5:1 | Ingat-lah, hei kamu yang kaya ini, mnangis dan mraong-lah sbab smoa chlaka yang nanti datang atas kamu. |
5:2 | Kamu punya kkaya'an sudah burok, dan kamu punya pakaian sudah kna makan ggat. |
5:3 | Kamu punya mas-perak sudah berkarat; dan dia punya karat nanti jadi saksi atas kamu, dan makan kamu punya daging sperti api. Kamu sudah taroh herta tempo jman yang kmdian skali. |
5:4 | Itu orang yang mnuai kamu punya ladang, dia punya upah yang kamu sudah tahan dngan tipu ada bertriak-triak; dan itu orang yang mnuai punya triak sudah sampai di kuping Tuhan sgala tntra. |
5:5 | Kamu sudah hidop atas ini bumi, dngan lazat, dan sudah chari ksuka'an; kamu sudah puaskan kamu punya hati tempo hari pmbunohan. |
5:6 | Kamu sudah hukumkan, dan sudah bunohkan orang bnar itu; t'ada juga dia mlawan kamu. |
5:7 | Sbab itu, hei sudara-sudara, sabar-lah sampai kdatangan Tuhan. Orang ladang nantikan dngan sabar bumi punya buah-buahan yang indah-indah, sampaikan itu bumi trima hujan yang sulong dan hujan yang bongsu. |
5:8 | Sbab itu baik juga kamu pun jadi sabar; ttapkan kamu punya hati: kerna kdatangan Tuhan ada dkat. |
5:9 | Hei sudara-sudara, jangan-lah bersungut satu atas lain, spaya jangan kamu kna hukuman: ingat, hakim itu ada berdiri di muka pintu. |
5:10 | Hei sudara-sudara, ambil-lah itu nabi-nabi yang sudah berchakap dngan nama Tuhan, mnjadi kamu punya tuladan dalam hal mnanggong susah dan sabar. |
5:11 | Orang-orang yang sudah sabar, kita bilang berkat-lah dia: kamu sudah dngar deri-hal Ayub punya sabar, dan sudah tengok Tuhan punya maksud, ia'itu bagimana Tuhan ada sangat ksian dan blas-hati. |
5:12 | Ttapi lbeh deri-pada smoa, hei sudara-sudara, jangan-lah bersumpah, baik dmi langit, baik dmi bumi, baik dmi apa-apa sumpah yang lain: ttapi biar kamu punya ya mnjadi ya, dan kamu punya tidak, tidak: spaya jangan kamu kna hukuman. |
5:13 | Ada-kah siapa-siapa antara kamu yang mrasa susah? biar-lah dia minta do'a. Ada-kah siapa-siapa yang snang hati? biar-lah dia mnyanyi puji-pujian. |
5:14 | Ada-kah siapa-siapa antara kamu yang sakit? biar-lah dia panggil eklisia punya ktua-ktua; dan biar-lah dia-orang mintakan do'a atas dia, dan minyakkan dia sama minyak dalam nama Tuhan: |
5:15 | dan perchaya punya do'a nanti slamatkan itu orang yang sakit, dan Tuhan nanti kasi dia bangun; dan kalau dia sudah buat apa-apa dosa, itu pun nanti di-ampunkan sama dia. |
5:16 | Sbab itu mngaku-lah kamu punya dosa satu sama lain, dan minta-lah do'a satu sama lain, spaya kamu boleh di-smbohkan. Satu orang bnar punya perminta'an bkerja dngan banyak kuasa. |
5:17 | Ilia itu satu orang yang sama tabi'at dngan kita, dan dia minta do'a dngan tkun, spaya jangan turun hujan; dan t'ada turun hujan di tanah itu ada tiga tahun anam bulan punya lama. |
5:18 | Dan dia minta do'a lagi s-kali pula; dan langit kasi hujan, dan bumi pun kluarkan buah-buah-nya. |
5:19 | Hei sudara-sudara, jikalau siapa-siapa antara kamu ssat deri-pada kbtulan itu, dan satu orang balekkan dia; |
5:20 | baik dia tahu yang orang yang balekkan satu orang berdosa deri-pada jalan-nya yang ssat nanti slamatkan satu jiwa deri kmatian, dan nanti lindongkan banyak-banyak dosa. |