| 2:1 | Sbab itu kita patut ingat terlbeh lagi perkara-perkara yang kita sudah dngar, spaya jangan kita barangkali hanyut. |
| 2:2 | Kerna kalau tgoh juga perkata'an yang Allah sudah katakan dngan mulut mla'ikat-mla'ikat, dan tiap-tiap ksalahan dan derhaka kna pmbalasan yang adil; |
| 2:3 | bagimana-kah kita boleh dapat lpas, kalau kita ta'pdulikan slamat yang bgini bsar? yang mula-mula sudah di-katakan dngan mulut Tuhan, dan sudah di-tgohkan kerna kita oleh orang-orang yang dngar; |
| 2:4 | Allah pun sudah bersaksi sama-sama dia-orang, dngan tanda-tanda dan perkara yang hairan, dan dngan macham-macham m'ujizat, dan dalam hal Roh Alkudus sudah di-bhagi-bhagikan k-pada dia-orang, sperti kahandak Allah sndiri. |
| 2:5 | Kerna dunia yang mndatang, yang deri-hal-nya kita ada katakan, dia sudah tundokkan bukan-nya k-pada mla'ikat-mla'ikat. |
| 2:6 | Ttapi dalam satu tmpat ada satu orang sudah bersaksi, "Apa-kah manusia, sampaikan Tuhan ingat fasal dia? Atau apa-kah anak manusia sampaikan Tuhan mlawat sama dia? |
| 2:7 | Tuhan sudah jadikan dia sikit kurang deri-pada mla'ikat-mla'ikat; Tuhan sudah bri kmulia'an dan hormat jadi makota-nya, Dan sudah tntukan dia kpala atas smoa Tuhan punya perbuatan: |
| 2:8 | Tuhan sudah tundokkan smoa perkara di bawah kaki-nya." Dalam hal dia sudah tundokkan smoa perkara k-pada dia, t'ada satu perkara pun dia tinggalkan yang t'ada tundok k-pada dia. Ttapi skarang blum lagi kita tengok smoa perkara kna tundok k-pada dia. |
| 2:9 | Ttapi kita tengok dia yang sudah di-jadikan sikit kurang deri-pada mla'ikat-mla'ikat, ia'itu Isa, sudah di-bri kmulia'an dan hormat jadi makota-nya, deri sbab sngsara kmatian, spaya oleh Allah punya anugrah dia boleh mrasa kmatian kerna masing-masing orang. |
| 2:10 | Sbab Allah, yang kerna-nya dan oleh-nya ada smoa perkara, dalam hal dia sudah bawa banyak-banyak anak masok kmulia'an, patut juga dia smpurnakan dia-orang punya Kpala-slamat oleh sngsara. |
| 2:11 | Kerna yang kuduskan dan yang di-kuduskan pun, asal-nya deri-pada satu juga smoa-nya: dan itu sbab-lah dia t'ada malu triak dia-orang sudara, |
| 2:12 | kata-nya bgini, "Sahya nanti khabarkan nama Tuhan k-pada sahya punya sudara-sudara, Di tngah-tngah perhimponan sahya nanti nyanyikan Tuhan punya puji-pujian." |
| 2:13 | Dan lagi, "Sahya nanti taroh sahya punya harap dalam dia." Dan lagi, "Tengok-lah, sahya ini sama anak-anak yang Allah sudah kasi sama sahya." |
| 2:14 | Sbab itu sdang anak-anak itu sama-sama ada badan manusia, bgitu juga dia pun sudah pakai itu badan; spaya oleh kmatian dia boleh binasakan dia itu yang ada kuasa atas kmatian, ia'itu iblis: |
| 2:15 | dan boleh lpaskan smoa orang yang kna perhamba'an s'umor hidop-nya deri sbab takot mati. |
| 2:16 | Kerna btul-lah bukan-nya sama mla'ikat yang dia tolong, ttapi dia tolong kturunan Ibrahim. |
| 2:17 | Sbab itu dalam smoa perkara dia msti di-samakan dngan sudara-sudara-nya, spaya dalam Allah punya perkara smoa dia boleh mnjadi satu imam yang berksian dan stiawan, spaya buat perdamaian kerna bangsa itu punya dosa-dosa. |
| 2:18 | Kerna dalam hal dia sudah kna choba dan mrasa sngsara, dia boleh bantu sama orang yang kna choba. |
Hebrews 2 - Alkitab Melayu Baba
