22:1 | "Hei sgala sudara, dan ngchek-ngchek, dngar-lah jawab yang skarang sahya kasi sama kamu." |
22:2 | Bila dia-orang dngar dia berchakap dalam bhasa Ibrani, dia-orang lagi snnyap: dan dia kata, |
22:3 | "Sahya orang Yahudi, peranakan Tarsus di tanah Kilikiah, ttapi di-pliharakan dalam ini negri, dan sudah blajar sama Gamali'el, serta dapat plajaran ikut hukum-hukum nenek-moyang kita dngan btul-btul skali, dan sahya rajin kerna Allah, sama sperti kamu smoa ini hari: |
22:4 | dan sahya sudah aniayakan ini Jalan sampai bunoh orang, dan sahya ikat dan masokkan dalam jel baik jantan baik prempuan pun. |
22:5 | Dan imam bsar pun boleh kasi saksi fasal ini, dan s-gnap majlis bichara pun: kerna deri-pada dia-orang sahya sudah trima surat k-pada sudara-sudara itu, dan sahya sudah berjalan pergi Damsek, mau bawa orang-orang yang ada di sana pergi Yerusalim dngan terikat, spaya kna seksa. |
22:6 | Dan sudah jadi, ktika sahya berjalan dan mau dkat Damsek, ada tngah hari bgitu, dngan s-kjapan ada satu trang yang bsar datang deri langit berchahya-chahya kliling sahya. |
22:7 | Dan sahya jatoh di tanah, serta dngar suara yang kata sama sahya, 'Sa'ul, Sa'ul, knapa angkau aniayakan sahya?' |
22:8 | Sahya jawab, 'Siapa-kah tuan ini?' Dan dia kata sama sahya, 'Sahya-lah Isa orang Nasarat, yang angkau aniayakan.' |
22:9 | Orang-orang yang ada sama-sama sahya tengok itu trang, ttapi t'ada dngar suara dia yang berchakap sama sahya. |
22:10 | Dan sahya kata, 'Ya Tuhan, apa-kah sahya msti buat?' Dan Tuhan kata sama sahya, 'Bangun, dan pergi masok Damsek; dan di sana nanti orang kata sama angkau deri-hal smoa perkara yang sudah di-tntukan spaya angkau buat.' |
22:11 | Dan sdang sahya ta'boleh nampak deri sbab itu trang punya kmulia'an, orang yang ikut sahya pimpin sahya punya tangan, dan bgini sahya sampai di Damsek. |
22:12 | Dan ada satu orang bernama Hananiah, yang berbakti sperti hukum-taurit, dan yang ada nama baik antara smoa orang Yahudi yang tinggal di situ, |
22:13 | dia ini datang berdiri sblah sahya, serta kata, 'Sudara Sa'ul, biar-lah angkau nampak s-mula.' Dan itu jam juga sahya sudah boleh nampak, dan sahya tengok dia. |
22:14 | Dan dia kata sama sahya, 'Allah nenek-moyang kita sudah tntukan angkau mau tahu kahandak-nya, mau tengok Orang Bnar itu, dan mau dngar bunyi suara-nya. |
22:15 | Kerna angkau nanti mnjadi saksi atas dia k-pada smoa orang deri-hal apa-apa yang angkau sudah tengok dan dngar. |
22:16 | Skarang apa kna nanti lagi? bangun, dan trima baptis, dan chuchikan dosa-dosa angkau, sambil triak dia punya nama.' |
22:17 | Bila sahya sudah pulang di Yerusalim, dan waktu sahya minta do'a dalam ka'abah, sahya naik pengsan, |
22:18 | serta nampak Tuhan kata sama sahya, 'Chpat-chpat, dan lkas kluar deri Yerusalim: sbab dia-orang t'ada nanti trima angkau punya ksaksian deri-hal sahya.' |
22:19 | Dan sahya kata, 'Ya Tuhan, dia-orang sndiri tahu yang smoa orang yang perchaya sama Tuhan sahya sudah masokkan jel, dan palukan dalam rumah smbahyang: |
22:20 | dan bila tertumpah darah Stifanus, Tuhan punya saksi itu, sahya pun ada berdiri dkat situ dngan berknan, dan sahya simpankan baju orang yang bunoh dia.' |
22:21 | Ttapi dia kita sama sahya, 'Angkau pergi-lah: kerna sahya mau suroh angkau pergi jauh-jauh k-pada orang bangsa-asing.'" |
22:22 | Dia-orang dngar juga sama dia sampai ini perkata'an, bharu dia-orang bsarkan suara dan bertriak, "Ini macham punya orang, kasi dia hilang deri dunia: kerna t'ada patut dia msti hidop." |
22:23 | Dan waktu dia-orang bertriak-triak, serta buangkan pakaian-nya dan lempar habok di langit, |
22:24 | itu panglima suroh orang bawa Paulus dalam kota, dan psan orang preksa sama dia dngan ssah, spaya dapat tahu apa sbab-nya orang-orang itu bertriak-triak sama dia bgitu. |
22:25 | Bila dia-orang sudah ikatkan dia dngan tali kulit, Paulus kata sama itu hulubalang yang berdiri dkat situ, "Kalau satu anak Rom blum kna hukum, ada-kah patut angkau ssahkan dia?" |
22:26 | Bila hulubalang dngar itu, dia pergi sama itu panglima, dan bilangkan dia, serta kata, "Apa tuan mau buat? kerna dia ini anak Rom." |
22:27 | Dan itu panglima datang k-pada Paulus dan kata sama dia, "Bilang sama sahya, ya-kah angkau anak Rom?" Paulus jawab, "Ya." |
22:28 | Panglima jawab, "Sahya sudah bli ini pangkat anak Rom dngan herga yang bsar." Paulus pula jawab, "Ttapi sahya ini peranakan." |
22:29 | Jadi itu juga smoa orang yang mau preksa sama Paulus undur deri-pada dia: dan itu panglima pun naik ktakotan bila dia dngar yang Paulus anak Rom, sbab dia sudah ikat sama dia. |
22:30 | Ttapi besok-nya, sbab dia mau tahu dngan tntu knapa-kah Paulus sudah kna d'awa oleh orang Yahudi, dia kasi dia lpas, dan suroh kpala-kpala imam dan s-gnap majlis bichara berhimpon, dan dia bawa turun Paulus di dpan dia-orang smoa. |