2:1 | Bila Isa sudah di-beranakkan di negri Bait-Lahim di tanah Yahudiah, jman raja Herodis, ada brapa orang Majus deri sblah timor datang di negri Yerusalim, |
2:2 | dan kata, "Mana dia itu yang bharu beranak jadi raja orang Yahudi? kerna kita sudah tengok dia punya bintang di negri timor, dan kita datang mau smbah sama dia." |
2:3 | Bila raja Herodis dngar itu, hati-nya terkachau, dan satu Yerusalim punya orang pun sama-sama. |
2:4 | Dan bila dia sudah kumpolkan smoa kpala-kpala imam dan orang pnulis bangsa itu, dia tanya dia-orang di mana-kah Almaseh itu nanti jadi. |
2:5 | Dan dia-orang kata sama dia, "Dalam negri Bait-Lahim di tanah Yahudiah: kerna bgini-lah sudah tersurat oleh nabi: |
2:6 | 'Hei Bait-Lahim di tanah Yahuda, Skali-kali bukan angkau yang kchil skali di antara kpala Yahuda: Kerna deri-pada angkau nanti kluar satu pnghulu, Yang nanti gombalakan sahya punya bangsa Isra'el.'" |
2:7 | Habis itu Herodis diam-diam panggil itu orang Majus, dan preksa baik-baik deri-pada dia-orang bila-kah waktu yang itu bintang sudah ternampak. |
2:8 | Dan dia suroh dia-orang pergi Bait-Lahim, dan kata, "Pergi-lah preksa baik-baik deri-hal ini anak kchil; dan bila sudah dapat, kasi khabar sama sahya, spaya sahya pun boleh pergi smbah sama dia." |
2:9 | Bila dia-orang sudah dngar apa raja kata, dia-orang berjalan; dan itu bintang pula yang dia-orang sudah tengok di negri timor berjalan lbeh dhulu dia-orang, sampai dia datang dan brenti di atas tmpat di mana anak kchil itu ada. |
2:10 | Bila dia-orang tengok itu bintang, dia-orang suka-hati dngan sangat ksuka'an. |
2:11 | Dan dia-orang masok itu rumah, dan tengok anak kchil itu sama-sama dia punya mak Mariam: dan dia-orang berlutut dan smbah sama dia; dan bila dia-orang sudah buka mata-bnda-nya, dia-orang kasi anak kchil itu pmbrian, ia'itu mas dan kmnyian dan mur. |
2:12 | Dan sbab Allah sudah larangkan dia-orang dalam satu mnimpi jangan balek sama Herodis, dia-orang pulang negri-nya sndiri ikut lain jalan. |
2:13 | Bila dia-orang sudah pergi, satu mla'ikat Tuhan ternampak k-pada Yusof dalam satu mnimpi, dan kata, "Bangun-lah angkau, dan ambil itu anak kchil sama dia punya mak, dan lari pergi Masir, dan di sana angkau boleh tinggal sampai sahya kata sama angkau: kerna Herodis nanti chari itu anak kchil mau binasakan dia." |
2:14 | Dan dia bangun, dan ambil itu anak kchil sama dia punya mak tempo malam, dan berjalan pergi Masir; |
2:15 | dan dia ada di sana sampai Herodis sudah mati: spaya bnarkan itu perkata'an Tuhan oleh nabi bgini: "Deri Masir sahya sudah panggil sahya punya anak." |
2:16 | Habis itu, bila Herodis sudah dapat tahu yang orang Majus itu sudah tipu sama dia, dia jadi sangat marah, dan suroh orang pergi bunoh smoa budak-budak dlaki yang ada di Bait-Lahim dan smoa tmpat kliling situ, yang ada umor dua tahun dan kurang deri-pada itu, ikut itu waktu yang dia sudah preksa baik-baik deri-pada orang Majus. |
2:17 | Dan itu waktu sudah di-bnarkan perkata'an nabi Armia bgini, |
2:18 | "Terdngar-lah satu suara di negri Ramah, Orang mratap dan mnangis terlalu banyak, Ia'itu Rahil mnangiskan anak-anak-nya; Dan ta'mau di-hiburkan, sbab anak-nya sudah t'ada." |
2:19 | Ttapi bila Herodis sudah mati, satu mla'ikat Tuhan ternampak k-pada Yusof di Masir dalam satu mnimpi, |
2:20 | dan kata, "Bangun-lah angkau, dan ambil itu anak kchil sama dia punya nyawa, dan pergi tanah Isra'el; kerna orang yang mau ambil itu anak punya nyawa smoa-nya sudah mati." |
2:21 | Dan dia bangun dan ambil itu anak kchil sama dia punya mak, dan pergi tanah Isra'el. |
2:22 | Ttapi bila dia dngar yang Arkhila'us jadi raja di tanah Yahudiah ganti dia punya bapa Herodis, dia takot mau pergi sana: dan sbab Allah sudah larangkan dia dalam satu mnimpi, dia undor masok jajahan Galil, |
2:23 | dan datang tinggal dalam satu negri yang bernama Nasarat, spaya bnarkan perkata'an nabi-nabi, "Dia nanti di-glarkan orang Nasarat." |