| 3:1 | Ingatkan orang tundok k-pada kpala-kpala dan kuasa-kuasa, dan turut prentah, dan sdia mau buat tiap-tiap pkerja'an yang baik, |
| 3:2 | jangan dia-orang umpatkan satu orang pun, jangan berbantah-bantah, ttapi jadi manis, dan tunjokkan s-chukop lmah-lmbot k-pada smoa orang. |
| 3:3 | Kerna dhulu kita pun bodoh, derhaka, ssat, mnjadi hamba k-pada macham-macham k'inginan dan ksuka'an, bawa diri dngan hati jahat dan dngki, kbnchian orang, dan bnchi satu sama lain. |
| 3:4 | Ttapi bila sudah ternampak Juru-slamat kita Allah punya kmurahan, dan dia punya kaseh k-pada manusia, |
| 3:5 | dia sudah slamatkan kita, bukan sbab perbuatan yang kita ini sudah buat dalam kbnaran, ttapi turut sperti dia punya ksian, dalam pmbasohan kjadian yang bharu, dan dalam hal kita sudah di-bharukan oleh Roh Alkudus, |
| 3:6 | yang dia sudah churahkan atas kita dngan kaya-nya, oleh Juru-slamat kita Isa Almaseh; |
| 3:7 | spaya dalam hal kita sudah di-bnarkan sbab anugrah-nya, kita di-jadikan waris sperti pngharapan kita mau dapat hidop yang kkal. |
| 3:8 | Ini perkata'an kperchaya'an, dan ini smoa sahya mau angkau sbotkan dngan tntu, spaya orang yang sudah perchaya sama Allah boleh ingat mau buat kerja yang baik. Smoa ini perkara ada baik dan berguna k-pada orang: |
| 3:9 | ttapi palingkan angkau punya diri deri perbantahan yang bodoh, dan surat kturunan, dan pertngkaran, dan perklahian deri-hal hukum-taurit; kerna smoa itu t'ada berguna, dan sia-sia. |
| 3:10 | Orang yang buat kampongan, bila angkau sudah nasihatkan dia nombor satu dan nombor dua kali, tolakkan dia; |
| 3:11 | sbab angkau tahu yang ini macham punya orang sudah terbalek, dan ada berdosa, dan dia juga yang ltakkan hukum atas diri-nya sndiri. |
| 3:12 | Bila sahya hantarkan Artimas k-pada angkau, atau Tukhikus, usahakan-lah diri datang k-pada sahya di Nikopolis: kerna sahya sudah bichara mau tinggal sana waktu musim sjok. |
| 3:13 | Zemas, guru taurit itu, dan Apollos, baik angkau hantarkan dua-dua dalam dia-orang punya perjalanan dngan rajin, spaya jangan satu apa pun terkurang sama dia-orang. |
| 3:14 | Dan baik kita punya orang pun blajar buat kerja yang baik mau chukopkan apa yang terkurang, spaya jangan dia-orang kurang kluarkan buah. |
| 3:15 | Smoa orang yang ada sama-sama sahya kirim tabek k-pada angkau. Kasi tabek k-pada orang-orang yang kaseh kita dalam iman itu. Biar-lah anugrah Allah bersama-sama kamu smoa. |
Titus 3 - Alkitab Melayu Baba
