13:1 | Di Antakiah, dalam eklisia yang di situ, ada brapa nabi-nabi dan guru-guru, ia'itu Bar-nabas, dan Simion yang berglar Niger, dan Lukius orang Kurini, dan Manahim sudara-susu raja Herodis, dan Sa'ul. |
13:2 | Dan ktika dia-orang smbahyang sama Tuhan dan berpuasa, Roh Alkudus kata, "Asingkan kerna sahya Bar-nabas dan Sa'ul sbab itu pkerja'an yang sahya sudah panggil dia-orang buat." |
13:3 | Habis itu, bila dia-orang sudah puasa dan minta do'a dan taroh tangan atas dia dua-dua, dia-orang lpaskan dia pergi. |
13:4 | Ini dua orang, sbab di-hantarkan oleh Roh Alkudus, sudah pergi negri Salukiah, dan deri sana dia-orang blayer di Pulau Kuprus. |
13:5 | Dan bila sudah sampai di Salamis, dia-orang khabarkan perkata'an Allah dalam rumah smbahyang orang Yahudi: dan Yahya pun ada ikut dan tolong sama dia-orang. |
13:6 | Bila dia-orang sudah jalan satu pulau itu, sampai di Pafus, dia-orang jumpa satu orang yang pakai obat-guna, ia'itu nabi dusta, orang Yahudi, bernama Bar-yush'a. |
13:7 | Dia ada sama-sama itu gobernor, Sergius Paulus, satu orang yang berakal. Ini orang panggil Bar-nabas sama Sa'ul, dan minta dngar perkata'an Allah. |
13:8 | Ttapi Ilumas, orang obat-guna itu (kerna itu-lah nama-nya kalau tersalin), mlawan dia-orang, maksud-nya mau kasi itu gobernor balek deri-pada ini agama. |
13:9 | Ttapi Sa'ul, yang di-glarkan Paulus juga, pnoh dngan Roh Alkudus, mrnong sama dia, |
13:10 | dan kata, "Hei angkau yang pnoh dngan sgala tipu-daya dan sgala pkerja'an yang hina, anak iblis dan musoh sgala yang bnar, t'ada-kah angkau mau brenti ssatkan jalan Tuhan yang btul itu? |
13:11 | Tengok, skarang juga Tuhan punya tangan ada atas angkau, dan angkau nanti jadi buta, t'ada boleh tengok matahari sdikit waktu." Dan dngan s-kjapan datang klam-kabot atas dia, dan dia mraba-raba chari orang pimpinkan tangan-nya. |
13:12 | Bila itu gobernor tengok ini perkara dia perchaya, serta hairan sama pngajaran Tuhan. |
13:13 | Paulus sama orang-orang yang bserta dngan dia blayer deri Pafus, dan sampai Perga yang di tanah Pamfuliah: dan Yahya tinggalkan dia-orang, pulang Yerusalim. |
13:14 | Ttapi dia-orang berjalan deri Perga, dan sampai di Antakiah yang di tanah Pisidiah, dan masok rumah smbahyang waktu hari perhentian, dan dudok. |
13:15 | Bila sudah habis bacha taurit dan surat nabi-nabi, kpala-kpala rumah smbahyang suroh orang pergi k-pada dia-orang, dan kata, "Hei sudara-sudara, jikalau kamu ada nasihat kerna bangsa ini, kamu chakap-lah." |
13:16 | Dan Paulus berdiri, dan lambai dngan tangan-nya, serta kata, "Hei orang Isra'el, dan orang yang takot Allah, dngar-lah. |
13:17 | Allah Tuhan bangsa ini sudah pileh kita punya nenek-moyang, dan sudah tinggikan ini bangsa ktika dia-orang tumpang di tanah Masir, dan sudah bawa dia-orang kluar deri sana dngan tangan yang berkuasa. |
13:18 | Dan ada lbeh kurang ampat-puloh tahun punya lama dia sabarkan dia-orang punya klakuan dalam tanah-sunyi. |
13:19 | Dan bila dia sudah binasakan tujoh bangsa di tanah Kana'an, dia kasikan dia-orang punya tanah mnjadi satu psaka, ada lbeh kurang ampat-ratus lima-puloh tahun punya lama: |
13:20 | kmdian deri-pada ini perkara smoa, dia kasi dia-orang hakim-hakim sampai nabi Samu'el. |
13:21 | Habis itu, dia-orang minta satu raja pula: dan Allah kasi dia-orang Sa'ul anak Kis, orang suku-bangsa Binyamin, ampat-puloh tahun punya lama. |
13:22 | Dan bila dia sudah tolakkan Sa'ul dia angkatkan Da'ud mnjadi dia-orang punya raja: dan fasal dia Tuhan sudah bersaksi, dan kata, 'Sahya sudah dapat Da'ud anak Yishai, satu orang yang berknan pada hati sahya, dia-lah nanti buat smoa kahandak sahya. |
13:23 | Deri-pada ini orang punya kturunan, mnurut perjanjian, Allah sudah bawa k-pada orang Isra'el satu Juru-slamat ia'itu Isa. |
13:24 | Dhulu deri-pada Isa datang, Yahya sudah khabarkan baptisan tobat k-pada s-gnap bangsa Isra'el. |
13:25 | Dan ktika Yahya sudah mau habiskan pkerja'an-nya, dia kata, 'Apa-kah kamu fikir sahya ini? Sahya bukan Almaseh itu. Ttapi tengok, ada satu orang yang datang kmdian deri-pada sahya, dan sahya t'ada layak bukakan kasut deri-pada kaki-nya.' |
13:26 | Sudara-sudara, kturunan Ibrahim, dan barang siapa antara kamu yang takot Allah, k-pada kita-lah ini perkata'an slamat sudah sampai. |
