15:1 | Dan sahya kasi tahu k-pada kamu, hei sudara-sudara, itu injil yang sahya sudah khabarkan k-pada kamu, dan yang kamu sudah trima, dan yang dalam-nya kamu berdiri ttap, |
15:2 | dan yang oleh-nya kamu dapat slamat; jikalau kamu ttap pegang itu perkata'an yang sahya sudah khabarkan k-pada kamu, ia'itu jikalau kamu punya perchaya bukan sia-sia. |
15:3 | Kerna sahya sudah srahkan k-pada kamu mula-mula apa yang sahya sudah trima, ia'itu bagimana Almaseh sudah mati kerna kita punya dosa-dosa, sperti kitab punya surat; |
15:4 | dan bagimana dia sudah di-tanamkan; dan sudah di-bangkitkan hari yang ktiga, sperti kitab punya surat; |
15:5 | dan bagimana dia sudah ternampak k-pada Kifas: dan kmdian k-pada itu dua-blas orang; |
15:6 | dan kmdian deri-pada itu dia ternampak k-pada lbeh lima-ratus sudara-sudara sama skali, yang kbanyakan-nya ada lagi hidop sampai skarang, ttapi yang ada sudah tertidor; |
15:7 | dan habis itu dia ternampak k-pada Yakob pula; kmdian k-pada smoa rasul-rasul; |
15:8 | dan pnghabisan skali bharu dia ternampak k-pada sahya pula, sperti k-pada satu anak guguran. |
15:9 | Kerna sahya ini-lah yang terkchil skali di antara sgala rasul, dan sahya t'ada layak di-sbotkan rasul, sbab sahya sudah aniayakan eklisia Allah. |
15:10 | Ttapi oleh anugrah Allah juga sahya sudah jadi sperti yang sahya ada ini: dan anugrah-nya yang dia sudah anugrahkan k-pada sahya itu bukan-nya sia-sia saja; ttapi sahya sudah bkerja lbeh deri-pada dia-orang smoa: dalam pada itu bukan-nya sahya, ttapi anugrah Allah yang bersama-sama sahya. |
15:11 | Jadi itu baik sahya baik dia-orang, bgitu-lah kita ada khabarkan, dan bgitu-lah kamu sudah perchaya. |
15:12 | Jikalau orang khabarkan deri-hal Almaseh, yang dia sudah di-bangkitkan deri antara orang mati, bagimana pula ada orang antara kamu boleh bilang yang tidak ada kbangkitan orang mati? |
15:13 | Ttapi kalau btul tidak ada kbangkitan orang mati, Almaseh pun bukan-nya sudah di-bangkitkan: |
15:14 | dan kalau Almaseh pula t'ada di-bangkitkan, sia-sia-lah kita punya khabaran, dan sia-sia-lah kamu punya perchaya. |
15:15 | Dan jadi nyata pula yang kita mnjadi saksi bohong deri-hal Allah; kerna kita sudah bersaksi deri-hal Allah yang dia sudah bangkitkan Almaseh itu: yang Allah t'ada bangkitkan kalau btul juga orang mati t'ada di-bangkitkan. |
15:16 | Kerna jikalau orang mati t'ada bangkit, Almaseh pun bukan-nya sudah di-bangkitkan: |
15:17 | ttapi jikalau Almaseh bukan-nya sudah di-bangkitkan, sia-sia-lah kamu punya perchaya; dan kamu ada lagi dalam kamu punya dosa. |
15:18 | Dan lagi pun, smoa orang yang sudah tertidor dalam Almaseh sudah binasa. |
15:19 | Jikalau chuma dalam ini hidop saja kita ada harap dalam Almaseh, ksian skali kita punya hal lbeh deri-pada smoa manusia. |
15:20 | Ttapi s-btul-nya Almaseh sudah di-bangkitkan deri antara orang mati, mnjadi buah-bungaran di antara sgala orang yang ada tertidor. |
15:21 | Kerna sdang kmatian sudah datang oleh satu manusia, kbangkitan orang-orang mati pun sudah datang oleh satu manusia juga. |
15:22 | Kerna sperti dalam Adam smoa orang ada mati, bgitu juga dalam Almaseh pula smoa orang nanti di-hidopkan. |
15:23 | Ttapi masing-masing pada peraturan-nya sndiri-buah-bungaran-nya Almaseh; kmdian deri-pada itu, Almaseh punya orang smoa waktu dia datang. |
15:24 | Kmdian bharu ksudahan-nya, tempo dia srahkan kraja'an itu k-pada Allah, ia'itu Bapa: tempo dia sudah lnnyapkan sgala prentah, dan kuasa, dan kkuatan. |
15:25 | Kerna dia msti jadi raja, sampaikan dia sudah ltakkan smoa musoh-musoh-nya di bawah kaki-nya. |
15:26 | Dan musoh yang nanti di-lnyapkan yang kmdian skali, ia'itu kmatian. |
15:27 | Kerna "Allah sudah tundokkan sgala perkara di bawah kaki-nya." Ttapi bila dia kata, "Sgala perkara sudah di-tundokkan," jadi nyata skali yang Allah yang sndiri sudah tundokkan sgala perkara k-pada dia t'ada masok dalam itu bilangan. |
15:28 | Dan bila sgala perkara sudah di-tundokkan k-pada dia, itu jam pula bharu itu Anak pun nanti di-tundokkan k-pada dia yang sudah tundokkan sgala perkara k-pada dia, spaya Allah mnjadi smoa dalam smoa. |
