| 5:1 | Sbab itu sama orang-orang yang jadi ktua antara kamu sahya nasihatkan, sahya ini yang sama-sama jadi ktua juga, dan sudah saksikan sgala sngsara Almaseh, dan yang sama-sama dapat bhagian dalam kmulia'an yang nanti di-nyatakan itu: |
| 5:2 | Gombalakan-lah Allah punya kawan-domba yang di antara kamu itu, dan jagakan dia-orang, bukan sbab kna paksa, ttapi dngan suka-hati, sperti kahandak Allah; dan jangan sbab mau dapat untong jahat, ttapi dngan sunggoh hati; |
| 5:3 | dan jangan sperti tuan-tuan atas kamu punya bhagian, ttapi jadi tuladan k-pada kawan-domba itu. |
| 5:4 | Dan bila Gombala yang kpala itu nanti di-nyatakan, kamu nanti trima makota kmulia'an yang t'ada layu. |
| 5:5 | Dan bgitu juga kamu smoa yang muda-muda, tundok-lah k-pada yang tua-tua. Dan kamu sklian, pakaikan rndah-hati di-pinggang mnjadi hamba satu sama lain: kerna Allah mlawan orang-orang yang sombong-hati, ttapi dia kasi anugrah k-pada orang-orang yang rndah-hati. |
| 5:6 | Sbab itu rndahkan-lah diri kamu di bawah Allah punya tangan yang berkuasa itu, spaya pada ktika-nya dia boleh tinggikan kamu; |
| 5:7 | dan smoa kamu punya khuatir pulangkan-lah sama dia, kerna dia ada pdulikan kamu. |
| 5:8 | Baik-lah kamu ingat-ingat, dan berjaga; kamu punya musoh iblis itu sperti singa yang mngaum ada berjalan sini-sana chari siapa yang dia boleh tlan: |
| 5:9 | tahankan dia ini tgoh-tgoh dngan perchaya, sbab kamu tahu yang itu ksusahan juga ada jadi dalam hal sklian sudara-sudara kamu yang di dalam dunia ini. |
| 5:10 | Dan Allah yang bri sgala anugrah, dan sudah panggil kamu masok dalam kmulia'an-nya yang kkal dalam Almaseh itu, bila kamu sudah habis kna susah sdikit punya lama, dia-lah juga nanti sndiri smpurnakan, tgohkan, kuatkan sama kamu. |
| 5:11 | K-pada dia-lah kuasa sampai s-lama-lama-nya. Amin. |
| 5:12 | Dngan tangan sudara Silwanus yang stiawan itu, sperti sahya fikir, sahya sudah tulis k-pada kamu dngan pendek saja, serta kasi nasihat dan bersaksi yang ini-lah Allah punya anugrah yang btul itu: baik-lah kamu berdiri ttap dalam-nya. |
| 5:13 | Kamu punya sudara di Babil, yang terpileh sama-sama kamu, kirim tabek k-pada kamu; dan anak sahya Markus. |
| 5:14 | Kasi tabek satu sama lain dngan chium pngasehan itu. Sjahtra-lah k-pada kamu smoa yang di dalam Almaseh. |
1 Peter 5 - Alkitab Melayu Baba
