| 15:1 | Kita ini yang kuat patut tanggongkan klmahan orang yang ta'kuat, dan jangan sukakan diri sndiri. |
| 15:2 | Biar-lah kita masing-masing sukakan orang sblah-mnyblah-nya kerna perkara yang baik, spaya boleh tgohkan dia. |
| 15:3 | Kerna Almaseh skali pun t'ada sukakan diri-nya sndiri: ttapi, sperti ada tersurat, "Kchla'an orang yang chlakan angkau sudah timpa atas sahya." |
| 15:4 | Kerna apa-apa yang sudah tertulis dhulu-dhulu smoa itu sudah di-tuliskan mnjadi plajaran sama kita, spaya kita dapat harap deri sbab sabar, dan deri sbab pnghiburan yang datang deri-pada kitab-kitab. |
| 15:5 | Biar-lah Allah, yang mmbri sabar dan pnghiburan itu, kasi kamu jadi s-tuju satu sama lain, turut sperti hati Isa Almaseh: |
| 15:6 | spaya dngan satu hati dan dngan satu lidah kamu boleh muliakan Allah, ia'itu Bapa Tuhan kita Isa Almaseh. |
| 15:7 | Sbab itu sambot-lah satu sama lain, sperti Almaseh sudah sambot sama kamu, spaya muliakan Allah. |
| 15:8 | Kerna sahya bilang yang Almaseh sudah mnjadi orang bersunat punya playan kerna Allah punya kbtulan, spaya dia boleh sampaikan smoa yang sudah di-janjikan k-pada nenek-moyang kita, |
| 15:9 | dan spaya orang bangsa-asing pun boleh muliakan Allah sbab dia punya ksian; sperti ada tersurat, "Itu sbab-lah sahya nanti bri puji k-pada-mu di antara orang bangsa-asing. Serta nyanyikan nama-mu." |
| 15:10 | Dan lagi dia ada bilang, "Hei kamu orang bangsa-asing, baik-lah kamu bersuka-suka sama-sama dia punya bangsa." |
| 15:11 | Dan lagi skali, "Pujikan Tuhan, hei smoa orang bangsa-asing: Biar-lah sgala bangsa pujikan dia." |
| 15:12 | Dan lagi Yash'aya pula ada bilang, "Nanti ada Akar Yishai itu, Ia'itu-lah yang nanti bangkit mau prentahkan sgala bangsa-asing, Dan sama dia-lah orang bangsa-asing nanti taroh harap." |
| 15:13 | Biar-lah Allah yang mmberi harap pnohkan kamu smoa dngan s-gnap ksuka'an dan sntosa dalam hal kamu perchaya, spaya kamu boleh tambah-tambah pnoh dngan harap oleh kuasa Roh Alkudus. |
| 15:14 | Hei sudara-sudara, sahya ini ada rasa tntu deri-hal kamu smoa, ia'itu yang kamu ada pnoh dngan kbaikan, dan chukop sgala pngtahuan, dan lagi pun ada kuasa nasihatkan satu sama lain. |
| 15:15 | Ttapi lbeh brani sahya sudah tulis sama kamu dalam bbrapa perkara, sperti mau ingatkan kamu, oleh anugrah yang Allah sudah kasi sama sahya, |
| 15:16 | ia'itu yang sahya ini msti jadi psuroh Isa Almaseh k-pada orang bangsa-asing, serta jalankan injil Allah, spaya orang bangsa-asing itu mnjadi persmbahan yang berknan, sdang sudah di-kuduskan oleh Roh Alkudus. |
| 15:17 | Jadi itu, dalam smoa perkara yang sahya buat kerna Allah, sahya ada mgahkan diri sahya dalam Isa Almaseh. |
| 15:18 | Kerna sahya t'ada brani chakap fasal yang lain, chuma yang Almaseh sudah buat oleh sahya, spaya bangsa-asing itu datang mnurut dia punya prentah, baik dalam perkata'an baik dalam perbuatan, |
| 15:19 | dngan kuasa sgala tanda-tanda dan sgala perkara yang hairan, dan dngan kuasa Roh Alkudus; sampaikan mula'i deri negri Yerusalim, dan kliling-nya sampai k-pada Ilirikum, sahya sudah khabarkan injil Almaseh rata-rata; |
| 15:20 | dan sahya punya maksud mau khabarkan injil bukan di tmpat di mana orang sudah sbotkan Almaseh punya nama, spaya sahya jangan naikkan rumah atas lain orang punya alasan; |
| 15:21 | ttapi sperti ada tersurat, "Orang yang blum dapat khabar deri-hal dia, dia-orang pun nanti tengok, Dan orang yang blum dngar pun nanti mngerti." |
| 15:22 | Itu-lah sbab-nya sahya sudah tersangkot, ta'boleh datang k-pada kamu, sudah brapa kali: |
| 15:23 | ttapi skarang sahya t'ada lagi tmpat dalam ini negri smoa, dan brapa tahun punya lama sahya sudah rindu mau datang k-pada kamu, |
| 15:24 | bila-bila sahya blayer pergi negri Spanyol, (kerna sahya ada harap mau jumpa sama kamu dalam perjalanan sahya, dan lagi pun sahya harap kamu boleh hantarkan sahya sampai di sana, jikalau lbeh dhulu sahya punya hati boleh puas sikit sama kamu) |
| 15:25 | ttapi skarang ini sahya ada pergi Yerusalim, mau mlayankan orang kudus di situ. |
| 15:26 | Kerna sudah berknan k-pada orang Makadoniah dan orang Akhayah mau kumpolkan wang kerna sudara-sudara yang miskin antara orang kudus di Yerusalim. |
| 15:27 | Ya, dia-orang sudah berknan, dan dia-orang ada berhutang sama itu orang kudus. Kerna jikalau orang bangsa-asing sudah dapat bhagian dngan dia dalam perkara rohani, patut juga kalau dia-orang layankan dia dalam perkara dunia pula. |
| 15:28 | Jadi itu, bila sahya sudah slsaikan ini perkara, dan sudah tntukan ini buah-buahan k-pada dia-orang, sahya nanti blayer pergi negri Spanyol, dan singgah sama kamu. |
| 15:29 | Dan sahya tahu yang bila sahya datang k-pada kamu, sahya nanti datang dngan s-pnoh-pnoh berkat Almaseh. |
| 15:30 | Hei sudara-sudara, deri sbab Tuhan kita Isa Almaseh, dan deri sbab kaseh yang datang deri-pada Roh, sahya minta sama kamu usahakan-lah diri kamu sama-sama sahya dalam minta do'a k-pada Allah kerna sahya ini; |
| 15:31 | spaya sahya boleh terlpas deri-pada orang di tanah Yahudiah yang t'ada perchaya, dan spaya sahya punya playanan kerna orang di Yerusalim boleh mnjadi berknan k-pada itu orang-orang kudus; |
| 15:32 | spaya sahya boleh datang k-pada kamu dngan ksuka'an oleh kahandak Allah, dan boleh brentikan pnat sama-sama kamu. |
| 15:33 | Biar-lah Allah yang mmbri sjahtra itu bserta dngan kamu smoa. Amin. |
Romans 15 - Alkitab Melayu Baba
