3:1 | Hei sgala kkaseh, ini-lah surat yang nombor dua sahya ada tulis k-pada kamu smoa; dan dalam dua-dua surat sahya bangunkan kamu punya ingatan yang tulus itu dalam hal sahya ingatkan kamu; |
3:2 | spaya kamu boleh ingat apa-apa perkata'an yang nabi-nabi yang kudus sudah lbeh dhulu chakapkan, dan boleh ingat Tuhan Juru-slamat kita punya psanan yang dia sudah kasi oleh kamu punya rasul-rasul: |
3:3 | dan mula-mula kamu msti tahu ini, ia'itu pada jman yang pnghabisan skali nanti datang orang-orang yang mngolok dngan olok-olok-nya, yang bawa diri ikut k'inginan-nya sndiri, |
3:4 | dan kata, "Di mana-kah itu perjanjian deri-hal kdatangan-nya? kerna deri tempo nenek-moyang kita sudah tidor, smoa perkara ada tinggal sama sperti deri mula-mula kjadian." |
3:5 | Kerna dngan sngaja itu orang-orang smoa lupakan ini satu perkara, ia'itu deri dhulu kala ada langit, dan ada bumi yang sudah di-jadikan deri-pada ayer dan dngan ayer, oleh perkata'an Allah; |
3:6 | dan dngan ayer juga itu jman punya dunia sudah binasa, sbab kna tngglam oleh ayer-bah: |
3:7 | ttapi oleh itu perkata'an juga ini langit yang skarang ada dan ini bumi pun sudah di-tarohkan kerna api, tersimpan sampai hari hukuman dan hari kbinasa'an orang yang t'ada kbaktian. |
3:8 | Ttapi, hei sgala kkaseh, ini satu perkara jangan-lah lupakan, ia'itu sama Tuhan satu hari ada sperti s-ribu tahun, dan s-ribu tahun sperti satu hari. |
3:9 | Tuhan bukan-nya lengah fasal perjanjian-nya, sperti ada orang sangkakan dia lengah; ttapi dia ada panjang-hati k-pada kamu, dan ta'mau satu orang pun binasa, ttapi spaya smoa orang boleh datang bertobat. |
3:10 | Ttapi hari Tuhan itu nanti datang sperti pnchuri bgitu; dan itu hari langit nanti hilang dngan satu bunyi yang bsar skali, dan sgala anasir nanti kna bakar dan hanchor, dan bumi dngan sgala kjadian yang di dalam-nya nanti kna hangus. |
3:11 | Jadi itu, sdang ini smoa msti di-hanchorkan bgini, apa macham-kah punya orang kamu patut jadi, dngan klakuan yang kudus dan kbaktian, |
3:12 | serta mnantikan dan lkaskan kdatangan hari Allah? dan deri sbab itu hari langit nanti kna apa dan hanchur, dan sgala anasir nanti bakar sampaikan lbur. |
3:13 | Ttapi, ikut dia punya perjanjian, kita ini nantikan langit yang bharu dan bumi yang bharu, yang di dalam-nya ada tinggal kbnaran. |
3:14 | Sbab itu, hei sgala kkaseh, sdang kamu ada mnantikan ini perkara smoa, usahakan diri kamu spaya boleh terjumpa dalam sjahtra, dngan t'ada berchachat dan t'ada berchla dpan dia. |
3:15 | Dan bilangkan Tuhan punya panjang-hati itu mndatangkan slamat; sama sperti kita punya sudara Paulus yang kkaseh itu sudah tulis k-pada kamu, sperti bijaksana yang sudah di-bri k-pada dia; |
3:16 | dan bgini juga dalam sgala surat-nya, di mana dia ada chakap fasal ini perkara smoa; dan dalam dia punya surat ada perkara-perkara yang susah mngerti, dan orang yang t'ada plajaran dan t'ada tgoh balek-balekkan, sama sperti dia-orang balekkan lain-lain kitab, sampai mndatangkan kbinasa'an atas dia-orang punya diri. |
3:17 | Sbab itu, hei sgala kkaseh, sdang kamu sudah tahu ini smoa lbeh dhulu, jaga baik-baik spaya jangan kamu pula kna hanyut sama-sama orang jahat punya ssat, dan jatoh deri-pada kamu punya hal yang tgoh. |
3:18 | Ttapi baik-lah kamu bertambah-tambah dalam anugrah, dan dalam pngtahuan Tuhan dan Juru-slamat kita Isa Almaseh. Mulia k-pada dia skarang dan sampai s-lama-lama-nya. Amin. |