| 2:1 | Dan kamu ini, bila kamu sudah mati deri sbab ksalahan dan dosa-dosa, |
| 2:2 | yang di dalam-nya kamu dhulu bawa diri, turut sperti jman dunia ini, turut sperti kpala sgala kuasa di udara, ia'itu jin yang skarang pun bkerja dalam anak-anak derhaka; |
| 2:3 | dan di antara ini orang-orang smoa kita sklian pun dhulu sudah hidop dalam sgala k'inginan tabi'at dunia, dan sudah buat sperti kahandak tabi'at dunia dan sgala ingatan kita, dan sudah jadi anak-anak marah sama sperti lain-lain orang juga:- |
| 2:4 | ttapi Allah yang kaya dalam ksian, deri sbab dia ada kaseh sama kita dngan kaseh yang sangat bsar itu, |
| 2:5 | sudah hidopkan kita sama-sama Almaseh, mski pun waktu kita ada mati deri sbab kita punya ksalahan smoa (oleh anugrah-lah kamu sudah dapat slamat), |
| 2:6 | dan sudah bangkitkan kita sama-sama dia, dan kasi kita dudok pun sama dia di shorga dalam Isa Almaseh: |
| 2:7 | spaya dalam jman-jman yang mndatang dia boleh nyatakan sgala kkaya'an anugrah-nya yang sangat bsar itu oleh kmurahan-nya k-pada kita dalam Isa Almaseh: |
| 2:8 | kerna oleh anugrah-lah kamu sudah di-slamatkan deri sbab perchaya: dan itu bukan-nya deri-pada diri kamu sndiri; itu-lah Allah punya pmbrian: |
| 2:9 | bukan-nya deri sbab perbuatan, spaya jangan satu orang pun mgahkan diri-nya. |
| 2:10 | Kerna kita ini-lah dia punya perbuatan, di-jadikan dalam Isa Almaseh spaya buat pkerja'an yang baik, yang Allah sudah sdiakan lbeh dhulu, spaya kita boleh bawa diri dalam itu hal. |
| 2:11 | Sbab itu baik-lah kamu ingat, yang dhulu kamu ini dalam hal badan mnjadi orang bangsa-asing, di-sbot orang ta'sunat oleh orang yang di-sbot orang bersunat, ia'itu sunat yang di-buat dngan tangan dalam badan; |
| 2:12 | itu waktu kamu ada jauh deri-pada Almaseh, di-asingkan deri-pada orang Isra'el punya hak anak-negri, dan fasal sgala perjanjian yang Allah sudah janjikan kamu ini jadi orang dagang, dngan t'ada satu harap, dan dngan t'ada Allah sama kamu dalam dunia ini. |
| 2:13 | Ttapi skarang pula dalam Isa Almaseh kamu ini yang dhulu jauh sudah mnjadi dkat oleh darah Almaseh. |
| 2:14 | Kerna dia-lah mnjadi kita punya perdamaian, dan dua-dua bangsa itu dia sudah bikin satu, dan tembok tngah-tngah yang mnjadi pagar-nya dia sudah rubohkan, |
| 2:15 | sbab dngan badan-nya dia sudah tidakkan itu permusohan, ia'itu taurit dngan hukum-hukum yang di-psan dalam-nya; spaya deri itu dua-dua dia boleh jadikan dalam diri-nya satu orang saja yang bharu, dan bgini bawa perdamaian: |
| 2:16 | dan spaya dalam satu badan dia boleh damaikan dua-dua itu sama Allah oleh salib, sbab dia sudah matikan itu permusohan oleh salib: |
| 2:17 | dan dia datang khabarkan khabar yang baik deri-hal perdamaian k-pada kamu yang jauh, dan perdamaian k-pada orang yang dkat pun: |
| 2:18 | kerna oleh dia kita dua-dua bangsa dapat dkat Bapa oleh satu Roh juga. |
| 2:19 | Jadi itu, kamu ini bukan-nya mnjadi orang dagang dan orang mnumpang lagi, ttapi kamu jadi orang s-negri sama-sama orang kudus, dan jadi orang isi rumah Allah |
| 2:20 | di-naikkan di atas alasan sgala rasul-rasul dan nabi-nabi. Isa Almaseh sndiri mnjadi dia punya batu kpala-pnjuru; |
| 2:21 | dan dalam Almaseh juga s-gnap bangunan di-susunkan, bertambah-tambah mnjadi ka'abah yang kudus dalam Tuhan; |
| 2:22 | dan di dalam-nya juga kamu ini pun sudah di-naikkan sama-sama mnjadi tmpat yang Allah tinggal oleh Roh-nya. |
Ephesians 2 - Alkitab Melayu Baba
