| 5:1 | Barang-siapa perchaya yang Isa itu Almaseh, itu orang sudah di-peranakkan deri-pada Allah: dan barang-siapa yang kaseh sama dia yang sudah beranakkan, itu orang kaseh sama dia yang sudah di-beranakkan deri-pada dia. |
| 5:2 | Kita boleh tahu yang kita ada kaseh sama anak-anak Allah dngan ini, ia'itu bila kita kaseh sama Allah, dan ada buat dia punya hukum-hukum. |
| 5:3 | Kerna ini-lah kaseh Allah: ia'itu yang kita simpan dia punya hukum-hukum; dan dia punya hukum-hukum bukan-nya brat. |
| 5:4 | Kerna apa-apa yang di-beranakkan deri-pada Allah kalahkan dunia ini: dan ini-lah kmnangan yang kalahkan dunia ini, ia'itu kita punya perchaya. |
| 5:5 | Dan siapa-kah yang kalahkan ini dunia, kalau tidak itu orang yang perchaya yang Isa itu Anak Allah? |
| 5:6 | Ini-lah dia yang datang dngan ayer dan darah, ia'itu Isa Almaseh; bukan saja dngan ayer, ttapi dngan ayer dan dngan darah pun. |
| 5:7 | Dan roh itu-lah yang bersaksi, kerna Roh itu dia-lah kbtulan. |
| 5:8 | Kerna ada tiga yang bersaksi, ia'itu Roh, dan ayer, dan darah, dan itu tiga ada s-tuju. |
| 5:9 | Jikalau kita trima manusia punya ksaksian, Allah punya ksaksian pula lbeh bsar: kerna ini-lah ksaksian Allah, ia'itu yang dia sudah bersaksi deri-hal Anak-nya. |
| 5:10 | Orang yang perchaya sama Anak Allah ada ksaksian itu dalam diri-nya: orang yang ta'perchaya sama Allah sudah buat dia satu pmbohong; kerna itu orang t'ada perchaya itu ksaksian yang Allah sudah saksikan deri-hal Anak-nya. |
| 5:11 | Dan ini-lah ksaksian-nya, ia'itu Allah sudah kasi sama kita hidop yang kkal, dan ini hidop ada dalam Anak-nya. |
| 5:12 | Orang yang ada Anak itu, ada itu hidop: orang yang tidak ada Anak Allah, tidak ada itu hidop. |
| 5:13 | Ini smoa sahya sudah tulis k-pada kamu, spaya kamu boleh tahu yang kamu ada hidop yang kkal, ia'itu k-pada kamu yang perchaya sama nama Anak Allah. |
| 5:14 | Dan ini-lah kita punya brani-hati k-pada Tuhan, ia'itu jikalau kita minta apa-apa sperti dia punya kahandak, dia dngar sama kita: |
| 5:15 | dan jikalau kita tahu yang dia dngar apa-apa kita minta, kita tahu juga yang kita dapat sgala perminta'an yang kita sudah minta sama dia. |
| 5:16 | Jikalau satu orang tengok sudara-nya buat dosa yang t'ada bawa mati, baik dia berdo'a, dan Allah nanti kasi sama dia hidop, k-pada orang-orang yang buat dosa yang t'ada bawa mati. Ada juga dosa yang bawa mati: bukan fasal ini punya dosa yang sahya kata dia boleh minta. |
| 5:17 | Tiap-tiap ksalahan itu-lah dosa: dan ada pula dosa yang t'ada bawa mati. |
| 5:18 | Kita tahu yang barang-siapa di-beranakkan deri-pada Allah, dia itu t'ada buat dosa; ttapi yang sudah di-beranakkan deri-pada Allah simpankan dia, dan si jahat itu t'ada jamah dia. |
| 5:19 | Kita tahu yang kita ini deri-pada Allah, dan s-gnap dunia ini dudok dalam kuasa si jahat itu. |
| 5:20 | Dan kita tahu juga yang Anak Allah sudah datang, dan sudah kasi kita pngertian, spaya kita boleh knal sama dia yang btul itu, dan kita ada dalam dia yang btul itu, ia'itu dalam Anak-nya, Isa Almaseh. Ini-lah Allah yang btul, dan hidop yang kkal. |
| 5:21 | Hei anak-anak kchil, jaga-lah diri kamu deri-pada datok-datok. |
1 John 5 - Alkitab Melayu Baba
