| 14:1 | Orang yang ada Imah dalam perchaya, sambot-lah dia, ttapi jangan mau bichara fasal dia punya sangka-sangka. |
| 14:2 | Ada orang yang ada itu perchaya boleh makan sgala jnis: ttapi orang yang lmah chuma makan sayur. |
| 14:3 | Jangan-lah orang yang ada makan tengok ta'mata sama orang yang t'ada makan; dan orang yang t'ada makan pula, jangan-lah dia salahkan orang yang ada makan: kerna Allah sudah sambot sama dia. |
| 14:4 | Siapa-kah angkau ini yang salahkan orang lain punya hamba? kalau dia berdiri atau jatoh, itu smoa dia punya tuan punya fasal. Ttapi dia nanti berdiri ttap; kerna Tuhan ada kuasa kasi dia berdiri. |
| 14:5 | Ada orang yang indahkan satu hari lbeh deri-pada lain hari: ada orang pula indahkan smoa hari. Biar tiap-tiap orang ttap ktntuan-nya dalam hati sndiri. |
| 14:6 | Itu orang yang ingatkan hari itu, ada ingatkan pada Tuhan: dan orang yang makan, dia itu makan pada Tuhan, kerna dia bri shukor k-pada Allah: dan orang yang t'ada makan, dia itu t'ada makan pada Tuhan juga, dan dia pun bri shukor k-pada Allah. |
| 14:7 | Kerna di antara kita t'ada satu orang pun yang ada hidop pada diri-nya sndiri, atau satu orang pun yang mati pada diri-nya sndiri. |
| 14:8 | Kerna jikalau kita hidop, kita hidop pada Tuhan; atau jikalau kita mati pun, pada Tuhan juga kita mati: sbab itu, baik kita hidop, baik kita mati, kita ini Tuhan-lah punya. |
| 14:9 | Kerna ini-lah sbab-nya Almaseh sudah mati dan hidop s-mula, ia'itu spaya dia boleh mnjadi Tuhan atas orang yang sudah mati dan yang lagi hidop pun. |
| 14:10 | Ttapi, hei angkau ini, knapa angkau salahkan angkau punya sudara? atau angkau itu, knapa angkau pula tengok ta'mata sama angkau punya sudara? kerna kita smoa nanti berdiri mnghadap Allah punya krusi-bichara. |
| 14:11 | "Kerna ada tersurat "Tuhan kata, 'Dmi sahya punya hidop, tiap-tiap lutut nanti lipat di dpan sahya, Dan tiap-tiap lidah nanti mngaku sama Allah.'" |
| 14:12 | Jadi itu, kita masing-masing nanti kasi kira-kira deri-hal diri kita k-pada Allah. |
| 14:13 | Sbab itu jangan-lah kita salahkan satu sama lain lagi: ttapi lbeh baik kamu bicharakan ini hal, ia'itu jangan ltakkan batu terantok atau satu skatan dpan satu sudara. |
| 14:14 | Sahya tahu, dan ada tntu dalam Tuhan Isa, yang satu pun t'ada yang dalam diri-nya mnjadi najis; chuma sama orang yang bilangkan apa-apa mnjadi najis, sama dia-lah itu jadi najis. |
| 14:15 | Kerna jikalau angkau punya sudara mnjadi susah-hati deri sbab angkau punya makanan, bukan-nya angkau turut kaseh punya jalan lagi. Orang yang kerna-nya Almaseh sudah mati, jangan-lah angkau binasakan oleh angkau punya makanan. |
| 14:16 | Kalau bgitu apa yang baik dalam kamu itu, jangan-lah kasi orang chakap jahat: |
| 14:17 | kerna kraja'an Allah bukan-nya makan-minum, ttapi kbnaran dan sjahtra dan ksuka'an dalam Roh Alkudus. |
| 14:18 | Kerna orang yang mnjadi hamba Almaseh dalam dia berbuat bgini, dia itu-lah berknan pada Allah, dan di-bnarkan oleh manusia pun. |
| 14:19 | Jadi itu, biar-lah kita tuntut apa-apa yang mndatangkan sjahtra dan yang tgohkan kita satu sama lain. |
| 14:20 | Jangan-lah rosakkan Allah punya pkerja'an deri sbab makanan. Sgala makanan suchi juga: ttapi salah juga kalau orang makan dngan kasi orang terantok. |
| 14:21 | Baik jangan makan daging, atau minum ayer-anggor, atau apa-apa pun yang terantokkan angkau punya sudara punya kaki |
| 14:22 | Itu perchaya yang ada sama angkau, biar-lah angkau simpan sndiri dpan Allah. Berkat-lah itu orang yang t'ada salahkan diri-nya dalam perkara yang dia ada bnarkan. |
| 14:23 | Ttapi orang yang ada taroh sangka-sangka hati, dia itu salah kalau dia makan, kerna itu bukan deri-pada perchaya asal-nya; dan apa-apa yang asal-nya bukan deri perchaya, ia'itu dosa. |
Romans 14 - Alkitab Melayu Baba
