14:1 | Dan sudah jadi di Ikonium yang dia-orang masok bersama-sama dalam rumah smbahyang orang Yahudi dan mngajar, sampai banyak orang Yahudi dan orang Grik pun perchaya. |
14:2 | Ttapi orang Yahudi yang ta'mau turut, usutkan dan panaskan orang bangsa-asing mlawan sudara-sudara itu. |
14:3 | Sbab itu lama juga itu dua rasul tinggal di situ, dan mngajar dngan brani, serta bergantong k-pada Tuhan, yang saksikan perkata'an anugrah-nya dngan kasi tanda-tanda dan perkara hairan oleh tangan dia-orang. |
14:4 | Ttapi sgala orang banyak dalam negri sudah berbhagi dua, s-tngah k-pada orang Yahudi, s-tngah k-pada rasul-rasul. |
14:5 | Dan bila orang bangsa-asing dan orang Yahudi pun dngan pnghulu-pnghulu-nya sudah pakat mau aniayakan dan hntam batu sama dia-orang, |
14:6 | rasul-rasul dapat tahu deri-hal itu, dan lari pergi negri-negri di tanah Luka'oniah, ia'itu Lustra dan Darbi, dan jajahan yang kliling, |
14:7 | dan di sana dia-orang khabarkan injil. |
14:8 | Di Lustra ada satu orang yang dudok dngan kaki lmah, s'orang yang tempang deri-pada prot mak-nya, blum pernah berjalan. |
14:9 | Ini orang dngar Paulus berchakap: dan Paulus mrnong sama dia, dan tengok yang dia ada perchaya yang dia boleh di-smbohkan: |
14:10 | sbab itu dia kata dngan suara yang bsar, "Bangun, dan berdiri btul pada angkau punya kaki." Dan dia berlompat dan berjalan. |
14:11 | Bila orang banyak tengok apa Paulus sudah buat, dia-orang bsarkan dia-orang punya suara, dan kata dalam bhasa Luka'oniah, "Dewa-dewa sudah jlma jadi manusia, dan turun k-pada kita." |
14:12 | Bar-nabas dia-orang namakan Zius, dan Paulus dia-orang namakan Hermes, sbab dia-lah kpala chakap. |
14:13 | Dan itu imam rumah-datok Zius, yang di luar negri itu, bawa lmbu-lmbu dan karangan bunga di pintu negri, maksud-nya mau buat korban sama-sama orang-banyak. |
14:14 | Ttapi bila rasul-rasul, ia'itu Bar-nabas sama Paulus, dngar deri-hal itu, dia-orang koyakkan dia-orang punya pakaian, dan lari antara orang-banyak, serta bertriak dan kata, |
14:15 | "Hei tuan-tuan, knapa kamu buat bgini? Kita pun manusia juga, satu tabi'at sama kamu, dan kita bawa khabar yang baik, spaya kamu berbalek deri-pada ini perkara yang sia-sia k-pada Allah yang hidop, yang sudah jadikan langit dan bumi dan lautan, dngan smoa yang ada dalam-nya: |
14:16 | dan dalam jman yang sudah lalu Allah biarkan sgala bangsa turut dia-orang sndiri punya jalan. |
14:17 | Ttapi dalam pada itu bukan dia t'ada tinggalkan satu ktrangan deri-hal diri-nya, kerna dia sudah buat baik, dan sudah kasi kamu deri langit hujan dan musim-buah, serta knnyangkan hati kamu dngan jerki dan ksuka'an." |
14:18 | Dngan ini perkata'an pun susah juga dia-orang tahankan orang-banyak kasi korban sama dia-orang. |
14:19 | Ttapi datang pula brapa orang Yahudi deri Antakiah dan Ikonium: dan bila dia-orang sudah pujok orang-orang banyak, dia-orang hntam batu sama Paulus, dan seret dia kluar negri, kerna dia-orang fikir dia sudah mati. |
14:20 | Ttapi waktu murid-murid berdiri kliling dia, dia bangun dan masok negri, dan besok dia kluar pergi Darbi sama-sama Bar-nabas. |
14:21 | Dan bila dia-orang sudah khabarkan injil pada itu negri, dan jadikan banyak anak-murid, dia-orang pulang di Lustra dan Ikonium dan Antakiah, |
14:22 | serta ttapkan murid-murid punya hati, dan nasihatkan dia-orang tinggal ttap dalam agama itu, dan lagi dngan kna banyak ksusahan kita msti masok kraja'an Allah. |
14:23 | Dan bila dia-orang sudah tntukan ktua-ktua dalam tiap-tiap eklisia, serta minta do'a dngan berpuasa, dia-orang srahkan orang-orang itu k-pada Tuhan, yang dia-orang sudah perchaya. |
14:24 | Bila dia-orang sudah jalan trus tanah Pisidiah, dia-orang sampai tanah Pamfuliah, |
14:25 | dan dia-orang khabarkan perkata'an itu di Perga, habis itu turun di Attaliah, |
14:26 | dan deri sana blayer pergi Antakiah, tmpat di mana dia-orang mula-mula sudah di-srahkan k-pada anugrah Allah spaya buat pkerja'an yang dia-orang bharu habiskan. |
14:27 | Dan bila sudah sampai di sana, dia-orang himponkan s-gnap eklisia, dan chritakan sgala perkara yang Allah sudah jadikan dngan dia-orang, dan bagimana Allah sudah bukakan satu pintu iman k-pada orang bangsa-asing. |
14:28 | Dan lama juga dia-orang tinggal sama murid-murid di situ. |