5:1 | Deri sbab kbebasan juga Almaseh sudah bebaskan kita: sbab itu baik-lah kamu berdiri ttap, dan jangan kamu lagi satu kali kna tanggong perhamba'an punya kok. |
5:2 | Ingat baik-baik, sahya ini Paulus bilang sama kamu, yang jikalau kamu trima sunat, Almaseh nanti jadi ta'fa'idah k-pada kamu. |
5:3 | Lagi satu kali sahya bersaksi k-pada tiap-tiap orang yang trima sunat, yang dia mnjadi satu orang yang berhutang, dan msti jalankan sgala hukum-taurit. |
5:4 | Kamu ini yang mau di-bnarkan oleh hukum-taurit itu, sudah berchrai deri-pada Almaseh; kamu sudah kluar deri anugrah Allah. |
5:5 | Kerna oleh Roh itu kita ini dngan perchaya ada mnantikan itu kbnaran yang kita ada harapkan. |
5:6 | Kerna dalam Isa Almaseh, baik hal sunat baik hal ta'sunat satu pun t'ada ksiat-nya; chuma perchaya saja yang bkerja oleh kaseh. |
5:7 | Dhulu kamu punya lari ada baik: siapa-kah yang sudah tahankan kamu spaya jangan turut kbtulan itu? |
5:8 | Ini macham punya pujok bukan-nya datang deri-pada Tuhan yang panggil kamu. |
5:9 | Sikit saja punya ragi boleh ragikan satu gumpal punya tpong. |
5:10 | Dalam Tuhan sahya ada taroh harap sama kamu, ia'itu yang kamu t'ada nanti fikir lain perkara: ttapi orang yang ada kachaukan kamu nanti tanggong dia punya hukuman, siapa-siapa pun baik. |
5:11 | Ttapi, hei sudara-sudara, sahya ini, kalau sahya ada lagi ajarkan sunat, knapa-kah sahya kna aniaya lagi? kalau bgitu salib t'ada lagi mnjadi batu terantok. |
5:12 | Sahya suka kalau itu orang smoa yang kachaukan kamu kratkan dia-orang punya diri. |
5:13 | Kerna kamu ini, hei sudara-sudara, sudah di-panggil spaya boleh dapat kbebasan; chuma jangan-lah kamu pakai ini kbebasan jadi satu jalan mau turut tabi'at dunia, ttapi oleh kaseh biar-lah kamu mnjadi hamba satu sama lain. |
5:14 | Kerna s-gnap hukum-taurit itu boleh di-jmlahkan dalam ini satu perkata'an, ia'itu; "Biar-lah angkau kaseh sama orang sblah-mnyblah sperti angkau punya diri." |
5:15 | Ttapi jikalau kamu gigit dan makan satu sama lain, jaga baik-baik spaya jangan pula kamu kna binasa satu sama lain. |
5:16 | Ttapi sahya bilang, berjalan turut Roh, dan kamu t'ada nanti gnapkan tabi'at dunia punya k'inginan. |
5:17 | Kerna tabi'at dunia punya k'inginan mlawan Roh itu, dan Roh pun mlawan tabi'at dunia: kerna ini dua-dua ada sliseh satu sama lain: spaya kamu jangan buat apa yang kamu suka. |
5:18 | Ttapi kalau Roh ada pimpinkan sama kamu, tntu-lah kamu bukan-nya di bawah hukum-taurit. |
5:19 | Tabi'at dunia punya perbuatan ada nyata, ia'itu, persundalan, kotoran, perchabolan, |
5:20 | smbahyang datok, obat-guna, permusohan, perklahian, chmburu, marah, perlawanan, perchraian, pertngkaran, |
5:21 | dngki, mabok, lazat, dan s-bagai-nya: deri-hal ini smoa sahya bilang sama kamu lbeh dhulu, sperti dhulu sahya sudah bilangkan, ia'itu orang yang buat ini smoa t'ada nanti dapat kraja'an Allah mnjadi dia punya psaka. |
5:22 | Ttapi Roh punya buah-buahan, ia'itu, kaseh, ksuka'an, sntosa, panjang-hati, kmurahan, kbaikan, kperchaya'an, |
5:23 | lmah-lmbot, mnahan-diri: t'ada satu hukum yang larangkan ini smoa. |
5:24 | Dan Isa Almaseh punya orang sudah salibkan tabi'at dunia dngan nafsu dan k'inginan-nya. |
5:25 | Jikalau kita hidop dngan kuasa Roh, biar-lah kita bawa diri pun dngan kuasa Roh. |
5:26 | Jangan kita jadi sombong, sampai bawa sakit-hati satu sama lain, dan dngki pun satu sama lain. |