3:1 | Petrus dan Yahya naik masok ka'abah waktu smbahyang, pukol tiga ptang. |
3:2 | Dan ada satu orang yang tempang deri-pada prot mak-nya, orang pikul sama dia, dan Itakkan dia s-hari-hari di pintu ka'abah yang bernama Pintu Elok, spaya dia boleh minta sdkah deri-pada orang yang masok dalam ka'abah. |
3:3 | Bila ini orang tengok Petrus dan Yahya mau masok ka'abah, dia minta sdkah. |
3:4 | Petrus dngan Yahya mrnong sama dia dan kata, "Tengok sama kita," |
3:5 | Dan dia perhatikan, dngan harap boleh dapat apa-apa deri-pada dia-orang. |
3:6 | Ttapi Petrus kata, "Mas dan perak sahya t'ada; ttapi apa yang sahya ada, itu-lah sahya kasi. Dalam nama Isa Almaseh orang Nasarat, jalan-lah." |
3:7 | Dan dia pegang tangan kanan-nya, dan bangunkan dia: dan itu jam juga kaki dan mata-kaki-nya mnjadi kuat. |
3:8 | Dan dia lompat, berdiri dan berjalan; dan masok ka'abah sama-sama dia-orang, berjalan, dan berlompat dan mmuji Allah. |
3:9 | Smoa orang bangsa itu tengok dia berjalan dan mmuji Allah: |
3:10 | dan dia-orang knal sama dia yang dia-lah yang dudok minta sdkah di pintu ka'abah yang bernama Pintu Elok: dan dia-orang mnjadi pnoh-lah dngan hairan dan terpranjat sbab perkara yang sudah jadi sama dia. |
3:11 | Dan ktika dia pegang Petrus dan Yahya, smoa orang bangsa itu lari sama-sama pada dia-orang, di srambi yang bernama srambi Sulaiman, dngan banyak hairan. |
3:12 | Bila Petrus tengok itu hal, dia jawab sama orang bangsa itu, "Hei orang Isra'el, knapa kamu hairan deri-hal ini orang? dan knapa kamu mrnong sama kita, sperti dngan kuasa atau kbaktian kita sndiri kita sudah kasi ini orang berjalan? |
3:13 | Allah Ibrahim dan Isahak dan Yakob, Allah nenek-moyang kita, sudah srahkan, dan sangkalkan di hadapan Pilatus, ktika dia sudah bichara mau lpaskan dia. |
3:14 | Ttapi kamu sudah sangkalkan Yang Kudus dan Bnar itu, serta minta satu orang pmbunoh di-kasikan pada kamu, |
3:15 | dan kamu sudah bunoh Raja kahidopan; yang Allah sudah bangkitkan deri antara orang mati; dan kita mnjadi saksi deri-hal itu. |
3:16 | Dan sbab iman dalam nama-nya, ini orang yang kamu tengok dan knal sudah di-kuatkan oleh nama-nya: ya, iman yang datang oleh Isa sudah kasi dia ini sehat yang smpurna di hadapan kamu smoa. |
3:17 | Dan skarang, sudara-sudara, sahya tahu kamu sudah buat itu dalam hal kamu t'ada tahu, dan pnghulu-pnghulu-mu pun bgitu juga. |
3:18 | Ttapi bgini-lah sudah sampai smoa perkara yang Allah sudah khabarkan dhulu dngan mulut nabi-nabi, yang Almaseh-nya nanti kna sngsara. |
3:19 | Sbab itu biar-lah kamu bertaubat dan berbalek, spaya dosa-dosa kamu boleh di-hapuskan, dan spaya ktika yang bri sgar itu boleh datang deri-pada hadlrat Tuhan; |
3:20 | dan spaya dia boleh hantarkan Almaseh yang sudah di-tntukan lbeh dhulu kerna kamu, ia'itu Isa: |
3:21 | dia yang shorga msti trima sampai itu ktika bila smoa perkara di-btulkan s-mula, yang Allah sudah kata dngan mulut nabi-nabi yang suchi, yang sudah ada deri-pada asal. |
3:22 | Musa juga sudah kata, 'Tuhan-mu Allah nanti angkatkan kerna kamu deri antara sudara-sudara-mu satu nabi, sperti sahya ini; dngar-lah sama dia dalam smoa yang dia nanti kata sama kamu. |
3:23 | Dan nanti jadi, barang-siapa yang t'ada dngar sama itu nabi, dia nanti kna habis binasa deri antara bangsa ini.' |
3:24 | Dan smoa nabi-nabi deri-pada Samu'el dan yang datang kmdian, s-brapa orang yang sudah berchakap, smoa sudah khabarkan deri-hal ini ktika. |
3:25 | Kamu-lah anak nabi-nabi itu, dan waris perjanjian yang Allah sudah janji dngan kamu punya nenek-moyang, serta berkata k-pada Ibrahim, 'Dalam angkau punya bneh sgala bangsa dunia ini nanti dapat berkat.' |
3:26 | Allah sudah angkatkan Hamba-nya, dan hantarkan dia pada kamu terlbeh dhulu, spaya bawa berkat pada kamu dalam hal dia balekkan kamu masing-masing deri-pada kjahatanmu." |