:44 | "Kraja'an shorga ada sama sperti mata-bnda yang tersmbunyi dalam tanah, yang orang dapat dan smbunyikan: dan sbab dia punya suka hati dia pergi jual smoa herta-nya, dan bli itu tanah. |
13:45 | "Lagi, kraja'an shorga ada sama sperti satu sudagar yang mnchari mutiara yang chantek: |
13:46 | Dan bila dia sudah dapat satu biji mutiara yang herga bsar, dia pergi jual smoa herta-nya, dan bli itu mutiara. |
13:47 | "Dan lagi, kraja'an shorga ada sama sperti satu pukat, yang orang buangkan di dalam laut, dan kumpolkan macham-macham punya ikan: |
13:48 | bila sudah pnoh, orang seret naik di tpi pantai; dan dia-orang dudok pileh yang baik punya masok bakul, ttapi yang ta'baik punya dia-orang buangkan. |
13:49 | Bgitu-lah nanti jadi bila ksudahan jman ini: mla'ikat-mla'ikat nanti kluar asingkan orang yang jahat deri-pada yang baik, |
13:50 | dan nanti buangkan dia dalam dapur yang berapi: di situ-lah nanti ada mratap sama gertak gigi. |
13:51 | "Sudah-kah kamu mngerti smoa ini perkara?" Dia-orang kata sama dia, "Mngerti." |
13:52 | Dan dia kata sama dia-orang, "Sbab itu tiap-tiap orang pnulis yang sudah blajar deri-hal kraja'an shorga ada sama sperti satu tuan-rumah, yang kluarkan deri-pada mata-bnda-nya barang yang bharu dan yang lama pun." |
13:53 | Bila Isa sudah habis chakapkan smoa ini perumpama'an, dia undur deri sana. |
13:54 | Dan bila dia sudah masok dia punya negri sndiri, dia ajar orang dalam dia-orang punya rumah smbahyang, sampaikan itu orang smoa naik hairan dan kata, "Deri mana ini orang sudah dapat ini macham punya bijaksana, dan ini m'ujizat smoa? |
13:55 | Bukan-kah dia ini anak tukang kayu itu? dan bukan-kah mak-nya nama Mariam? dan sudara-sudara-nya Yakob, dan Yusof, dan Simon, dan Yahuda? |
13:56 | Dan sudara-sudara prempuan-nya, bukan-kah dia-orang smoa ada sama-sama kita? Deri mana pula ini orang sudah dapat ini macham punya perkara smoa?" |
13:57 | Dan dia-orang terantok fasal dia. Ttapi Isa kata sama dia-orang, "Satu nabi t'ada kurang hormat, chuma dalam dia punya negri, dan dia punya rumah sndiri saja." |
13:58 | Dan dia t'ada buat banyak m'ujizat di sana sbab dia-orang punya kurang perchaya. |