3:1 | Ada satu orang Farisi bernama Nikodimus, pnghulu orang Yahudi: |
3:2 | dia ini datang k-pada Isa tempo malam, dan kata sama dia, "Ya Rabbi, kita smoa tahu yang Rabbi satu guru yang datang deri-pada Allah: kerna t'ada satu orang pun boleh buat ini tanda-tanda yang Rabbi buat, kalau Allah t'ada sama-sama dia." |
3:3 | Isa jawab kata sama dia, "Dngan sunggoh-sunggoh sahya kata sama angkau, jikalau satu orang t'ada di-beranakkan s-mula, dia ta'boleh tengok kraja'an Allah." |
3:4 | Nikodimus kata sama Isa, "Bagimana orang boleh di-beranakkan bila dia sudah tua? boleh-kah dia masok dalam prot mak-nya lagi skali dan di-beranakkan?" |
3:5 | Isa jawab, "Dngan sunggoh-sunggoh sahya kata sama angkau, jikalau satu orang t'ada di-beranakkan deri-pada ayer dan Roh, dia ta'boleh masok kraja'an Allah. |
3:6 | Apa-apa yang di-beranakkan deri-pada orang punya badan, ia'itu badan juga; dan apa-apa yang di-beranakkan deri-pada Roh, ia'itu Roh juga. |
3:7 | Jangan angkau hairan sbab sahya bilang kamu msti di-beranakkan s-mula. |
3:8 | Itu angin tiop mana dia suka, dan angkau dngar bunyi-nya, ttapi angkau ta'tahu deri mana dia datang dan di mana dia pergi: bgitu-lah hal masing-masing orang yang di-beranakkan deri-pada Roh." |
3:9 | Nikodimus jawab kata sama Isa, "Bagimana pula ini smoa boleh jadi?" |
3:10 | Isa jawab kata sama dia, "Angkau-kah guru orang Isra'el, dan t'ada-kah angkau mngerti ini smoa? |
3:11 | Dngan sunggoh-sunggoh sahya kata sama angkau, apa yang kita tahu itu-lah kita ada chakapkan, dan apa yang kita sudah tengok itu-lah kita ada saksikan; dan kamu smoa t'ada trima kita punya ksaksian. |
3:12 | Jikalau sahya sudah bilangkan kamu deri-hal perkara dunia, dan kamu tidak perchaya, bagimana kamu boleh perchaya kalau sahya bilangkan kamu perkara shorga? |
3:13 | Dan satu orang pun blum naik shorga, chuma dia yang sudah turun deri shorga, ia'itu Anak-manusia yang ada di shorga. |
3:14 | Dan sperti Musa sudah tinggikan itu ular di tanah sunyi, bgitu-lah juga Anak-manusia pun msti di-tinggikan: |
3:15 | spaya masing-masing orang yang perchaya boleh dapat hidop yang kkal dalam dia. |
3:16 | "Kerna bgitu-lah Allah sudah kaseh ini dunia, sampai dia kasi Anak-nya yang tunggal spaya masing-masing orang yang perchaya sama dia jangan binasa, ttapi dapat hidop yang kkal. |
3:17 | Kerna Allah sudah hantarkan Anak-nya datang di dunia bukan-nya mau hukumkan dunia ini; ttapi spaya dunia ini boleh dapat slamat oleh dia. |
3:18 | Orang yang perchaya sama dia t'ada kna hukuman: orang yang t'ada perchaya sudah pun kna hukuman, sbab dia t'ada perchaya nama Anak Allah yang tunggal. |
3:19 | Dan ini-lah hukuman-nya, ia'itu trang sudah datang dalam dunia, dan orang sayang glap lbeh deri-pada trang; kerna dia-orang punya perbuatan jahat. |
3:20 | Kerna tiap-tiap orang yang buat jahat bnchi sama trang, dan tidak datang k-pada trang, spaya jangan perbuatan-nya di-nyatakan. |
3:21 | Ttapi orang yang buat kbtulan dia datang k-pada trang, spaya perbuatan-nya boleh di-trangkan, yang itu smoa sudah di-buatkan dalam Allah." |
3:22 | Habis ini smoa, Isa sama dia punya murid-murid datang masok tanah Yahudiah; dan di situ dia tinggal sama dia-orang sambil baptiskan orang. |
3:23 | Dan Yahya pun ada baptiskan orang di 'Ain-Nun dkat Salim, kerna di situ banyak ayer: dan orang datang dan trima baptis. |
3:24 | Kerna Yahya blum lagi kna masok jel. |
3:25 | Sbab itu jadi satu perbantahan antara Yahya punya murid-murid sama satu orang Yahudi deri-hal adat chuchi. |
3:26 | Jadi dia-orang datang k-pada Yahya, dan kata sama dia, "Ya Rabbi, dia itu yang ada sama-sama guru di sbrang Yordan, dan yang guru sudah saksikan, dia pun ada baptiskan orang, dan smoa orang datang k-pada dia." |
3:27 | Yahya jawab, kata, "Orang ta'boleh trima satu apa pun, kalau itu t'ada di-brikan k-pada dia deri shorga. |
3:28 | Kamu sndiri boleh bersaksi kerna sahya, yang sahya sudah bilang, sahya bukan Almaseh, ttapi sahya sudah di-hantarkan lbeh dhulu dia. |
3:29 | Orang yang ada kmantin prempuan, dia-lah kmantin jantan: ttapi kmantin jantan punya sohbat yang berdiri dngarkan sama dia, dia ini banyak tumpang suka sbab dia dngar kmantin jantan punya suara: bgitu-lah ini sahya punya ksuka'an sudah-lah gnap. |
3:30 | Dia msti makin tambah, ttapi sahya makin kurang." |
3:31 | Dia yang datang deri atas, dia-lah atas sklian: dia yang deri bumi ini, dia-lah deri bumi, dan deri bumi juga dia chakap; dia yang datang deri shorga, dia-lah atas sklian. |
3:32 | Apa yang dia sudah tengok dan dngar, itu-lah dia ada saksikan; dan satu orang pun t'ada trima dia punya ksaksian. |
3:33 | Orang yang sudah trima dia punya ksaksian, dia itu sudah ttapkan yang Allah ada bnar. |
3:34 | Kerna dia yang Allah sudah hantarkan, dia itu chakapkan perkata'an Allah: sbab Allah t'ada bri Roh dngan sukat-mnyukat. |
3:35 | Bapa itu kaseh sama Anak, dan sudah srahkan sgala perkara k-pada tangan-nya. |
3:36 | Orang yang perchaya sama Anak itu, dia ada hidop yang kkal; ttapi orang yang t'ada turut prentah Anak itu, dia t'ada nanti tengok hidop, ttapi Allah punya marah ada tinggal atas dia. |