| 1:1 | Deri-pada Paulus, yang sudah di-panggil dngan kahandak Allah mnjadi rasul Isa Almaseh, dan deri-pada sudara kita Sostines, |
| 1:2 | datang k-pada eklisia Allah yang di negri Korintus, ia'itu orang yang sudah di-kuduskan dalam Isa Almaseh, dan di-panggil spaya mnjadi orang-orang kudus, sama-sama sgala orang yang triak nama Tuhan kita Isa Almaseh, baik di mana tmpat pun, ia'itu Tuhan-nya dan Tuhan kita: |
| 1:3 | biar-lah datang k-pada kamu anugrah dan sjahtra deri-pada Bapa kita Allah, dan deri-pada Tuhan kita Isa Almaseh. |
| 1:4 | Slalu sahya ada mnguchap shukor k-pada sahya punya Allah fasal kamu, sbab anugrah Allah yang sudah di-brikan k-pada kamu dalam Isa Almaseh; |
| 1:5 | yang dalam Almaseh kamu sudah mnjadi kaya dalam smoa perkara, dalam sgala pngajaran dan dalam sgala pngtahuan pun; |
| 1:6 | sperti sahya punya ksaksian deri-hal Almaseh sudah di-ttapkan dalam kamu: |
| 1:7 | sampaikan kamu t'ada kurang dalam satu kurnia pun, sdang kamu ada mnantikan knyata'an Tuhan kita Isa Almaseh; |
| 1:8 | dan dia-lah nanti ttapkan kamu sampai ksudahan, spaya kamu jadi t'ada salah dalam hari Tuhan kita Isa Almaseh. |
| 1:9 | Stiawan-lah Allah yang sudah panggil kamu masok dalam persahabatan Anak-nya, ia'itu Tuhan kita Isa Almaseh. |
| 1:10 | Hei sudara-sudara, oleh nama Tuhan kita Isa Almaseh, sahya minta kamu smoa jadi s-kata, dan jangan jadi pnchraian di antara kamu; ttapi biar-lah kamu rapat bersama-sama dalam satu hati dan satu bichara. |
| 1:11 | Kerna ada orang deri isi rumah Khloe sudah trangkan sama sahya, hei sudara-sudara, yang ada pertngkaran di antara kamu. |
| 1:12 | Ini-lah sahya punya arti, ia'itu, yang masing-masing kamu ada bilang, "Sahya ini Paulus punya;" dan "Sahya ini Apollos punya;" dan "Sahya ini Kifas punya," dan "Sahya Almaseh punya." |
| 1:13 | Almaseh itu sudah di-bhagikan-kah? sudah-kah Paulus di-salibkan kerna kamu? atau sudah-kah kamu di-baptiskan dalam nama Paulus? |
| 1:14 | Sahya mnguchap shukor k-pada Allah yang sahya t'ada baptiskan satu orang pun di antara kamu, chuma Krispus dan Gayus saja, |
| 1:15 | spaya jangan orang bilang kamu sudah di-baptiskan dalam sahya punya nama. |
| 1:16 | Isi rumah Stifanus pun sahya sudah baptiskan: lain deri-pada itu sahya ta'tahu pula kalau sahya sudah baptiskan lain orang lagi. |
| 1:17 | Kerna Almaseh sudah hantarkan sahya bukan mau baptiskan orang, ttapi mau khabarkan injil: dan itu pun bukan dngan perkata'an punya bijaksana, saya jangan pula salib Almaseh itu mnjadi sia-sia. |
| 1:18 | Kerna k-pada orang yang ada dalam jalan binasa, pngajaran salib itu mnjadi satu kbodohan, ttapi k-pada kita yang ada dalam jalan slamat ia'itu mnjadi kuasa Allah. |
| 1:19 | Kerna ada tersurat, "Bijak orang yang bijaksana sahya nanti binasakan, Dan akal orang yang berakal sahya nanti sblahkan." |
| 1:20 | Di mana-kah orang yang bijaksana? di mana-kah orang pnulis? di mana-kah jman ini punya orang pmbantah? bukan-kah Allah sudah bodohkan ini dunia punya bijaksana? |
| 1:21 | Kerna dngan Allah punya bijaksana, sdang dunia ini t'ada knal sama Allah oleh bijaksana-nya sndiri, sudah-lah berknan k-pada Allah mau slamatkan orang yang perchaya oleh itu kbodohan yang kita khabarkan. |
| 1:22 | Sdang orang Yahudi ada minta tanda-tanda, dan orang Grik chari bijaksana: |
| 1:23 | ttapi kita ini ada khabarkan Almaseh yang tersalib, ia'itu satu batu terantok k-pada orang Yahudi, dan satu kbodohan k-pada orang bangsa asing; |
| 1:24 | ttapi k-pada orang-orang yang sudah di-panggil, baik orang Yahudi baik orang Grik, ia'itu-lah Almaseh, Allah punya kuasa dan Allah punya bijaksana. |
| 1:25 | Sbab Allah punya kbodohan ada lbeh bijaksana deri-pada manusia; dan Allah punya klmahan lbeh kuat deri-pada manusia. |
| 1:26 | Kerna tengok-lah, hei sudara-sudara, kamu punya panggilan, yang bukan-nya banyak orang yang bijaksana sperti hitongan orang dunia, bukan-nya banyak orang berkuasa, dan bukan-nya banyak orang yang berpangkat: |
| 1:27 | ttapi Allah sudah pileh ini dunia punya perkara yang bodoh-bodoh mau kasi malu orang yang bijaksana; dan Allah sudah pileh ini dunia punya perkara yang lmah mau kasi malu perkara yang kuat; |
| 1:28 | dan ini dunia punya perkara yang hina, dan yang orang rengankan Allah sudah pileh, dan perkara yang tidak ada pun, mau tidakkan perkara yang ada: |
| 1:29 | spaya jangan satu manusia pun mgahkan diri-nya di dpan Allah. |
| 1:30 | Ttapi deri-pada Allah kamu ini ada dalam Isa Almaseh, yang sudah di-jadikan k-pada kita bijaksana deri-pada Allah, dan kbnaran dan kkudusan dan tbusan: |
| 1:31 | spaya (sperti ada tersurat), "Orang yang mgahkan diri, biar dia mgahkan diri-nya dalam Tuhan." |
1 Corinthians 1 - Alkitab Melayu Baba
