9:1 | Ttapi Sa'ul lagi mnguchap gertak mau bunoh anak-murid Tuhan, dan dia pergi k-pada imam-bsar, |
9:2 | dan minta sama dia surat-surat k-pada negri Damsek k-pada rumah-rumah smbahyang, spaya kalau dia dapat siapa-siapa yang ikut itu Jalan, baik jantan baik prempuan, dia boleh bawa dia-orang di Yerusalim terikat. |
9:3 | Tngah dia berjalan, dia sampai dkat Damsek: dan dngan s-kjapan satu chahya deri langit berchahya-chahya kliling dia: |
9:4 | dan dia jatoh di tanah, dan dngar satu suara yang kata sama dia, "Sa'ul, Sa'ul, knapa angkau aniayakan sahya?" |
9:5 | Dan dia kata, "Siapa-kah tuan ini." Dan dia kata, "Sahya-lah Isa yang angkau aniayakan; |
9:6 | ttapi bangun, dan masok negri, dan orang nanti bilang sama angkau apa msti buat." |
9:7 | Dan orang-orang yang berjalan sama-sama dia berdiri sperti bisu, kerna itu suara dia-orang dngar, ttapi satu orang pun dia ta'nampak. |
9:8 | Dan Sa'ul bangun deri tanah; dan bila mata-nya sudah terbuka dia t'ada tengok satu apa; dan dia-orang pimpin tangan-nya, dan bawa dia masok negri Damsek. |
9:9 | Dan tiga hari punya lama dia ta'boleh tengok, dan t'ada makan minum pun. |
9:10 | Ada satu anak-murid di Damsek bernama Hananiah; dan Tuhan kata sama dia dalam satu pnglihatan, "Hei Hananiah," dan dia kata, "Sahya, Tuhan." |
9:11 | Dan Tuhan kata sama dia, "Bangun, dan pergi sampai itu Jalan yang bernama Jalan Lurus, dan tanya di rumah Yudas deri-hal satu orang bernama Sa'ul, orang Tarsus; kerna dia ada minta do'a, |
9:12 | dan sudah tengok satu orang bernama Hananiah masok, dan taroh tangan-nya atas dia, spaya dia boleh nampak s-mula." |
9:13 | Dan Hananiah jawab, "Ya Tuhan, sahya sudah dngar banyak orang chakap fasal ini orang, brapa banyak chlaka dia sudah bawa atas Tuhan punya orang-orang suchi di Yerusalim: |
9:14 | dan di sini pun dia ada kuasa deri-pada kpala-kpala imam spaya dia boleh ikatkan smoa orang yang triak Tuhan punya nama." |
9:15 | Ttapi Tuhan kata sama dia, "Pergi-lah, kerna dia sama sahya satu perkakas yang terpileh, mau bawa nama sahya dpan sgala bangsa-asing, dan raja-raja, dan anak-anak Isra'el pun; |
9:16 | kerna sahya nanti tunjokkan dia brapa banyak susah dia msti tahan sbab sahya punya nama." |
9:17 | Dan Hananiah pergi masok itu rumah; dan taroh tangan-nya atas dia, serta kata, "Hei sudara Sa'ul, Tuhan, ia'itu Isa yang sudah ternampak sama angkau tngah angkau jalan datang, dia sudah hantarkan sahya, spaya angkau boleh nampak s-mula; dan boleh di-pnohkan dngan Roh Alkudus." |
9:18 | Dan itu juga ada sperti sisek-sisek jatoh deri-pada dia punya mata, dan dia boleh nampak s-mula; dan dia bangun dan trima baptis; |
9:19 | dan bila dia sudah makan dia jadi kuat. Ada brapa hari punya lama, dia tinggal sama-sama murid-murid di Damsek. |
9:20 | Dan itu juga dia khabarkan dalam rumah-rumah smbahyang yang Isa-lah Anak Allah. |
9:21 | Dan smoa orang yang dngar sama dia jadi terpranjat, serta kata, "Bukan-kah dia ini yang binasakan smoa orang yang triak nama ini di Yerusalim? dan dia sudah datang sini spaya dia boleh bawa dia-orang dngan terikat dpan kpala-kpala imam?" |
9:22 | Ttapi Sa'ul bertambah-tambah kuasa-nya, dan orang-orang Yahudi yang tinggal di Damsek dia kasi bingong, dngan mnyatakan yang Isa-lah Almaseh. |
