12:1 | Itu waktu Isa berjalan di ladang trigu hari perhentian; dan dia punya murid-murid naik lapar, dan mula'i ptek tangkai trigu buat makan. |
12:2 | Ttapi bila orang Farisi nampak, dia-orang kata sama Isa, "Tengok, tuan punya murid-murid ada buat perkara yang t'ada halal orang buat tempo hari perhentian." |
12:3 | Ttapi dia kata sama dia-orang, "Blum-kah kamu bacha apa yang Da'ud sudah buat, bila dia sudah naik lapar, dan orang-orang yang ikut dia? |
12:4 | Bagimana dia sudah masok rumah Allah, dan sudah makan roti persmbahan, yang t'ada halal dia makan, atau orang-orang yang ikut dia, chuma imam-imam saja boleh. |
12:5 | Atau blum-kah kamu bacha dalam hukum-taurit bagimana hari perhentian imam-imam dalam ka'abah langgar hukum hari perhentian dngan t'ada salah? |
12:6 | Ttapi sahya kata sama kamu, di sini ada satu orang yang lbeh bsar deri-pada ka'abah. |
12:7 | Ttapi jikalau kamu sudah tahu apa arti-nya ini perkata'an, 'Sahya mau ksian bukan-nya korban,' t'ada kamu nanti salahkan orang-orang yang t'ada salah. |
12:8 | Kerna Anak-manusia jadi hari perhentian punya tuan." |
12:9 | Isa undor deri situ, dan masok dia-orang punya rumah smbahyang: |
12:10 | dan ada satu orang di sana yang mati sblah tangan-nya. Dan sbab mau d'awa sama dia, dia-orang tanya sama Isa, "Ada-kah halal smbohkan orang hari perhentian?" |
12:11 | Dan Isa kata sama dia-orang, "Orang yang mana deri-pada kamu yang kalau dia ada satu ekor kambing, dan ini kambing jatoh dalam lobang tempo hari perhentian, bukan-kah dia nanti pegang sama kambing itu dan angkat kluar? |
12:12 | Brapa banyak lbeh indah manusia deri-pada kambing! Sbab itu halal juga buat baik tempo hari perhentian. |
12:13 | Kmdian dia kata sama itu orang, "Hulorkan angkau punya tangan." Dan dia hulorkan, dan tangan-nya pun pulang jadi baik sama sperti tangan sblah-nya. |
12:14 | Ttapi orang Farisi kluar pakat mlawan Isa bagimana boleh binasakan dia. |
12:15 | Isa tahu itu hal dan undor deri situ: dan banyak orang ikut sama dia; dan smoa-nya dia smbohkan, |
12:16 | serta psan sama dia-orang jangan mashhurkan dia: |
12:17 | spaya di-bnarkan apa yang nabi Yash'aya sudah kata, |
12:18 | "Tengok, ini-lah sahya punya hamba yang sahya sudah pileh; Kkaseh sahya yang berknan sama hati sahya; Sahya nanti taroh sahya punya Roh atas dia, Dan dia nanti khabarkan hukum k-pada sgala bangsa-asing. |
12:19 | Dia t'ada nanti bertngkar atau bertriak; Dan t'ada satu orang nanti dngar dia punya suara di jalan-jalan. |
12:20 | Mndrong yang sudah pchah pun t'ada nanti dia patahkan, Dan sumbu yang lagi berasap pun t'ada nanti dia padamkan, S-blum dia kluarkan hukum sampai mnang. |
12:21 | Dan sama dia punya nama nanti sgala bangsa-asing harapkan." |
12:22 | Itu waktu orang bawa sama Isa satu orang yang terkna jin, buta dan bisu: dan Isa smbohkan dia, sampaikan orang bisu itu berchakap dan mlihat. |
12:23 | Smoa orang-banyak terchngang, dan kata, "Bukan-kah dia ini anak Da'ud?" |
12:24 | Ttapi bila orang Farisi dngar, dia-orang kata, "Dia ini buangkan jin oleh kuasa Ba'al-zabul, kpala jin itu." |
12:25 | Isa tahu dia-orang punya fikiran, dan dia kata sama dia-orang, "Tiap-tiap kraja'an yang berblah mlawan sndiri nanti jadi sunyi; dan tiap-tiap negri atau rumah tangga yang berblah mlawan sndiri t'ada nanti kkal: |
12:26 | dan jikalau Setan buangkan Setan, dia pun sudah berblah mlawan sndiri; kalau bgitu bagimana pula boleh kraja'an-nya ttap? |
12:27 | Dan jikalau sahya ini buangkan jin dngan kuasa Ba'al-zabul, dngan kuasa siapa pula kamu punya murid-murid buangkan dia? sbab itu dia-orang-lah nanti jadi kamu punya hakim. |
12:28 | Ttapi jikalau dngan Roh Allah sahya ini buangkan jin, tntu-lah kraja'an Allah sudah datang atas kamu. |