13:27 | Kerna sgala orang yang tinggal di Yerusalim, dan dia-orang punya pnghulu-pnghulu sudah bnarkan perkata'an nabi-nabi yang di-bacha tiap-tiap hari perhentian, bila dia-orang hukumkan Isa, sbab ta'tahu perkata'an nabi-nabi itu atau Isa pun. |
13:28 | Dan mski pun dia-orang t'ada dapat satu sbab yang dia patut mati, ttapi dia-orang minta Pilatus spaya dia boleh kna bunoh. |
13:29 | Dan bila dia-orang sudah habis buat smoa perkara yang sudah tertulis deri-hal dia, dia-orang bawa dia turun deri atas kayu itu, dan taroh dia dalam kubor. |
13:30 | Ttapi Allah bangkitkan dia deri antara orang mati. |
13:31 | Dan ada brapa hari punya lama dia sudah ternampak k-pada orang-orang yang ikut sama dia deri Galil pergi Yerusalim; ini smoa-lah skarang mnjadi dia punya saksi k-pada bangsa ini. |
13:32 | Dan kita bawa k-pada kamu khabar yang baik, ia'itu perjanjian yang sudah di-janji pada nenek-moyang kita, |
13:33 | bagimana Allah sudah sampaikan itu perjanjian pada kita punya anak-buah, dalam hal dia bangkitkan Isa; sperti yang tersurat dalam mazmur nombor dua, 'Angkau-lah Anak sahya, ini hari sahya sudah beranakkan angkau.' |
13:34 | Dan deri-hal Allah sudah bangkitkan dia deri antara orang mati, spaya jangan dia balek k-pada busok, bgini dia sudah kata, 'Sahya nanti kasi kamu sgala berkat yang suchi dan kperchaya'an yang sudah di-janjikan k-pada Da'ud.' |
13:35 | Itu sbab-lah dia ada kata dalam lain mazmur, 'Tuhan t'ada nanti biarkan Yang Kudus-mu itu mnjadi busok.' |
13:36 | Kerna Da'ud, bila dia sudah jadi hamba k-pada kahandak Allah dalam dia punya jman, dia tidor, dan orang sudah tarohkan dia sama-sama dia punya nenek-moyang, dan dia jadi busok: |
13:37 | ttapi dia itu yang Allah sudah bangkitkan t'ada mnjadi busok. |
13:38 | Sbab itu biar-lah kamu tahu, sudara-sudara, yang oleh ini orang-lah ampun dosa ada di-khabarkan: |
13:39 | dan oleh dia-lah barang-siapa yang perchaya nanti di-bnarkan dalam hal sgala perkara-yang kamu ta'boleh di-bnarkan oleh hukum-taurit Musa. |
13:40 | Sbab itu ingat baik-baik spaya jangan jadi atas kamu sperti ada tersbot dalam surat nabi-nabi: |
13:41 | 'Tengok-lah, kamu yang hinakan orang, jadi-lah hairan, dan hilang: Kerna pada jman kamu juga sahya kerjakan satu pkerja'an, Satu pkerja'an yang t'ada skali-kali kamu nanti perchaya, kalau orang trangkan sama kamu pun.'" |
13:42 | Serta Paulus dan Bar-nabas kluar, dia-orang minta spaya ini perkata'an smoa boleh di-ajarkan k-pada dia-orang hari-perhentian yang datang. |
13:43 | Bila itu perhimponan sudah berpchah, banyak orang Yahudi dan orang mu'alaf yang berbakti ikut sama Paulus dan Bar-nabas; dan dua-dua itu berchakap sama dia-orang, dan nasihatkan dia-orang tinggal ttap dalam Tuhan Allah punya anugrah. |
13:44 | Dan hari perhentian yang datang, hampir-hampir s-gnap negri punya orang sudah datang berhimpon, mau dngar perkata'an Allah. |
13:45 | Ttapi bila orang Yahudi tengok orang-orang banyak itu, pnoh-lah hati dia-orang dngan dngki, dan dia-orang bertngkar fasal perkara-perkara yang Paulus sudah kata, dan dia-orang mngumpat-umpat. |
13:46 | Dan Paulus sama Bar-nabas berchakap dngan brani, dan kata, "S-patut-nya perkata'an Allah di-katakan k-pada kamu dhulu; ttapi sbab kamu sudah tolakkan itu, dan sudah bilangkan diri kamu t'ada layak trima hidop yang kkal baik-lah, kita balek k-pada orang bangsa-asing. |
13:47 | Kerna bgitu-lah Tuhan sudah kasi hukum, kata-nya, 'Sahya sudah tntukan angkau mnjadi satu trang k-pada sgala bangsa-asing, Spaya angkau bawa slamat sampai hujong bumi.'" |
13:48 | Dan bila orang bangsa-asing dngar ini, dia-orang suka hati, dan muliakan perkata'an Allah, dan s-brapa banyak orang yang sudah di-tntukan k-pada hidop yang kkal perchaya-lah. |
13:49 | Dan perkata'an Tuhan jadi mashhur pada sluroh jajahan itu. |
13:50 | Ttapi orang Yahudi usutkan prempuan-prempuan yang berbakti dan yang berpangkat, dan orang bsar-bsar negri itu, dan jadikan satu aniaya atas Paulus dan Bar-nabas, dan halaukan dia-orang kluar deri smpadan-nya. |
13:51 | Ttapi dua-dua itu kbaskan habok deri-pada kaki-nya, mnjadi satu ksaksian atas orang-orang itu, dan dia-orang berjalan sampai di Ikonium. |
13:52 | Dan murid-murid itu pnoh-lah dngan ksuka'an dan dngan Roh Alkudus. |