13:1 | Ini nombor tiga kali sahya mau pergi k-pada kamu. Atas dua atau tiga saksi punya mulut tiap-tiap perkata'an nanti di-tgohkan. |
13:2 | Sahya sudah bilang lbeh dhulu, dan skarang pun sahya bilang lbeh dhulu, sperti tempo sahya ada sama-sama kamu nombor dua kali, bgitu juga skarang, sunggoh pun sahya ada jauh, sahya bilang sama orang yang dhulu sudah buat dosa, dan sama lain-lain orang pun, yang kalau sahya datang lagi s-kali, sahya t'ada nanti sayangkan orang; |
13:3 | sdang kamu chari satu ktrangan yang Almaseh ada chakap dalam sahya; dia yang bukan-nya lmah k-pada kamu, ttapi kuat di antara kamu smoa: |
13:4 | kerna dia sudah kna salib oleh klmahan, ttapi dia ada hidop pula oleh kuasa Allah. Kerna kita ini pun ada lmah dalam dia, ttapi k-pada kamu smoa kita nanti hidop sama-sama dia oleh kuasa Allah deri sbab kamu. |
13:5 | Preksa-lah sama kamu punya diri sndiri, ya-kah kamu di dalam itu iman; uji-lah kamu punya diri sndiri. Atau bukan-kah kamu tahu kamu punya diri yang Isa Almaseh ada di dalam kamu, mlainkan jikalau kamu ta'boleh tahan uji? |
13:6 | Ttapi sahya harap yang kamu nanti dapat tahu yang kita ini bukan-nya ta'boleh tahan uji. |
13:7 | Jadi, kita minta do'a sama Allah, jangan kamu buat apa-apa yang jahat; bukan-nya spaya jadi nyata kita ini tahan uji, ttapi spaya kamu boleh buat apa yang btul, sunggoh pun kita ini jadi sperti orang yang ta'tahan uji. |
13:8 | Kerna kita t'ada kuasa buat apa-apa mlawan kbtulan, ttapi kerna kbtulan itu. |
13:9 | Kerna kita bersuka-suka bila kita lmah, dan kamu pula mnjadi kuat: ini-lah kita ada mintakan, ia'itu spaya kamu boleh di-smpurnakan. |
13:10 | Itu sbab-lah sahya ada tulis ini smoa waktu sahya ada jauh, spaya bila sahya ada bersama-sama jangan pula sahya jadi kras, sperti kuasa yang Tuhan sudah kasi sama sahya spaya tgohkan orang, bukan-nya mau rubohkan. |
13:11 | Pnghabisan skali, tabek-lah, hei sudara-sudara. Biar-lah kamu di-smpurnakan; biar-lah kamu di-hiburkan; biar-lah kamu jadi satu hati; biar-lah kamu sjahtra: dan Allah sgala kaseh dan sjahtra itu nanti bersama-sama kamu smoa. |
13:12 | Kasi tabek satu sama lain dngan chium yang kudus. |
13:13 | Smoa orang kudus kirim tabek sama kamu. |
13:14 | Biar-lah anugrah Tuhan kita Isa Almaseh, dan kaseh Allah, dan persahabatan Roh Alkudus bersama-sama kamu smoa. |