7:1 | Atau t'ada-kah kamu smoa tahu, hei sudara-sudara (kerna sahya ada berchakap k-pada orang yang tahu hukum-taurit), bagimana hukum-taurit itu ada prentah atas orang s-lama-nya dia hidop? |
7:2 | Kerna satu prempuan yang ada laki-nya sudah terikat oleh hukum itu k-pada laki-nya s-lagi laki-nya hidop; ttapi jikalau laki-nya sudah mati, itu prempuan sudah lpas deri-pada hukum laki. |
7:3 | Jadi itu, jikalau waktu laki-nya ada hidop dia berhubong sama lain orang, itu prempuan nanti di-sbotkan prempuan berzina: ttapi jikalau laki-nya mati, prempuan itu sudah bebas deri-pada itu hukum, jadi dia bukan satu prempuan berzina, sunggoh pun dia berhubong sama lain orang. |
7:4 | Sbab itu, hei sudara-sudara, kamu ini pun sudah jadi mati k-pada hukum-taurit oleh Almaseh punya badan, spaya kamu boleh berhubong sama yang lain, ia'itu sama dia yang sudah di-bangkitkan deri antara orang mati, spaya kita boleh kluarkan buah-buahan k-pada Allah. |
7:5 | Kerna waktu kita ada lagi dalam tabi'at dunia sgala k'inginan dosa yang datang oleh hukum-taurit bkerja dalam kita punya anggota sampai kluarkan buah-buahan k-pada kmatian. |
7:6 | Ttapi skarang kita sudah lpas deri-pada hukum-taurit, sbab kita sudah mati k-pada itu hukum-taurit yang di dalam-nya kita dhulu sudah terikat; sampaikan kita buat perhamba'an bharu yang rohani, bukan perhamba'an lama yang ikut surat. |
7:7 | Kalau bgitu apa-kah kita boleh bilang? Hukum-taurit itu dosa-kah? Tidak skali-kali. Ttapi t'ada pun sahya tahu apa-kah dosa kalau tidak oleh hukum-taurit: kerna sahya t'ada tahu apa-kah tma'a jikalau hukum-taurit t'ada bilang, "Jangan-lah angkau tma'a." |
7:8 | Ttapi oleh itu psanan dosa sudah dapat satu jalan, dan sudah kerjakan dalam diri sahya macham-macham punya tma'a: kerna kalau t'ada hukum-taurit, mati-lah dosa. |
7:9 | Dan ada satu kali dhulu, dngan t'ada hukum-taurit, sahya ini ada hidop: ttapi bila itu psanan datang, dosa hidop s-mula, dan sahya pula mati; |
7:10 | dan itu psanan yang patut bawa hidop, itu-lah juga sahya dapat tahu ada bawa kmatian: |
7:11 | kerna oleh itu psanan dosa sudah dapat jalan, dan sudah tipukan sahya, dan oleh psanan juga sudah bunoh sama sahya. |
7:12 | Jadi itu, hukum-taurit itu ada kudus, dan psanan pun ada kudus, dan bnar, dan baik. |
7:13 | Kalau bgitu apa yang baik sudah jadi sama sahya kmatian-kah? Tidak skali-kali. Ttapi dosa-lah, yang sudah jadi kmatian; spaya nyata yang itu-lah dosa, dalam dia kerjakan kmatian dalam diri sahya oleh perkara yang baik itu, spaya oleh itu psanan dosa boleh mnjadi sangat-lah berdosa. |
7:14 | Kerna kita tahu juga yang hukum-taurit itu ada rohani, ttapi sahya ini-lah yang deri-pada tabi'at dunia, sudah terjual mnjadi hamba dosa. |
7:15 | Kerna apa yang sahya kerjakan sahya ta'mngaku: kerna bukan-nya apa yang sahya mau itu-lah yang sahya slalu buat; ttapi apa yang sahya bnchi itu-lah juga yang sahya buat. |
7:16 | Ttapi jikalau sahya buat apa yang sahya ta'mau, sahya mngkin yang hukum-taurit ada baik. |
7:17 | Jadi skarang bukan-nya lagi sahya ini yang kerjakan itu, ttapi dosa yang tinggal dalam sahya. |
7:18 | Kerna sahya tahu yang apa yang baik t'ada tinggal dalam sahya, ia'itu dalam sahya punya tabi'at dunia: kerna dia punya mau ada juga sama sahya, ttapi dia punya kerjakan apa yang baik itu pula t'ada. |
7:19 | Kerna apa yang baik yang sahya mau, itu-lah sahya t'ada buat: ttapi apa yang jahat yang sahya ta'mau, itu-lah sahya slalu buat. |
7:20 | Ttapi jikalau sahya buat apa yang sahya ta'mau, bukan-nya lagi sahya ini yang kerjakan itu, ttapi dosa yang tinggal dalam sahya. |
7:21 | Jadi itu, ini-lah macham punya hukum sahya dapat, ia'itu yang bila sahya mau buat baik, dosa pula ada sama sahya. |
7:22 | Kerna dalam sahya punya hati sahya ada berknan sama hukum Allah: |
7:23 | ttapi sahya tengok lain hukum pula dalam anggota sahya, yang berprang sama hukum hati sahya, dan bawa sahya jadi tawanan k-pada hukum dosa yang ada di dalam anggota sahya. |
7:24 | Ah, sahya ini orang chlaka! siapa-kah yang boleh lpaskan sahya deri-pada ini badan yang matikan? |
7:25 | Sahya mnguchap-lah shukor k-pada Allah, oleh Tuhan kita Isa Almaseh Jadi itu, sahya sndiri dalam sahya punya hati jadi hamba k-pada hukum Allah; ttapi dalam tabi'at dunia sahya jadi hamba k-pada hukum dosa. |