| 3:1 | Sbab itu, hei sudara-sudara yang kudus, yang sama-sama trima panggilan yang deri shorga itu, perhatikan-lah kita punya pngakuan punya Rasul dan Kpala Imam, ia'itu Isa; |
| 3:2 | yang sudah mnjadi stiawan sama dia yang sudah mlantek dia, sperti Musa pun dalam s-gnap isi rumah Allah. |
| 3:3 | Kerna dia sudah di-bilangkan layak boleh trima lbeh kmulia'an deri-pada Musa, s-bagimana orang yang bikin rumah dapat lbeh banyak hormat deri-pada rumah-nya. |
| 3:4 | Kerna tiap-tiap rumah ada orang yang bikin; ttapi yang bikin smoa perkara ia'itu Allah. |
| 3:5 | Musa pun ada stiawan juga dalam s-gnap isi rumah Allah sperti orang gaji, spaya saksikan perkara-perkara yang kmdian nanti di-katakan; |
| 3:6 | ttapi Almaseh pula sperti satu anak, atas isi rumah Allah; dan kita-lah dia punya isi-rumah, jikalau kita pegang kita punya brani-hati dan kita punya harap punya kmgahan ttap sampai ksudahan. |
| 3:7 | Sbab itu, sperti Roh Alkudus pun kata, "Ini hari juga kalau kamu mau dngar suara-nya. |
| 3:8 | Jangan kraskan hati kamu sperti dalam itu achuman, Waktu pnchoba'an di tanah sunyi itu, |
| 3:9 | Di mana kamu punya nenek-moyang sudah choba sama sahya dngan ujian, Dan sudah tengok sahya punya perbuatan ampat-puloh tahun punya lama. |
| 3:10 | Sbab itu sahya naik mradang sama ini jman punya orang, Dan sudah bilang, 'Dia-orang slalu ssat dalam hati: Ttapi dia-orang ta'tahu sahya punya jalan;' |
| 3:11 | Sperti sahya sudah bersumpah dalam sahya punya marah, 'T'ada-lah dia-orang nanti masok sahya punya perhentian.'" |
| 3:12 | Ingat-lah baik-baik, hei sudara-sudara, spaya jangan pula antara kamu ada satu orang yang ada hati jahat yang t'ada perchaya, dalam hal dia undor deri-pada Allah yang hidop itu: |
| 3:13 | ttapi nasihatkan satu sama lain s-hari-hari, s-lagi di-sbot "ini hari:" spaya jangan pula siapa pun di antara kamu kna hati kras oleh dosa punya tipu-daya: |
| 3:14 | kerna kita sudah dapat bhagian dalam Almaseh, ia'itu jikalau kita pegang kita punya harap yang mula-mula itu ttap sampai ksudahan: |
| 3:15 | sdang sudah di-sbot, "Ini hari juga kalau kamu mau dngar suara-nya, Jangan kraskan kamu punya hati sperti dalam achuman itu." |
| 3:16 | Kerna siapa-kah yang sudah dngar dan sudah mngachum? bukan-kah smoa orang yang kluar deri Masir oleh Musa? |
| 3:17 | Dan sama siapa-kah yang dia sudah mradang ampat-puloh tahun punya lama? bukan-kah sama orang-orang yang sudah buat dosa, dan yang mayat-nya jatoh di tanah sunyi? |
| 3:18 | Dan k-pada siapa-kah dia sudah bersumpah yang dia-orang ta'boleh masok dia punya perhentian, kalau tidak k-pada orang-orang yang sudah derhaka? |
| 3:19 | Jadi kita tengok yang dia-orang sudah ta'boleh masok deri sbab kurang perchaya. |
Hebrews 3 - Alkitab Melayu Baba
