2:1 | Kmdian, lpas ampat-blas tahun, sahya naik pergi Yerusalim lagi s-kali, sama-sama Bar-nabas, dan bawa Titus sama-sama sahya. |
2:2 | Dan sahya sudah naik sana turut knyata'an Allah; dan sahya sudah trangkan k-pada dia-orang itu injil yang sahya ada khabarkan di antara orang bangsa-asing, ttapi chuma s'orang-s'orang saja, k-pada orang-orang yang bernama, spaya jangan pula perchuma saja sahya punya kerja itu tempo, atau lbeh dhulu. |
2:3 | Ttapi Titus pun, yang ada sama-sama sahya, dia-orang t'ada paksa sunatkan sunggoh pun dia satu orang Grik: |
2:4 | ttapi deri sbab itu palsu punya sudara-sudara yang orang sudah bawa masok churi-churi, dan ini smoa sudah masok churi-churi mau intai kita punya kbebasan yang kita ada dalam Isa Almaseh, spaya bikin hamba sama kita; |
2:5 | ttapi sama ini orang smoa satu jam pun kita t'ada undor dan tundok; spaya injil punya kbtulan boleh tinggal ttap sama kamu. |
2:6 | Ttapi deri-pada orang-orang yang bernama itu (baik apa pun dia-orang punya hal sahya t'ada pduli; Allah bukan-nya trima orang deri sbab rupa-nya)-itu orang yang bernama t'ada tambahkan apa-apa sama sahya: |
2:7 | balek, bila dia-orang tengok yang k-pada sahya sudah di-srahkan orang ta'bersunat punya injil, sperti orang bersunat punya k-pada Petrus |
2:8 | (kerna dia yang sudah bkerja di dalam Petrus mnjadikan dia rasul k-pada orang yang bersunat, dia juga yang bkerja di dalam sahya pula kerna orang bangsa-asing); |
2:9 | dan bila dia-orang dapat tahu itu anugrah yang sudah di-brikan k-pada sahya, Yakob dan Kifas dan Yahya, yang di-bilangkan jadi tiang-tiang, sudah kasi tangan kanan sama sahya dan Bar-nabas, jadi tanda persahabatan, spaya kita ini boleh pergi k-pada orang bangsa-asing, dan dia-orang pula k-pada orang yang pegang sunat; |
2:10 | chuma kita msti ingatkan orang-orang miskin: dan itu-lah juga yang sahya rajin mau buat. |
2:11 | Ttapi bila Petrus datang di Antakiah, sahya mlawan sama dia bertntang, sbab dia sudah salah: |
2:12 | Kerna s-blum ada orang datang deri Yakob, Petrus makan sama-sama orang bangsa-asing: ttapi bila dia-orang datang saja, dia undor, dan asingkan diri-nya, sbab dia takot sama orang yang pegang adat sunat. |
2:13 | Dan lain-lain orang Yahudi pun buat pura-pura bgitu sama-sama Petrus; sampaikan Bar-nabas pun sudah di-ssatkan oleh dia-orang punya pura-pura. |
2:14 | Ttapi bila sahya tengok yang dia-orang punya klakuan t'ada lurus sperti injil punya kbtulan, sahya kata sama Petrus di dpan smoa orang, "Jikalau angkau ini, satu orang Yahudi, bawa hidopan chara bangsa-asing, dan bukan chara Yahudi, bagimana pula angkau mau paksakan orang bangsa-asing ikut chara Yahudi? |
2:15 | Kita ini punya asal orang Yahudi, bukan-nya orang-orang berdosa deri antara bangsa-asing, |
2:16 | ttapi sbab kita tahu juga yang satu orang bukan-nya boleh di-bnarkan oleh sbab dia buat sperti hukum-taurit, ttapi chuma oleh perchaya dalam Isa Almaseh saja, kita ini pun sudah perchaya sama Isa Almaseh, spaya kita pun boleh di-bnarkan deri sbab perchaya dalam Almaseh, dan bukan-nya deri sbab kita buat sperti hukum-taurit: kerna satu orang pun ta'boleh di-bnarkan deri sbab buat sperti hukum-taurit." |
2:17 | Ttapi jikalau waktu kita chari jalan mau di-bnarkan dalam Almaseh, orang jumpa sama kita jadi orang berdosa, Almaseh itu jadi dosa punya playan-kah? |
2:18 | Skali-kali tidak. Kerna kalau sahya naikkan s-mula apa-apa yang sahya sudah rubohkan, sahya nyatakan yang sahya ini orang salah. |
2:19 | Kerna oleh hukum-taurit sahya sudah mati k-pada hukum-taurit, spaya sahya boleh hidop k-pada Allah. |
2:20 | Sahya sudah tersalib dngan Almaseh: ttapi sahya hidop juga; bukan-nya sahya pula, ttapi Almaseh yang hidop dalam sahya: dan sahya punya kahidopan ini dalam badan, sahya ada hidop dngan perchaya, ia'itu perchaya dalam Anak Allah, yang sudah kaseh sama sahya, dan sudah srahkan diri-nya kerna sahya. |
2:21 | Bukan-nya sahya sblahkan Allah punya anugrah: kerna jikalau kbnaran datang oleh hukum-taurit, tntu-lah Almaseh sudah mati dngan sia-sia. |