11:1 | Jadi itu sahya bilang, "Allah sudah buangkan dia punya bangsa-kah?" Skali-kali tidak. Kerna sahya ini pun satu orang Isra'el, kturunan Ibrahim, deri-pada suku-bangsa Binyamin. |
11:2 | Allah bukan-nya sudah buangkan bangsa-nya yang dia sudah knal lbeh dhulu. Atau t'ada-kah kamu tahu apa kitab ada bilang deri-hal Ilia? bagimana dia mngadu k-pada Allah mlawan Isra'el, |
11:3 | dan kata, "Ya Tuhan, dia-orang sudah bunohkan Tuhan punya nabi-nabi, dia-orang sudah rubohkan Tuhan punya tmpat korban: dan sahya-lah yang tertinggal s'orang-s'orang, dan dia-orang chari nyawa sahya." |
11:4 | Ttapi apa-kah Allah punya jawab sama dia? "Sahya sudah tinggalkan kerna diri sahya tujoh-ribu orang dlaki, yang blum lipat lutut-nya k-pada Ba'al." |
11:5 | Bgitu-lah juga skarang pun ada tertinggal satu tinggalan yang terpileh deri sbab anugrah Allah. |
11:6 | Ttapi jikalau sbab anugrah, bukan-lah deri-pada orang punya perbuatan: kalau tidak bgini, tntu-lah anugrah itu bukan anugrah. |
11:7 | Kalau bgitu bagimana pula? Apa yang Isra'el ada chari, itu-lah juga yang dia t'ada dapat; ttapi orang pilehan itu sudah dapat, dan yang lain pula sudah di-kraskan: |
11:8 | sperti ada tersurat, "Allah sudah kasi dia-orang hati kaku, dan mata yang ta'nampak, dan kuping yang ta'dngar," sampai skarang juga. |
11:9 | Dan Da'ud pun ada kata, "Biar meja-nya mnjadi satu jrat, dan satu prangkap, Dan satu batu terantok, dan satu balasan k-pada dia-orang: |
11:10 | Biar mata dia-orang di-kaburkan, spaya jangan dia-orang nampak, Dan bongkokkan-lah blakang-nya slalu." |
11:11 | Kalau bgitu sahya bilang, "Dia-orang punya terantok itu spaya dia-orang boleh jatoh-kah?" Skali-kali tidak: ttapi dalam hal ksalahan-nya itu slamat sudah datang k-pada orang bangsa-asing pula, spaya boleh bangkitkan chmburuan Isra'el. |
11:12 | Ttapi jikalau dia-orang punya ksalahan mnjadi isi dunia punya kkaya'an, dan dia-orang punya krugian mnjadi bangsa-asing punya kkaya'an; apa lagi bila dia-orang di-btulkan s-mula? |
11:13 | Ttapi sahya ada berchakap sama kamu yang deri-pada bangsa-asing. Jadi itu, dalam hal sahya ini rasul orang bangsa-asing, sahya bsarkan sahya punya playanan: |
11:14 | jikalau sahya boleh dapat bangkitkan chmburuan dalam hati orang bangsa sahya, dan boleh slamatkan sikit orang deri-pada-nya. |
11:15 | Kerna jikalau hal dia-orang kna tolak datangkan isi dunia punya perdamaian, apa-kah nanti jadi bila dia-orang di-sambotkan pula, kalau tidak hidop deri antara orang mati? |
11:16 | Dan jikalau tpong yang mula-mula itu jadi kudus, tntu-lah tpong yang s-gumpal pun kudus: dan jikalau akar-nya kudus, tntu-lah charang-charang-nya pun kudus. |
11:17 | Ttapi jikalau sparoh charang-charang itu sudah di-patahkan, dan angkau pula, pokok zaitun-hutan ini, di-changkokkan masok antara-nya, dan sudah dapat bhagian deri-pada akar yang kasi gmok sama itu pokok zaitun: |
