3:1 | Pnghabisan skali, hei sudara-sudara sahya, bersuka-suka-lah dalam Tuhan. Kalau tulis itu perkara yang dhulu juga, t'ada kasi sahya susah, dan boleh lindongkan kamu. |
3:2 | Jaga-lah itu anjing-anjing, jaga-lah orang-orang yang buat kerja jahat itu, jaga-lah orang-orang yang kudong: |
3:3 | kerna kita-lah orang bersunat, yang smbahyang dngan Roh Allah, dan mgahkan diri kita dalam Isa Almaseh itu, dan t'ada taroh harap dalam badan: |
3:4 | sunggoh pun sahya ini boleh juga taroh harap dalam badan: kalau ada lain siapa-siapa fikir dia mau taroh harap dalam badan, sahya ini lbeh lagi: |
3:5 | yang di-sunatkan bila umor lapan hari, deri bangsa Isra'el, deri-pada suku-bangsa Binyamin, satu orang Ibrani deri kturunan orang Ibrani; kalau fasal hukum-taurit, sahya orang Farisi; |
3:6 | kalau fasal rajin, sahya aniayakan eklisia; kalau fasal kbnaran yang dalam hukum-taurit, sahya t'ada kna chla. |
3:7 | Ttapi apa-apa yang dhulu mnjadi untong sama sahya, ini smoa sahya skarang sudah bilangkan mnjadi rugi deri sbab Almaseh. |
3:8 | Bukan saja itu, ttapi sahya bilang smoa perkara mnjadi rugi sbab terlbeh indah-lah pngtahuan deri-hal sahya punya Tuhan Isa Almaseh: dan deri sbab dia sahya sudah kna rugi smoa perkara, dan smoa itu sahya bilangkan sperti sampah, spaya sahya boleh untong Almaseh, |
3:9 | dan spaya sahya boleh di-dapat dalam dia, bukan-nya ada kbnaran sndiri, yang datang deri hukum-taurit, ttapi yang datang oleh perchaya dalam Almaseh, ia'itu kbnaran yang datang deri-pada Allah atas perchaya: |
3:10 | spaya sahya boleh tahu dia, dan kuasa kbangkitan-nya, dan perskutuan dalam sngsara-nya, sdang sahya di-samakan dngan dia dalam hal kmatian-nya; |
3:11 | kalau sahya boleh sampai kbangkitan deri antara orang mati pula. |
3:12 | Bukan-nya sudah pun sahya dapat, atau sudah pun sahya di-smpurnakan: ttapi sahya maju juga, kalau sahya boleh dapat ambil itu perkara yang kerna-nya Almaseh sudah ambil sama sahya. |
3:13 | Hei sudara-sudara, blum lagi sahya bilangkan diri sahya sperti sudah ambil: ttapi ini satu perkara juga, ia'itu sahya lupakan sgala perkara yang di blakang, dan sahya panjangkan diri sahya k-pada perkara yang di dpan, |
3:14 | ia'itu sahya maju mnuju tanda itu, spaya boleh dapat pahala Allah punya panggilan yang tinggi itu dalam Isa Almaseh. |
3:15 | Sbab itu s-brapa orang yang smpurna, biar kita taroh ini macham punya fikiran: dan jikalau ada lain fikiran kamu deri-hal apa-apa, itu pun Allah nanti nyatakan k-pada kamu: |
3:16 | chuma, barang di mana kita sudah sampai, biar-lah kita bawa diri bgitu. |
3:17 | Hei sudara-sudara, biar-lah kamu bersama-sama turut sahya punya tuladan, dan perhatikan orang-orang yang bawa diri sperti kita jadi kamu punya tuladan. |
3:18 | Kerna sperti brapa kali sahya sudah bilang dhulu, dan skarang pun sahya bilang dngan ayer-mata, ada banyak orang yang bawa diri sperti salib Almaseh punya musoh: |
3:19 | dia-orang punya ksudahan nanti jadi kbinasa'an, dan dia-orang punya prot mnjadi Tuhan sama dia, dan perkara yang malu mnjadi dia-orang punya kmulia'an, dan dia-orang ingat perkara dunia. |
3:20 | Kerna kita punya tanah-ayer di shorga: dan deri situ kita ada mnantikan satu Juru-slamat, ia'itu Tuhan kita Isa Almaseh: |
3:21 | yang nanti ubahkan rupa badan kita yang rndah, mnjadi s-rupa badan kmulia'an-nya, turut sperti kuasa-nya yang boleh tundokkan smoa perkara di bawah prentah-nya. |