16:1 | Fasal wang kumpolan kerna orang-orang kudus itu, sperti sahya sudah tntukan k-pada sgala eklisia di Galatiah, baik kamu pun buat bgitu juga. |
16:2 | Tiap-tiap hari yang pertama dalam s-minggo, biar-lah kamu masing-masing taroh di rumah dan simpankan, s-kdar dia beruntong, spaya jangan ada kumpolan wang bila sahya datang. |
16:3 | Dan bila sahya sampai, siapa-siapa yang kamu bnarkan dngan surat kiriman, sama dia-orang-lah sahya nanti suroh bawa kamu punya pmbrian pergi di Yerusalim: |
16:4 | dan kalau patut yang sahya pun pergi, boleh-lah juga dia-orang pergi sama-sama sahya. |
16:5 | Ttapi sahya nanti datang k-pada kamu bila sahya sudah jalan lalu Makadoniah; kerna sahya mau juga lalu Makadoniah; |
16:6 | dan barangkali sahya nanti tinggal sama-sama kamu, atau satu musim sjok pun spaya kamu ini boleh hantarkan sahya baik di mana sahya mau pergi. |
16:7 | Kerna ini satu kali sahya ta'mau chuma singgah saja sama kamu; sbab sahya ada harap mau tinggal sikit lama sama kamu, kalau Tuhan kasi. |
16:8 | Ttapi sahya nanti tinggal lagi di Ifisus sampai hari Pentekosta; |
16:9 | kerna sudah terbuka sama sahya satu pintu yang bsar dan yang berguna, dan banyak juga orang yang mlawan. |
16:10 | Jikalau Timotius datang, ingat-lah baik-baik jangan dia jadi takot di antara kamu; kerna dia pun buat pkerja'an Tuhan, sama sperti sahya pun: |
16:11 | sbab itu jangan satu orang pun tengok ta'mata sama dia. Ttapi hantarkan-lah dia berjalan dngan sjahtra, spaya dia boleh datang k-pada sahya: kerna sahya ada mnantikan dia dngan sudara-sudara itu. |
16:12 | Ttapi deri-hal sudara kita Apollos itu, sahya-sudah banyak minta sama dia pergi k-pada kamu dngan sudara-sudara itu: ttapi skali-kali t'ada kahandak-nya mau pergi skarang; ttapi dia nanti pergi bila-bila ada waktu snang. |
16:13 | Berjaga-lah, berdiri-lah ttap dalam perchaya, jadi-lah anak jantan, jadi-lah kuat. |
16:14 | Smoa kamu punya perkara buat-lah dngan kaseh. |
16:15 | Hei sudara-sudara, sahya minta kamu satu fasal (kamu pun tahu Stifanus punya isi rumah, yang itu-lah buah-bungaran orang Akhayah, dan dia-orang sudah tntukan diri dia-orang mau mlayankan orang-orang kudus), |
16:16 | sahya minta kamu tundok-lah k-pada ini macham punya orang, dan k-pada masing-masing orang yang tolong kita bkerja dan berpnat. |
16:17 | Dan sahya suka sbab Stifanus dan Fortunatus dan Akhayikus sudah datang: kerna dia-orang sudah chukopkan kamu punya kkurangan. |
16:18 | Kerna dia-orang sudah sgarkan roh sahya dan roh kamu pun: sbab itu baik-lah kamu mngaku ini macham punya orang. |
16:19 | Sgala eklisia di Asiah kirim tabek k-pada kamu. Akula sama Priska, dngan eklisia yang di dalam rumah-nya, kirim banyak-banyak tabek k-pada kamu dalam Tuhan. |
16:20 | Dan sgala sudara-sudara kirim tabek k-pada kamu. Bri-lah tabek satu sama lain dngan chium yang kudus. |
16:21 | Sahya Paulus ini kirim tabek dngan sahya sndiri punya tangan. |
16:22 | Jikalau satu orang t'ada kaseh sama Tuhan kita, biar dia kna la'anat. Tuhan ada datang. |
16:23 | Biar-lah anugrah Tuhan kita Isa Almaseh bersama-sama kamu. |
16:24 | Sahya punya kaseh bersama-sama kamu sklian dalam Isa Almaseh. Amin. |