2:1 | Hei anak-anak kchil, ini smoa sahya tulis k-pada kamu spaya kamu jangan buat dosa. Dan jikalau barang-siapa buat dosa, kita ada satu Pnolong sama Bapa, ia'itu Isa Almaseh yang bnar itu: |
2:2 | dan dia-lah korban perdamaian kerna dosa-dosa kita, dan bukan saja kerna kita punya, ttapi kerna satu isi dunia punya pula. |
2:3 | Dalam ini hal-lah kita tahu yang kita ada knal sama dia, ia'itu jikalau kita simpan dia punya hukum-hukum. |
2:4 | Orang yang kata, "Sahya knal sama dia," dan t'ada pula simpan hukum-hukum-nya, dia itu satu pmbohong, dan kbtulan itu tidak ada dalam dia: |
2:5 | ttapi barang-siapa simpan perkata'an-nya, btul-lah dalam dia kaseh Allah sudah di-smpurnakan. Dalam ini hal-lah kita tahu yang kita ada dalam dia: |
2:6 | orang yang kata diri-nya ada tinggal dalam dia, patut sndiri berjalan sama sperti Almaseh sudah berjalan. |
2:7 | Hei sgala kkaseh, bukan-nya hukum bharu yang sahya ada tulis k-pada kamu, ttapi lama punya hukum yang kamu sudah ada deri mula-mula: itu hukum lama, ia'itu perkata'an yang kamu sudah dngar itu. |
2:8 | Ada pula satu hukum bharu yang sahya tulis k-pada kamu, dan ini hukum ada btul dalam dia punya hal dan dalam kamu punya; kerna glap itu ada hilang, dan trang yang btul itu mula'i berchahya. |
2:9 | Orang yang katakan diri-nya ada dalam trang, ttapi bnchi dia punya sudara, itu orang ada dalam glap lagi sampai ini skarang. |
2:10 | Orang yang kaseh sama sudara-nya itu tinggal dalam trang, dan dalam itu orang t'ada batu terantok. |
2:11 | Ttapi orang yang bnchi sudara-nya, dia ada dalam glap, dan berjalan pun dalam glap, dan dia ta'tahu di mana dia ada pergi, kerna glap itu sudah butakan mata-nya. |
2:12 | Sahya ada tulis k-pada kamu, hei anak-anak kchil, sbab kamu punya dosa-dosa sudah di-ampunkan kerna nama Almaseh. |
2:13 | Dan sahya tulis k-pada kamu, hei bapa-bapa, sbab kamu sudah knal sama dia yang sudah ada deri mula-mula. Dan sahya ada tulis k-pada kamu, hei orang muda-muda, sbab kamu sudah kalahkan si jahat itu. Sahya sudah tulis k-pada kamu, hei budak-budak kchil, sbab kamu knal sama Bapa. |
2:14 | Sahya sudah tulis k-pada kamu, hei bapa-bapa, sbab kamu sudah knal sama dia yang sudah ada deri mula-mula. Sahya sudah tulis k-pada kamu, hei orang muda-muda, sbab kamu kuat, dan perkata'an Allah tinggal dalam kamu, dan kamu sudah kalahkan si jahat itu. |
2:15 | Jangan-lah kaseh sama dunia ini, atau perkara-perkara yang ada dalam dunia. Jikalau barang-siapa kaseh sama dunia ini, Bapa punya kaseh tidak ada dalam itu orang. |
2:16 | Kerna s-lagi perkara yang ada dalam dunia ini, ia'itu k'inginan badan, k'inginan mata, dan kmewahan hidopan, smoa itu bukan deri-pada Bapa, mlainkan deri-pada dunia ini juga. |
2:17 | Dan dunia ini ada hilang, dngan k'inginan-nya: ttapi orang yang buat kahandak Allah dia kkal s-lama-lama-nya. |
2:18 | Hei budak-budak kchil, ini-lah waktu yang pnghabisan: dan sperti kamu sudah dngar yang Almaseh punya lawan itu nanti datang, bgitu-lah skarang pun banyak sudah terkluar Almaseh punya lawan itu; deri sbab itu kita tahu yang ini-lah waktu yang pnghabisan. |
2:19 | Orang-orang itu sudah kluar deri antara kita, ttapi dia-orang bukan deri antara kita; kerna jikalau dia-orang ada deri antara kita, tntu-lah dia-orang sudah ttap tinggal bersama-sama kita: ttapi dia-orang sudah kluar, spaya nyata yang bukan sklian-nya deri antara kita. |
2:20 | Ttapi kamu smoa sudah dapat kurnia deri-pada Yang Kudus itu, dan kamu tahu sgala perkara. |
2:21 | Bukan-nya sahya tulis k-pada kamu sbab kamu ini ta'tahu kbtulan itu, ttapi sbab kamu tahu, dan sbab t'ada satu bohong pun yang asal-nya deri-pada kbtulan itu. |
2:22 | Siapa-kah itu pmbohong, kalau tidak itu orang yang sangkalkan Isa, ia'itu yang dia bukan-nya Almaseh? Ini-lah Almaseh punya lawan, ia'itu dia yang sangkalkan Bapa dan Anak. |
2:23 | Barang-siapa sangkalkan Anak, dia-lah t'ada juga itu Bapa: orang yang mngaku Anak itu, dia ada juga itu Bapa. |
2:24 | Dan kamu ini, biar-lah apa yang kamu sudah dngar deri mula-mula itu tinggal dalam kamu. Jikalau apa yang kamu sudah dngar deri mula-mula itu tinggal dalam kamu, kamu pun nanti tinggal dalam Anak itu, dan dalam Bapa pun. |
2:25 | Dan ini-lah itu perjanjian yang dia sudah janji k-pada kita, ia'itu hidop yang kkal. |
2:26 | Sahya sudah tulis ini smoa k-pada kamu deri-hal orang-orang yang mau ssatkan kamu. |
2:27 | Dan kamu ini, itu kurnia roh yang kamu sudah trima deri-pada Allah ada tinggal dalam kamu, jadi ta'usah satu orang pun lagi ajar kamu; ttapi sperti itu kurnia ajarkan kamu deri-hal sgala perkara, dan itu kurnia ada btul, bukan bohong, dan sperti itu sudah ajarkan kamu, tinggal-lah dalam dia. |
2:28 | Skarang, hei anak-anak kchil, tinggal-lah dalam dia, spaya kalau dia di-nyatakan, kita boleh dapat brani, dan jangan jadi malu dpan dia waktu kdatangan-nya. |
2:29 | Jikalau kamu tahu yang dia itu ada bnar, kamu tahu juga yang masing-masing orang yang buat kbnaran itu di-beranakkan deri-pada dia. |