| 2:1 | Ttapi fasal sahya sndiri, sahya sudah tntukan ta'mau datang k-pada kamu lagi skali dngan susah hati. |
| 2:2 | Kerna jikalau sahya buat kamu susah-hati, siapa-kah yang nanti kasi sahya suka-hati pula, kalau tidak orang yang sahya sudah buat susah-hati? |
| 2:3 | Dan sahya sudah tuliskan ini perkara juga, spaya bila sahya datang pula jangan sahya dapat ksusahan deri-pada orang-orang yang patut kasi sahya ksuka'an; kerna sahya ada harap sama kamu smoa, ia'itu yang sahya punya ksuka'an sama juga kamu smoa punya ksuka'an. |
| 2:4 | Kerna sahya sudah tulis sama kamu dngan banyak ksusahan dan pchah hati, serta dngan banyak ayer-mata; bukan-nya spaya buat kamu susah-hati, ttapi spaya kamu boleh tahu brapa banyak kaseh yang sahya ada k-pada kamu. |
| 2:5 | Ttapi jikalau satu orang sudah kasi ksusahan, bukan-nya sama sahya yang dia sudah kasi ksusahan, ttapi sama kamu smoa, ia'itu sdikit saja (jangan pula sahya mnjadi terlampon kras). |
| 2:6 | K-pada itu macham punya orang, chukop-lah itu seksa yang kbanyakan orang sudah ltakkan; |
| 2:7 | jadi itu, balek, lbeh baik kamu ampunkan dan hiburkan sama dia, spaya jangan pula itu macham punya orang kna tngglam dalam terlalu banyak ksusahan. |
| 2:8 | Sbab itu sahya minta kamu ttapkan-lah kamu punya kaseh sama dia. |
| 2:9 | Kerna ini-lah sbab-nya sahya sudah tulis sama kamu, ia'itu spaya sahya boleh choba sama kamu, mau tahu kalau kamu ada turut prentah dalam smoa perkara. |
| 2:10 | Ttapi sama siapa yang kamu sudah ampunkan apa-apa, sahya pun bgitu juga: kerna jikalau sahya sudah ampunkan apa-apa, sahya sudah ampunkan dpan mata Almaseh deri sbab kamu; |
| 2:11 | spaya jangan pula Setan dapat jalan mnang di atas kita, kerna bukan-nya kita ta'tahu dia punya pusing-blit. |
| 2:12 | Bila sahya sudah sampai di Troas mau khabarkan injil Almaseh, dan satu pintu terbuka kerna sahya dalam Tuhan. |
| 2:13 | sahya t'ada rasa snang di dalam roh sahya, sbab sahya t'ada dapat jumpa sahya punya sudara Titus: ttapi sahya minta lpas deri-pada orang-orang itu, dan kluar pergi Makadoniah. |
| 2:14 | Ttapi shukor-lah k-pada Allah yang slalu bawa kita berarak dngan kmnangan dalam Almaseh, dan mashhurkan pngtahuan-nya oleh kita sperti bau-bauan di dalam s-lagi tmpat. |
| 2:15 | Kerna k-pada Allah kita ini mnjadi Almaseh punya bau yang wangi, baik di antara orang yang dalam jalan slamat, atau di antara orang yang dalam jalan binasa; |
| 2:16 | sama ini orang kita mnjadi satu bau yang datang deri-pada kmatian, dan bawa kmatian; ttapi sama itu orang pula kita mnjadi satu bau yang datang deri hidop, dan bawa hidop. Dan siapa-kah ada padan sama ini smoa? |
| 2:17 | Kerna kita ini bukan-nya sperti kbanyakan orang yang champur-mnyampurkan perkata'an Allah; ttapi dngan tulus hati, sperti deri-pada Allah, kita chakap dalam Almaseh dpan Allah. |
2 Corinthians 2 - Alkitab Melayu Baba
