| 1:1 | Deri-pada Petrus, rasul Isa Almaseh, datang k-pada sgala orang pilehan di antara orang-orang bertaburan yang mnumpang di Pontus, dan Galatiah, dan Kappadokiah, dan Asiah, dan Bituniah, |
| 1:2 | di-pileh sperti Bapa kita Allah sudah tahu dhulu, dan di-kuduskan oleh Roh itu, spaya kamu turut prentah dan di-rnjiskan dngan darah Isa Almaseh: biar-lah tambah-tambah k-pada kamu anugrah dan sjahtra. |
| 1:3 | Sgala puji k-pada Allah, ia'itu Tuhan kita Isa Almaseh punya Bapa, yang turut sperti dia punya ksian yang bsar itu sudah beranakkan kita s-mula sampai kita dapat satu harap yang hidop oleh kbangkitan Isa Almaseh deri antara orang mati, |
| 1:4 | mau dapat satu psaka yang ta'boleh binasa, dan t'ada chachat, dan t'ada nanti layu, tersimpan di dalam shorga kerna kamu, |
| 1:5 | yang ada di-pliharakan dngan kuasa Allah sbab perchaya, spaya kamu dapat slamat yang sdia mau di-nyatakan dalam jman yang pnghabisan. |
| 1:6 | Dan kamu bersuka-suka dalam itu hal, sunggoh pun skarang, kalau msti bgitu, kamu sudah kna susah-hati s-kjap saja dalam macham-macham punya pnchoba'an, |
| 1:7 | spaya kamu punya perchaya yang di-ujikan itu (yang lbeh bsar herga-nya deri-pada mas yang binasa, sunggoh pun mas itu di-ujikan dngan api), boleh datangkan puji dan kmulia'an dan hormat tempo Isa Almaseh di-nyatakan: |
| 1:8 | dan sama dia-lah yang kamu kaseh, sunggoh pun kamu blum tengok dia; dan sunggoh pun skarang ini juga kamu t'ada tengok dia, kamu perchaya juga, dan bersuka-suka dngan ksuka'an yang t'ada boleh di-bilangkan dan yang di-muliakan: |
| 1:9 | serta kamu trima kamu punya perchaya punya pnghabisan, ia'itu slamat jiwa. |
| 1:10 | Dan deri-hal ini slamat nabi-nabi sudah chari dan preksa baik-baik, ia'itu nabi-nabi yang sudah bernabuat fasal anugrah yang nanti sampai k-pada kamu: |
| 1:11 | dia-orang chari baik-baik 'ntah bila-kah dan bagimana-kah tempo-nya yang Roh Almaseh yang di dalam-nya ada tunjokkan, yang sudah saksikan lbeh dhulu deri-hal sgala sngsara Almaseh, dngan sgala kmulia'an yang nanti ikut blakang. |
| 1:12 | Dan sudah di-nyatakan k-pada ini nabi-nabi, yang bukan-nya k-pada dia-orang sndiri, ttapi k-pada kamu-lah dia-orang sudah bawa ini smoa, yang skarang ini sudah di-bri tahu k-pada kamu, oleh orang yang khabarkan injil k-pada kamu dngan Roh Alkudus yang di-surohkan deri shorga; dan ini smoa itu mla'ikat-mla'ikat pun mau intai. |
| 1:13 | Sbab itu tajamkan-lah ingatan kamu, dan mnahan diri, dan taroh chukop harap dalam anugrah yang nanti di-sampaikan k-pada kamu tempo Isa Almaseh di-nyatakan; |
| 1:14 | sperti anak-anak yang turut prentah, jangan ikut tuladan sgala k'inginan dhulu-dhulu, sperti tempo kamu lagi bodoh: |
| 1:15 | ttapi sperti Tuhan yang sudah panggil kamu ada kudus, bgitu juga baik-lah kamu pun mnjadi kudus dalam sgala klakuan kamu; |
| 1:16 | kerna ada tersurat, "Kamu patut jadi kudus; kerna sahya ini kudus." |
| 1:17 | Dan dia yang hukumkan orang ikut sperti masing-masing punya perbuatan dngan t'ada tengok-tengok rupa, jikalau kamu triak dia "Bapa," baik kamu bawa tengkah-laku dngan takot, s-lama-nya kamu ada mnumpang di sini: |
| 1:18 | kerna kamu tahu juga yang kamu sudah di-tbuskan deri-pada kamu punya klakuan yang sia-sia yang sudah turun deri kamu punya nenek-moyang, bukan-nya dngan barang-barang yang boleh binasa, sperti mas perak; |
| 1:19 | ttapi dngan darah yang indah, sperti darah anak-domba yang t'ada chla dan t'ada chachat, ia'itu dngan darah Almaseh: |
| 1:20 | yang Allah sudah tahu lbeh dhulu, s-blum kjadian alam ini, ttapi pada pnghabisan sgala jman dia sudah di-nyatakan kerna kamu smoa, |
| 1:21 | yang deri sbab Almaseh itu sudah perchaya sama Allah, yang sudah bangkitkan dia deri antara orang mati, dan sudah kasi dia kmulia'an; sampaikan kamu punya perchaya dan harap ada ttap dalam Allah juga. |
| 1:22 | Sdang kamu sudah suchikan jiwa kamu dalam hal kamu turut perkara kbtulan itu, sampaikan kamu kaseh sama sgala sudara-sudara dngan t'ada pura-pura, kaseh-lah satu sama lain dngan hati btul dan dngan rajin: |
| 1:23 | dan kamu sudah di-peranakkan s-mula bukan-nya deri-pada bneh yang binasa, ttapi deri-pada bneh yang ta'boleh binasa, ia'itu oleh Allah punya perkata'an yang hidop dan kkal itu. |
| 1:24 | Kerna, "Sgala manusia sperti rumput, Dan sgala kmulia'an-nya sperti bunga rumput. Rumput layu, dan bunga pun gugur: |
| 1:25 | Ttapi perkata'an Tuhan tinggal s-lama-lama-nya." Dan ini-lah perkata'an khabar baik yang sudah di-khabarkan k-pada kamu. |
1 Peter 1 - Alkitab Melayu Baba
