| 2:1 | Sbab itu sblahkan-lah sgala kjahatan, dan sgala tipu-daya, dan pura-pura, dan dngki, dngan sgala umpatan, |
| 2:2 | dan sperti anak-anak yang bharu jadi, ingin-lah sama susu rohani yang t'ada tipu-daya itu, spaya oleh itu kamu boleh bertambah-tambah sampai dapat slamat; |
| 2:3 | ia'itu jikalau kamu sudah rasa yang Tuhan ada murah-hati: |
| 2:4 | mari-lah k-pada dia, ia'itu batu yang hidop, yang sudah di-buangkan juga oleh manusia, ttapi sama Allah terpileh dan indah, |
| 2:5 | dan baik kamu pun di-bangunkan sperti batu-batu yang hidop mnjadi satu rumah rohani, mnjadi imam-imam yang kudus, spaya persmbahkan korban rohani, yang berknan k-pada Allah oleh Isa Almaseh. |
| 2:6 | Kerna ada tersbot dalam kitab, "Ada-lah sahya taroh dalam negri Sion s-buah batu kpala pnjuru, yang terpileh dan indah: Dan orang yang perchaya sama dia ta'nanti kna malu." |
| 2:7 | Jadi, sama kamu ini yang perchaya ada dia punya indah: ttapi sama orang yang ta'mau perchaya, "Batu yang sudah di-buangkan oleh tukang-tukang, Itu-lah juga sudah di-buatkan kpala-pnjuru;" |
| 2:8 | dan lagi, "Satu batu terantok, dan satu batu sntohan;" kerna dia-orang terantok k-pada itu perkata'an, sbab dia-orang derhaka, dan bgini-lah juga sudah di-tntukan k-pada dia-orang. |
| 2:9 | Ttapi kamu ini-lah satu kturunan yang terpileh, imam-imam yang ada kraja'an, satu bangsa yang kudus, satu kaum kerna Allah sndiri, spaya kamu boleh mashhurkan sgala kbaikan Tuhan yang sudah panggil kamu kluar deri glap, masok dia punya trang yang hairan itu: |
| 2:10 | ia'itu kamu yang dhulu buka satu bangsa, ttapi skarang sudah jadi Allah punya bangsa: yang dhulu blum dapat ksian, ttapi skarang sudah dapat ksian. |
| 2:11 | Hei sgala kkaseh, sahya minta sama kamu, sperti sama orang-orang dagang dan orang yang mnumpang, jauhkan-lah diri kamu deri k'inginan tabi'at dunia, yang berprang sama jiwa; |
| 2:12 | dan biar-lah kamu punya klakuan jadi snonoh di antara orang bangsa-asing; spaya dalam hal dia-orang jahatkan kamu, sperti kamu orang yang buat jahat, ttapi oleh sbab kamu punya perbuatan baik yang dia-orang tengok, dia-orang boleh muliakan Allah tempo Tuhan mlawat orang. |
| 2:13 | Deri kerna Tuhan punya sbab, tundok-lah k-pada tiap-tiap kuasa yang sudah di-tntukan oleh manusia: baik k-pada raja, sdang dia yang di atas skali; |
| 2:14 | baik k-pada sgala gobernor, sdang dia-orang-lah yang sudah di-surohkan oleh raja mau bawa balasan k-pada orang yang buat jahat, dan puji k-pada orang yang buat baik. |
| 2:15 | Kerna bgitu-lah kahandak Allah, ia'itu yang kamu boleh diamkan kbodohan orang-orang yang bbal, oleh perbuatan yang baik: |
| 2:16 | sperti orang-orang bebas, dngan t'ada pakai kbebasan itu mau tudong kjahatan, ttapi sperti Allah punya hamba-hamba. |
| 2:17 | Hormatkan smoa orang. Kaseh sama sklian sudara-sudara itu. Takot-lah sama Allah. Hormatkan raja. |
| 2:18 | Hei hamba-hamba orang, tundok-lah k-pada kamu punya tuan-tuan dngan s-chukop takot; bukan saja k-pada tuan-tuan yang baik dan manis, ttapi k-pada yang bngis pun. |
| 2:19 | Kerna bgini-lah yang berknan, ia'itu jikalau orang mnanggong susah deri sbab angan-angan hati dpan Allah, mski pun dia kna susah dngan t'ada adil. |
| 2:20 | Kerna jikalau kamu buat dosa, dan trima palu dngan sabar-hati, apa-kah pahala-nya? ttapi jikalau kamu sudah buat baik, dan trima susah dngan sabar-hati, ini-lah berknan dpan Allah. |
| 2:21 | Kerna kamu sudah di-panggil sbab perkara ini juga: sbab Almaseh sudah kna susah kerna kamu, dan sudah tinggalkan kamu satu tuladan, spaya kamu boleh ikut tapak-kaki-nya: |
| 2:22 | dia-lah yang t'ada buat dosa, dan t'ada orang dapat tipu-daya dalam mulut-nya: |
| 2:23 | bila orang maki sama dia, t'ada dia balas maki; bila dia kna susah, t'ada dia gertak: ttapi sudah srahkan k-pada Tuhan yang hukumkan dngan adil: |
| 2:24 | dia-lah sndiri sudah tanggongkan dosa-dosa kita di badan-nya di atas kayu itu, spaya sdang kita sudah mati k-pada dosa, kita boleh hidop k-pada kbnaran pula; dan deri sbab dia punya bkas-luka kamu sudah di-smbohkan. |
| 2:25 | Kerna dhulu kamu sudah jalan ssat sperti kambing; ttapi skarang ini kamu sudah pulang balek k-pada kamu punya jiwa punya Gombala dan Pnjaga. |
1 Peter 2 - Alkitab Melayu Baba
