2:1 | Sbab itu, sahya punya nasihat, mula-mula, bikin smbahyang dan do'a dan perminta'an dan shukor kerna smoa orang; |
2:2 | kerna raja-raja, dan smoa orang bsar-bsar; spaya kita boleh dapat hidop dalam snang dan sntosa dngan sgala kbaktian dan snonoh. |
2:3 | Bgini-lah yang baik dan berknan k-pada Juru-slamat kita Allah; |
2:4 | yang suka smoa orang dapat slamat dan dapat tahu deri-hal kbtulan itu. |
2:5 | Kerna Allah chuma satu saja, dan orang tngah pun satu saja antara Allah sama manusia, dia sndiri manusia juga, ia'itu Isa Almaseh, |
2:6 | yang sudah srahkan diri-nya mnjadi tbusan kerna smoa orang; ia'itu ksaksian yang nanti di-saksikan dalam tempo-nya; |
2:7 | dan fasal itu sahya sudah di-tntukan jadi satu pngajar dan satu rasul (sahya chakap btul, bukan-nya bohong), dan guru orang bangsa-asing dalam perchaya dan kbtulan. |
2:8 | Sbab itu bgini-lah sahya punya kahandak, ia'itu yang orang-orang dlaki berdo'a di mana-mana tmpat, dngan angkat tangan yang suchi, dngan t'ada marah dan t'ada perbantahan. |
2:9 | Dan bgini juga prempuan-prempuan boleh riaskan diri-nya dngan pakaian yang patut, dan dngan taroh malu dan mnahan diri: bukan dngan sanggol anyam, dan mas atau mutiara atau pakaian yang herga bsar-bsar: |
2:10 | ttapi dngan perbuatan yang baik, sperti padan dngan prempuan yang mngaku diri-nya orang yang smbah Allah. |
2:11 | Biar-lah prempuan blajar diam-diam dngan chukop tundok diri-nya. |
2:12 | Ttapi sahya t'ada kasi prempuan ajar, atau prentahkan orang dlaki, ttapi biar-lah dia diam-diam. |
2:13 | Kerna Adam sudah di-jadikan dhulu, kmdian bharu Hawa: |
2:14 | dan bukan-nya Adam yang kna tipu, ttapi prempuan itu sudah kna tipu sampai masok ksalahan: |
2:15 | ttapi dia nanti di-slamatkan dalam hal beranak, kalau dia-orang tinggal ttap dalam perchaya, dan kaseh, dan kkudusan, dngan mnahan diri. |