15:29 | Kalau tidak bgini, apa-kah nanti dia-orang buat yang ada di-baptiskan kerna orang mati? Jikalau orang mati t'ada skali-kali di-bangkitkan, knapa-kah orang di-baptiskan kerna orang mati itu? |
15:30 | Dan knapa-kah kita pun kna bahya tiap-tiap jam? |
15:31 | S-hari-hari sahya ada mati, sahya mngaku bgitu, hei sudara-sudara, oleh itu kmgahan deri-hal kamu yang sahya ada dalam Tuhan kita Isa Almaseh. |
15:32 | Jikalau sahya sudah berlaga sama binatang di negri Ifisus, sperti kbanyakan manusia, apa-kah sahya punya untong? Jikalau orang mati t'ada di-bangkitkan, baik-lah kita makan-minum, kerna besok kita mati. |
15:33 | Jangan-lah kna tipu: "Persahabatan yang jahat rosakkan adat yang baik." |
15:34 | Baik-lah kamu sdar sperti patut, dan jangan buat dosa: kerna ada orang yang t'ada tahu sama Allah: sahya bilang bgini spaya kasi kamu rasa malu. |
15:35 | Ttapi ada orang pula nanti kata, "Bagimana-kah orang mati di-bangkitkan? dan dngan apa macham punya badan dia-orang nanti datang? |
15:36 | Hei orang bodoh, apa-apa yang angkau taburkan t'ada nanti jadi hidop kalau s-blum mati dhulu: |
15:37 | dan apa yang angkau taburkan itu, bukan-nya badan yang nanti mnjadi yang angkau taburkan, ttapi chuma satu bneh saja, 'ntah trigu-kah atau lain-lain jnis; |
15:38 | ttapi Allah kasi dia satu badan sperti kahandak-nya, dan masing-masing bneh ada badan-nya sndiri. |
15:39 | Apa-apa yang ada nyawa, bukan-nya smoa-nya sama satu rupa: ttapi manusia lain, dan binatang lain rupa, dan burong-burong lain rupa, dan ikan-ikan pun lain. |
15:40 | Shorga punya badan pun ada, dan dunia punya badan pun ada: ttapi kmulia'an yang shorga punya lain, dan kmulia'an yang dunia punya lain. |
15:41 | Matahari punya kmulia'an lain, dan bulan punya kmulia'an lain, dan bintang-bintang punya kmulia'an pun lain: kerna fasal kmulia'an, satu bintang ada lain-nya deri-pada lain bintang. |
15:42 | Bgitu juga kbangkitan orang mati. Ia'itu di-tabur dngan hal kbinasa'an; di-bangkitkan dngan hal t'ada kbinasa'an: |
15:43 | di-tabur dngan kahina'an, di-bangkitkan dngan kmulia'an: di-tabur dngan klmahan, di-bangkitkan dngan kuasa: |
15:44 | di-tabur satu badan yang bernyawa, di-bangkitkan satu badan yang rohani. Kalau ada badan yang bernyawa, ada pula badan yang rohani. |
15:45 | Bgitu-lah ada tersurat, "Adam, manusia yang pertama, mnjadi nyawa yang hidop." Adam yang pnghabisan pula mnjadi roh yang kasi hidop. |
15:46 | Dalam pada itu bukan mula-mula yang rohani, ttapi yang bernyawa: kmdian bharu yang rohani pula. |
15:47 | Manusia yang pertama itu deri bumi, tanah punya: manusia yang nombor dua pula deri shorga. |
15:48 | Sperti dia yang tanah punya, bgitu juga smoa orang yang tanah punya: dan sperti dia yang shorga punya, bgitu juga smoa orang yang shorga punya. |
15:49 | Dan sperti kita sudah jadi s-rupa sama dia yang tanah punya, kita nanti jadi s-rupa sama dia yang shorga punya. |
15:50 | Hei sudara-sudara, ini-lah sahya punya kata, ia'itu daging dan darah ta'boleh dapat kraja'an Allah mnjadi psaka; dan hal binasa ta'boleh dapat hal t'ada binasa mnjadi psaka. |
15:51 | Ingat, sahya katakan sama kamu satu ruhsia: Bukan-nya kita smoa nanti tertidor, ttapi kita smoa nanti di-ubahkan, |
15:52 | dngan s-kjapan, dngan s-klip mata, waktu bunyi trompet yang pnghabisan itu: kerna trompet nanti berbunyi, dan orang mati nanti di-bangkitkan dngan hal yang t'ada binasa, dan kita ini nanti di-ubahkan. |
15:53 | Kerna yang nanti binasa ini msti pakai hal yang t'ada binasa, dan yang nanti mati ini msti pakai hal yang t'ada mati. |
15:54 | Ttapi bila yang nanti binasa ini sudah pakai hal t'ada binasa, dan yang nanti mati ini sudah pakai hal yang t'ada mati, itu ktika bharu-lah jadi sperti itu perkata'an yang ada tersurat, "Kmatian sudah kna tlan dalam kmnangan." |
15:55 | Hei kmatian, di mana-kah angkau punya kmnangan? Hei kmatian, di mana-kah angkau punya sngat? |
15:56 | Kmatian punya sngat, ia'itu dosa; dan dosa punya kuasa, ia'itu hukum-taurit: |
15:57 | ttapi shukor k-pada Allah yang kasi sama kita kmnangan oleh Tuhan kita Isa Almaseh. |
15:58 | Sbab itu, hei sudara-sudara yang kkaseh, biar-lah kamu ttap, dngan t'ada bergrak, slalu berusaha dalam pkerja'an Tuhan, sdang kamu tahu juga yang kamu punya pnat dalam Tuhan t'ada-lah sia-sia. |