1:1 | Deri dhulu kala Allah sudah chakap k-pada kita punya nenek-moyang dngan banyak bhagian dan banyak macham, sama mulut nabi-nabi, |
1:2 | dan skarang dalam jman ini punya pnghabisan, dia sudah chakap k-pada kita sama mulut Anak-nya, yang dia sudah tntukan mnjadi waris smoa perkara, dan oleh-nya juga dia sudah jadikan sklian alam; |
1:3 | sdang dia-lah kmulia'an Allah punya chahya, dan k'ada'an Allah punya rupa, dan sdang dia tanggong smoa perkara dngan kuasa-nya punya perkata'an, bila dia sudah chuchikan orang punya dosa-dosa, dia dudok-lah sblah knan Allah yang maha mulia dalam ktinggian; |
1:4 | dan dia sudah mnjadi lbeh mulia deri-pada smoa mla'ikat, s-bagimana dia sudah trima jadi psaka-nya satu nama yang lbeh indah deri-pada dia-orang punya. |
1:5 | Kerna k-pada mana satu antara smoa mla'ikat sudah Allah kata, "Angkau-lah Anak sahya, Ini hari sahya sudah beranakkan angkau?" dan lagi, "Sahya nanti jadi Bapa k-pada dia, Dan dia nanti jadi Anak k-pada sahya?" |
1:6 | Dan bila lagi s-kali dia bawa Anak-sulong itu masok dunia, dia kata, "Biar-lah smoa mla'ikat Allah smbah sama dia." |
1:7 | Deri-hal mla'ikat-mla'ikat, dia kata, Mla'ikat-mla'ikat-nya dia jadikan angin, Dan smoa psuroh-nya dia jadikan satu nyala api:" |
1:8 | ttapi deri-hal Anak itu, "Takhta-mu, ya Allah, ada sampai s-lama-lama-nya; Dan tongkat k'adilan ia'itu-lah tongkat kraja'an-mu. |
1:9 | Angkau sudah kaseh sama kbnaran, dan sudah bnchi kjahatan; Sbab itu Allah, ia'itu angkau punya Allah, sudah minyakkan angkau Dngan minyak ksuka'an lbeh deri-pada smoa angkau punya kawan." |
1:10 | Dan lagi, "Ya Tuhan, mula-mula Tuhan sudah tarohkan ini bumi punya alasan, Dan langit pun tangan Tuhan punya perbuatan: |
1:11 | Smoa itu nanti binasa; ttapi Tuhan kkal juga: Dan sperti satu baju smoa itu nanti jadi burok; |
1:12 | Dan sperti satu slimut Tuhan nanti gulongkan, Dan sperti satu baju smoa-nya nanti kna tukar: Ttapi Tuhan slalu sama, Dan Tuhan punya tahun tidak ada ksudahan-nya." |
1:13 | Ttapi fasal mana satu antara smoa mla'ikat sudah Allah pernah kata, "Dudok-lah di sblah kanan sahya, Sampai sahya buat musoh-musoh-mu jadi alas kaki-mu?" |
1:14 | Bukan-kah sklian itu mnjadi roh yang mlayan, yang sudah di-hantarkan spaya mlayankan orang-orang yang nanti trima slamat jadi psaka-nya? |