9:23 | Dan brapa hari kmdian, orang Yahudi pakat mau bunoh dia; |
9:24 | ttapi Sa'ul dapat tahu deri-hal dia-orang punya pakatan. Dan pintu-pintu negri pun dia-orang jaga siang malam, spaya boleh bunoh dia: |
9:25 | ttapi dia punya murid-murid ambil dia tempo malam, serta turunkan dia trus satu lobang di tembok, dan hulorkan dia k-bawah dalam satu kranjang. |
9:26 | Dan bila dia sudah sampai di Yerusalim, dia choba mau champur sama murid-murid itu; ttapi dia-orang smoa takot sama dia, t'ada perchaya yang dia satu anak-murid juga. |
9:27 | Ttapi Bar-nabas ambil sama dia, dan bawa dia k-pada rasul-rasul, dan chritakan k-pada dia-orang bagimana Sa'ul sudah tengok Tuhan di tngah jalan, dan Tuhan sudah berchakap sama dia, dan bagimana di negri Damsek dia sudah mngajar dalam nama Isa dngan brani-hati. |
9:28 | Dan dia bersama-sama dia-orang kluar masok di Yerusalim, |
9:29 | serta mngajar dalam nama Tuhan dngan brani-hati: dan dia berchakap dan berbantah sama orang Yahudi peranakan Grik; ttapi dia-orang choba mau bunoh dia. |
9:30 | Dan bila sudara-sudara itu dapat tahu deri-hal ini, dia-orang bawa dia turun pergi Kaisariah, dan hantarkan dia pergi Tarsus. |
9:31 | Jadi, eklisia pada sluroh tanah Yahudiah dan Galil dan Samariah dapat sntosa, dan sudah di-tgohkan; dan sudah bertambah-tambah banyak-nya, serta berjalan dalam takot Tuhan, dan dalam pnghiburan Roh Alkudus. |
9:32 | Dan sudah jadi, tlanju Petrus jalan sgala tmpat, dia datang k-pada orang-orang suchi yang tinggal di Ludda. |
9:33 | Dan di sana dia dapat satu orang bernama Ainias, yang terlntang di tmpat tidor-nya lapan tahun punya lama, sakit tepok. |
9:34 | Dan Petrus kata sama dia, "Hei Ainias, Isa Almaseh smbohkan angkau: bangun, dan btulkan angkau punya tmpat-tidor." Dan itu juga dia bangun. |
9:35 | Dan smoa orang yang tinggal di Ludda dan di Sharon tengok sama dia, dan dia-orang balek k-pada Tuhan. |
9:36 | Di negri Yafa ada satu anak-murid bernama Tabita, ia'itu kalau tersalin di-sbot Dorkas; ini prempuan banyak berbuat baik, dan banyak kasi sdkah. |
9:37 | Itu waktu dia jatoh sakit, dan mati: dan bila orang sudah mandikan dia, dia-orang ltakkan dia dalam bilek loteng. |
9:38 | Dan sbab Ludda dkat Yafa, murid-murid dngar yang Petrus ada di situ, dan dia-orang suroh dua orang pergi sama dia, dan minta dia, "Jangan-lah lengah datang k-pada kita." |
9:39 | Petrus bangun, dan pergi sama-sama dia-orang. Dan bila dia sudah sampai, dia-orang bawa dia naik masok bilek loteng: dan smoa prempuan bujang berdiri di sblah dia, serta mnangis dan unjokkan baju-baju dan lain-lain pakaian yang Dorkas sudah bikin s-lagi dia ada bserta dngan dia-orang. |
9:40 | Ttapi Petrus suroh smoa orang kluar, dan dia berlutut minta do'a: dan dia paling k-pada itu mayat, kata, "Tabita, bangun." Dan Tabita buka mata; dan bila dia tengok Petrus, dia bangun dudok. |
9:41 | Petrus kasi tangan sama dia, dan bangunkan dia; dan bila dia sudah panggil orang-orang suchi dan prempuan bujang, dia srahkan Tabita dpan dia-orang dngan hidop. |
9:42 | Dan itu perkara jadi mashhur di sluroh negri Yafa: dan banyak orang perchaya sama Tuhan. |
9:43 | Dan ada brapa hari Petrus tinggal di Yafa sama satu tukang samak-kulit bernama Simon. |