12:29 | Atau bagimana-kah boleh orang masok dalam rumah orang yang kuat dan rampas herta-nya, kalau s-blum dia ikatkan orang yang kuat itu dhulu? bharu-lah dia boleh rampas itu rumah. |
12:30 | Orang yang t'ada sblah sahya, dia ada mlawan sahya; dan orang yang t'ada kumpol sama-sama sahya dia itu chrai-braikan. |
12:31 | Sbab itu sahya kata sama kamu, smoa dosa dan hujat pun nanti di-ampunkan sama orang; ttapi hujat atas Roh Alkudus t'ada nanti di-ampunkan. |
12:32 | Dan barang-siapa yang chakap perkata'an mlawan Anak-manusia, itu nanti di-ampunkan sama dia; ttapi barang-siapa chakap apa-apa mlawan Roh Alkudus, t'ada nanti di-ampunkan sama dia, baik dalam ini jman atau dalam jman yang nanti datang. |
12:33 | Buatkan pokok itu baik, dan buah-nya pun baik; atau buatkan pokok itu jahat, dan buah-nya pun jahat: kerna orang knal pokok deri dia punya buah-buahan. |
12:34 | Hei kturunan ular yang bisa, mana boleh kamu yang jahat chakap perkara yang baik? kerna mulut chakapkan perkara yang pnoh dalam hati. |
12:35 | Orang yang baik kluarkan perkara yang baik deri-pada mata-bnda-nya yang baik, dan orang yang jahat pula kluarkan perkara yang jahat deri-pada mata-bnda-nya yang jahat. |
12:36 | Dan sahya kata sama kamu, tempo hari kiamat orang msti kasi jawab deri-hal tiap-tiap perkata'an sia-sia yang dia sudah chakapkan. |
12:37 | Kerna deri sbab angkau punya perkata'an angkau nanti di-bnarkan, dan deri sbab angkau punya perkata'an juga angkau nanti di-salahkan." |
12:38 | Itu waktu ada orang pnulis sama orang Farisi jawab, kata sama Isa, "Guru, kita mau tengok satu tanda deri-pada guru." |
12:39 | Ttapi dia jawab, kata sama dia-orang, "Orang jman yang jahat dan yang berzina chari tanda; dan t'ada satu tanda nanti di-brikan sama dia, chuma tanda nabi Yunus saja: |
12:40 | kerna sama sperti Yunus sudah tiga hari tiga malam di dalam prot ikan bsar itu, bgitu-lah Anak-manusia nanti ada tiga hari tiga malam dalam hati bumi. |
12:41 | Orang negri Ninaweh nanti bangkit hari kiamat sama-sama ini jman punya orang, dan nanti salahkan dia-orang: kerna dia-orang sudah bertobat sbab Yunus punya pngajaran; dan tengok, di sini ada satu yang lbeh deri-pada Yunus. |
12:42 | Raja prempuan tanah slatan nanti bangkit hari kiamat sama-sama ini jman punya orang, dan nanti salahkan dia-orang: kerna dia sudah datang deri hujong bumi mau dngarkan raja Sulaiman punya bijaksana; dan tengok, di sini ada satu yang lbeh deri-pada Sulaiman. |
12:43 | Ttapi bila jin yang najis sudah kluar deri-pada orang, dia lalu di tmpat-tmpat yang t'ada ayer mnchari perhentian, t'ada juga dapat. |
12:44 | Habis itu dia kata, 'Sahya mau pulang rumah sahya, tmpat di mana sahya sudah kluar;' dan bila sampai, dia tengok itu rumah ada kosong, sudah sapu dan sudah rias. |
12:45 | Kmdian dia pergi ambil sama-sama dia lagi tujoh jin yang lbeh jahat deri-pada dia sndiri, dan smoa itu jin masok tinggal di sana: jadi, itu orang punya hal pnghabisan lbeh ta'baik deri-pada yang mula-mula. Bgitu juga nanti jadi sama ini jman yang jahat." |
12:46 | Ktika Isa lagi berchakap sama orang-orang banyak, ada dia punya mak dan sudara-sudara berdiri di luar mau chakap sama dia. |
12:47 | Dan ada satu orang kata sama dia, "Tengok, tuan punya mak dan sudara-sudara ada berdiri di luar mau chakap sama tuan." |
12:48 | Ttapi Isa jawab kata sama dia itu yang bilangkan sama dia, "Siapa-kah mak sahya? dan siapa-kah sudara-sudara sahya?" |
12:49 | Dan dia unjokkan tangan-nya k-pada murid-murid-nya, dan kata, "Tengok, ini-lah mak sahya dan sudara-sudara sahya! |
12:50 | Kerna barang-siapa yang buat kahandak Bapa sahya yang di shorga, dia-lah sahya punya sudara jantan, dan sudara prempuan, dan sahya punya mak." |