1:1 | Deri-pada Paulus, satu rasul (yang bukan deri-pada manusia, dan bukan oleh manusia pangkat-nya, ttapi oleh Isa Almaseh, dan oleh Allah Bapa yang sudah bangkitkan dia deri antara orang mati), |
1:2 | dan deri-pada smoa sudara-sudara yang ada sama-sama sahya, k-pada sgala eklisia di tanah Galatiah: |
1:3 | biar-lah datang k-pada kamu smoa anugrah dan sjahtra pun deri-pada Allah Bapa, dan deri-pada Tuhan kita Isa Almaseh, |
1:4 | yang sudah srahkan diri-nya kerna kita punya dosa, spaya lpaskan kita kluar deri-pada jman skarang yang jahat ini, sperti kahandak Bapa kita Allah: |
1:5 | k-pada dia-lah kmulia'an sampai s-lama-lama-nya. Amin. |
1:6 | Sahya jadi hairan yang kamu ini sudah bgitu lkas pindah deri-pada dia yang sudah panggil kamu dalam anugrah Almaseh k-pada satu injil yang lain; |
1:7 | ia'itu bukan lagi satu injil: chuma ada orang yang mau kachau sama kamu, dan mau rosakkan injil Almaseh. |
1:8 | Ttapi jikalau kita ini, atau satu mla'ikat deri shorga pun nanti khabarkan k-pada kamu satu injil lain deri-pada itu yang kita sudah khabarkan k-pada kamu dhulu, biar dia la'anat. |
1:9 | Sperti kita sudah bilang dhulu, bgitu juga skarang pun sahya bilang lagi skali, jikalau siapa-siapa khabarkan injil k-pada kamu lain deri-pada itu yang kamu sudah trima, biar dia la'anat. |
1:10 | Kerna skarang ini manusia-kah atau Allah-kah yang sahya mau berknankan? atau ada-kah sahya chari jalan mau sukakan manusia? Jikalau sahya lagi ada chari jalan mau sukakan manusia, bukan-nya sahya jadi hamba Almaseh. |
1:11 | Kerna sahya kasi tahu k-pada kamu, hei sudara-sudara, fasal injil yang sahya sudah khabarkan, yang itu bukan-nya chara manusia. |
1:12 | Kerna bukan-nya deri-pada manusia sahya sudah trima, atau blajar, ttapi oleh knyata'an Isa Almaseh. |
1:13 | Kerna kamu sudah pun dngar fasal sahya punya klakuan dhulu dalam agama orang Yahudi, yang terlalu-lah sangat sahya aniayakan eklisia Allah, dan rosakkan dia: |
1:14 | dan sahya sudah maju dalam agama orang Yahudi lbeh deri-pada lain-lain orang bangsa sahya yang sama satu umor dngan sahya, sbab sahya terlampon rajin deri-hal sahya punya nenek-moyang punya pngajaran. |
1:15 | Ttapi Allah, yang sudah asingkan sahya deri tempo sahya di rahim mak sahya, dan sudah panggil sahya oleh anugrah-nya, |
1:16 | bila sudah berknan sama dia mau nyatakan Anak-nya di dalam sahya, spaya sahya boleh khabarkan dia di antara sgala bangsa asing; itu jam juga sahya t'ada berrondeng sama satu orang pun deri-pada manusia; |
1:17 | dan t'ada pula sahya pergi naik Yerusalim k-pada orang yang sudah jadi rasul-rasul lbeh dhulu sahya: ttapi sahya sudah pergi di tanah Arab; dan sahya balek lagi s-kali di Damsek. |
1:18 | Kmdian, lpas tiga tahun, sahya naik pergi Yerusalim mau dapat knal sama Kifas, dan sahya tinggal sama dia lima-blas hari. |
1:19 | Ttapi deri antara rasul-rasul itu sahya t'ada tengok lain orang, chuma Yakob, Tuhan punya sudara. |
1:20 | Fasal apa-apa yang sahya ada tulis k-pada kamu, ingat-lah, yang di dpan Allah sahya bukan-nya ada chakap bohong. |
1:21 | Kmdian sahya sudah masok tanah Suriah dan Kilikiah. |
1:22 | Dan tanah Yahudiah punya eklisia yang di dalam Almaseh blum knal sahya punya muka: |
1:23 | chuma dia-orang dngar-dngar saja yang, "Itu orang yang dhulu aniayakan kita, skarang pula ada khabarkan khabar yang baik deri-hal itu iman yang dhulu dia rosakkan;" |
1:24 | dan dia-orang muliakan Allah dalam sahya punya hal. |