11:1 | Sahya suka kamu sabarkan sama sahya dalam hal sdikit kbodohan: ttapi kamu ini ada juga sabarkan sama sahya. |
11:2 | Kerna sahya ada chmburu kerna kamu dngan Allah punya chmburuan: kerna sahya sudah tunangkan kamu sama satu laki, mau mnghadapkan k-pada Almaseh satu anak-dara yang suchi. |
11:3 | Ttapi sahya takot, jangan pula sperti ular itu sudah tipukan Hawa dngan cherdek-nya, bgitu juga kamu punya ingatan pun nanti kna rosak, sampai kamu tinggalkan tulus-hati dan ksuchian yang patut sama Almaseh. |
11:4 | Kerna jikalau orang yang datang k-pada kamu itu ada khabarkan lain macham punya Almaseh, yang kita t'ada khabarkan, atau jikalau kamu trima satu roh yang lain deri-pada roh yang dhulu kamu trima, atau satu injil yang lain deri-pada injil yang dhulu kamu sambot, itu baik kamu sabarkan. |
11:5 | Kerna sahya bilangkan diri sahya ini sikit pun t'ada kurang deri-pada itu rasul-rasul yang bsar skali. |
11:6 | Ttapi sunggoh pun sahya kurang paham dalam hal perchakapan, bukan bgitu dalam hal pngtahuan; dan dalam smoa perkara kita sudah nyatakan bgini k-pada kamu di antara sgala orang. |
11:7 | Atau ada-kah sahya berdosa bila sahya rndahkan diri sahya spaya kamu boleh di-tinggikan, ia'itu sbab sahya khabarkan injil Allah k-pada kamu dngan t'ada bayeran? |
11:8 | Lain-lain eklisia sahya rugikan, sdang sahya ambil dia punya upah spaya sahya boleh mlayankan kamu; |
11:9 | dan bila sahya ada sama-sama kamu pun dan ada terkurang, t'ada juga sahya kasi brat sama satu orang pun; kerna apa-apa yang sahya terkurang sudah di-chukopkan oleh sudara-sudara bila dia-orang datang deri Makadoniah; dan dalam smoa perkara sahya sudah ingat baik-baik jangan sahya kasi brat sama kamu, dan sahya nanti ingat lagi. |
11:10 | Sperti Almaseh punya kbtulan ada sama sahya, sahya punya kmgahan ini t'ada nanti kna larang dalam sgala jajahan Akhayah. |
11:11 | Apa sbab? sbab sahya t'ada kaseh sama kamu-kah? Allah juga yang tahu. |
11:12 | Ttapi apa yang sahya buat itu, sahya nanti buat lagi, spaya sahya boleh kratkan jalan deri-pada orang yang chari jalan atas kita; spaya di dalam apa-apa yang dia-orang mgahkan diri-nya dia-orang boleh terjumpa sama sperti kita. |
11:13 | Kerna itu macham punya orang smoa rasul-rasul yang palsu, yang bkerja dngan tipu-daya, dan buat diri-nya sperti rasul-rasul Almaseh. |
11:14 | Ttapi itu t'ada hairan; kerna Setan pun buat diri-nya sperti satu mla'ikat trang. |
11:15 | Sbab itu bukan-nya perkara bsar kalau dia punya playan pula buat dia-orang punya diri sperti kbnaran punya playan; dan dia-orang punya ksudahan nanti mnjadi s-kdar pkerja'an-nya. |
11:16 | Lagi skali sahya bilang, jangan satu orang fikirkan sahya bodoh: ttapi kalau kamu sangka bgitu, sambot-lah sahya sperti satu orang bodoh juga, spaya sahya pun boleh dapat mgahkan diri sahya sdikit. |
11:17 | Apa yang sahya ada bilang, itu sahya bilang bukan-nya sperti kahandak Tuhan, ttapi sperti dngan kbodohan, dalam hal sahya mgahkan diri bgini kuat. |
11:18 | Sdang banyak orang ada mgahkan diri-nya turut tabi'at dunia, sahya pun mau mgahkan diri. |
11:19 | Kerna dngan suka-hati kamu sabarkan sama orang bodoh, sunggoh pun kamu sndiri bijaksana. |
11:20 | Kerna kamu sabarkan juga jikalau orang buat hamba sama kamu, kalau orang makankan, kalau orang tangkap, kalau orang bsarkan diri-nya, kalau orang lpak kamu punya muka. |
11:21 | Sahya chakap mau hinakan diri, sperti katakan diri kita lmah. Ttapi jikalau orang ada brani dalam apa-apa, sahya pun brani juga (ini sahya chakap dngan kbodohan). |
11:22 | Dia-orang orang Ibrani-kah? bgitu juga sahya. Dia-orang orang Isra'el-kah? bgitu juga sahya. Dia-orang kturunan Ibrahim-kah? bgitu juga sahya. |
11:23 | Dia-orang playan Almaseh-kah? (ini sahya chakap sperti hilang akal) sahya ini lbeh lagi. Dalam kpnatan terlbeh lagi, dalam hal kna jel terlbeh lagi, dalam hal kna ssah terlalu banyak, hampir mati banyak kali. |
11:24 | Deri-pada orang Yahudi punya tangan lima kali sahya sudah kna kurang-satu ampat puloh sbat. |
11:25 | Tiga kali sahya kna tongkat, satu kali sahya kna hntam batu, tiga kali kna kapal karam, satu siang satu malam sahya terhanyut di laut; |
11:26 | krap kali berjalan-jalan, dalam bahya ayer sungai, dalam bahya pnyamon, dalam bahya orang bangsa sndiri, dalam bahya orang bangsa-asing, dalam bahya di negri, dalam bahya di tanah sunyi, dalam bahya di lautan, dalam bahya antara palsu punya sudara; |
11:27 | dalam hal kpnatan dan ksusahan, krap kali kna berjaga malam, dalam lapar dan haus, krap kali ta'makan, kna sjok dan tlanjang. |
11:28 | Dngan t'ada sbot lain-lain perkara, ada satu sahya punya tanggongan s-hari-hari, ia'itu khuatir deri-hal sgala eklisia. |
11:29 | Siapa-kah yang lmah, dngan t'ada sahya pun lmah? dan siapa pula kna terantok, dngan t'ada sahya mradang? |
11:30 | Jikalau msti juga sahya mgahkan diri, sahya mau mgahkan diri fasal perkara-perkara yang nyatakan sahya punya klmahan. |
11:31 | Dan Allah, Bapa Tuhan Isa itu, yang di-puji s-lama-lama-nya, dia-lah tahu sahya t'ada chakap bohong. |
11:32 | Di negri Damsek, itu gobernor yang di bawah Raja Aritas suroh jaga negri orang Damsek mau tangkap sama sahya; |
11:33 | dan dalam satu kranjang orang sudah hulorkan sahya turun deri satu jndela trus itu tembok, bharu sahya terlpas deri-pada tangan-nya. |