10:1 | Hei sgala sudara, sahya punya ingin-hati dan sahya punya do'a k-pada Allah kerna dia-orang, ia'itu spaya dia-orang boleh dapat slamat. |
10:2 | Kerna sahya saksikan atas dia-orang, yang dia-orang ada rajin juga kerna Allah, ttapi bukan dngan pngtahuan. |
10:3 | Kerna sbab ta'tahu Allah punya kbnaran, dan sbab mau choba dirikan satu kbnaran sndiri punya, dia-orang sudah t'ada tundok k-pada Allah punya kbnaran. |
10:4 | Kerna Almaseh-lah ksudahan taurit mau mndatangkan kbnaran k-pada tiap-tiap orang yang perchaya. |
10:5 | Kerna Musa ada tulis yang itu orang yang buat kbnaran yang datang deri hukum taurit boleh hidop oleh-nya. |
10:6 | Ttapi itu kbnaran yang datang deri perchaya ada kata bgini, "Jangan bilang dalam angkau punya hati, 'Siapa-kah boleh naik shorga?'" (ia'itu mau bawa Almaseh turun), |
10:7 | "atau, 'Siapa-kah boleh turun alam-maut'" (ia'itu mau bawa naik Almaseh deri antara orang mati). |
10:8 | Ttapi apa-kah dia kata? "Perkata'an itu ada dkat angkau, ia'itu di dalam mulut angkau dan di dalam hati angkau:" itu-lah perkata'an deri-hal perchaya yang kita ada khabarkan: |
10:9 | Sbab kalau dngan angkau punya mulut angkau mngaku sama Isa yang dia-lah Tuhan, dan perchaya pula dalam angkau punya hati yang Allah sudah bangkitkan dia deri antara orang mati, tntu-lah angkau dapat slamat: |
10:10 | kerna dngan hati orang perchaya sampai dapat kbnaran, dan dngan mulut orang mngaku sampai dapat slamat. |
10:11 | Kerna kitab ada bilang, "Barang-siapa perchaya sama dia t'ada nanti kna malu." |
10:12 | Kerna t'ada apa sliseh orang Yahudi sama orang Grik, kerna Tuhan itu juga yang mnjadi Allah atas sklian, dan ada murah-hati k-pada smoa orang yang bertriak sama dia: |
10:13 | kerna, "Barang-siapa yang bertriak k-pada nama Tuhan nanti di-slamatkan." |
10:14 | Jadi bagimana pula dia-orang boleh triak k-pada dia itu yang dia-orang blum perchaya? dan bagimana pula dia-orang boleh perchaya sama dia itu yang dia-orang blum dngar? dan bagimana pula dia-orang boleh dngar jikalau t'ada satu orang khabarkan? |
10:15 | dan bagimana pula orang boleh khabarkan, jikalau bukan di-hantarkan? sama sperti ada tersurat, "Brapa-lah chantek kaki orang-orang yang bawa khabar yang baik." |
10:16 | Ttapi bukan smoa-nya sudah dngarkan itu khabar yang baik. Kerna Yash'aya ada bilang, "Ya Tuhan, siapa-kah yang sudah perchaya kita punya khabar?" |
10:17 | Jadi, perchaya datang deri sbab mnngar, dan mnngar datang deri sbab perkata'an Almaseh. |
10:18 | Ttapi sahya bilang, "T'ada-kah dia-orang dngar?" Ya, tntu skali, "Bunyi-nya sudah pchah sluroh dunia, Dan perkata'an-nya sampai sgala hujong bumi." |
10:19 | Ttapi sahya bilang, "T'ada-kah Isra'el tahu?" Mula-mula Musa ada kata, "Sahya nanti bangkitkan chmburu dalam kamu punya hati atas orang yang bukan satu bangsa, Dan sahya nanti bangkitkan kamu punya marah atas satu bangsa yang bbal." |
10:20 | Dan Yash'aya pun banyak brani, dan dia kata, "Orang yang t'ada chari sama sahya sudah dapat: Sahya mnjadi nyata k-pada orang yang t'ada tanya sama sahya." |
10:21 | Ttapi deri-hal Isra'el pula dia kata bgini, "S-panjang hari sahya sudah hulorkan tangan sahya k-pada satu bangsa yang derhaka dan yang suka mnjawab balek." |