11:18 | jangan mgahkan diri atas itu charang-charang: ttapi jikalau angkau mgahkan diri pun, bukan-nya angkau ini yang tanggong itu akar, ttapi akar itu yang tanggong sama angkau. |
11:19 | Angkau nanti kata pula, "Charang-charang itu sudah di-patahkan spaya sahya ini boleh di-changkokkan masok." |
11:20 | Baik-lah, deri sbab dia-orang punya kurang perchaya dia-orang sudah di-patahkan, dan deri sbab angkau punya perchaya angkau ini ada ttap. Jangan jadi hati-bsar, ttapi baik-lah angkau takot: |
11:21 | kerna jikalau charang yang asal itu Allah t'ada sayangkan, angkau pun dia t'ada nanti sayangkan. |
11:22 | Sbab itu, tengok-lah Allah punya murah-hati dan kkrasan pun: k-pada orang-orang yang sudah jatoh itu kkrasan, ttapi k-pada angkau ini murah-hati Allah, jikalau angkau tinggal ttap dalam murah-hati-nya: kalau tidak angkau pun nanti di-kratkan juga. |
11:23 | Dan jikalau dia-orang t'ada tinggal ttap dalam hal kurang-perchaya-nya, dia-orang pun nanti di-changkokkan masok: kerna Allah ada kuasa changkokkan dia-orang masok lagi s-kali. |
11:24 | Kerna jikalau angkau sudah di-kratkan deri-pada angkau punya asal, ia'itu pokok zaitun-hutan, dan angkau di-changkokkan masok dalam pokok zaitun yang btul, lain deri-pada angkau punya asal: apa lagi ini smoa charang-charang yang asal nanti di-changkokkan masok dalam pokok-nya sndiri? |
11:25 | Hei sudara-sudara, spaya jangan kamu sangkakan diri kamu bijaksana, sahya mau kasi kamu tahu ini ruhsia, ia'itu, orang Isra'el punya hati sudah jadi sparoh kras, sampai ktika s-gnap bangsa-asing sudah masok; |
11:26 | dan bgini-lah s-gnap bangsa Isra'el nanti dapat slamat: sama sperti ada tersurat, "Seri Sion nanti terkluar Pnolong itu; Dia-lah nanti jauhkan deri-pada Yakob hati yang ssat: |
11:27 | Dan bgini-lah sahya punya perjanjian k-pada dia-orang, Ktika sahya bawa pergi dosa-dosa-nya." |
11:28 | Deri-hal injil, dia-orang mnjadi musoh-musoh kerna kamu punya sbab: ttapi deri-hal dia-orang sudah terpileh, dia-orang di-kasehkan kerna nenek-moyang punya sbab. |
11:29 | Kerna Allah t'ada mnysal deri-hal anugrah-nya atau panggilan-nya. |
11:30 | Kerna sperti dhulu kamu sudah derhaka k-pada Allah, ttapi skarang sudah dapat ksian, sbab orang Isra'el punya derhaka, |
11:31 | bgitu juga dia-orang pula skarang sudah derhaka, spaya sbab ksian yang kamu sudah dapat dia-orang pun boleh skarang dapat ksian. |
11:32 | Kerna Allah sudah kurongkan smoa dalam hal derhaka, spaya dia boleh tunjokkan ksian atas smoa orang. |
11:33 | Hei Allah punya bijaksana dan pngtahuan, sangat-lah dalam kkaya'an-nya! Hukuman-nya t'ada-lah boleh orang slidek, dan jalan-nya t'ada-lah boleh orang dapat chari! |
11:34 | Kerna siapa-kah yang sudah tahu ingatan Tuhan? atau siapa-kah yang sudah jadi dia punya pnolong bichara? |
11:35 | atau siapa-kah yang sudah kasi apa-apa sama dia lbeh dhulu, spaya dapat balas balek? |
11:36 | Kerna sgala perkara asal-nya deri-pada Allah juga, dan oleh dia, dan kerna dia. Sgala puji k-pada dia sampai s-lama-lama-nya. Amin. |