1:1 | Kerna banyak orang sudah masok tangan mau karang hikayat deri-hal itu perkara-perkara yang sudah jadi antara kita, |
1:2 | ia'itu sperti yang sudah di-srahkan k-pada kita oleh orang-orang yang deri mula-mula sudah tengok dngan mata-nya sndiri dan mnjadi guru perkata'an itu, |
1:3 | jadi berknan sama sahya pula yang sudah preksa ini smoa deri asal-nya mau tulis k-pada angkau dngan aturan-nya, hei Tiofilus yang mulia skali; |
1:4 | spaya angkau boleh tahu smoa perkata'an punya ktntuan yang orang sudah ajarkan sama angkau. |
1:5 | Jman Herodis raja Yahudiah, ada satu imam yang bernama Zakaria, ia'itu deri-pada bhagian Abia: dan dia ada bini deri kturunan Harun, dan nama-nya Ilisabat. |
1:6 | Dan dia-orang dua-dua ada bnar dpan Tuhan, dan turut sgala hukum dan psanan Tuhan dngan t'ada chla. |
1:7 | Ttapi dia-orang t'ada beranak, kerna Ilisabat mandul, dan dua-dua sudah banyak umor. |
1:8 | Ktika Zakaria buat pkerja'an imam di dpan Allah dalam dia punya gantian punya aturan, |
1:9 | dia terkna undi, ikut adat pkerja'an imam, msti masok ka'abah Tuhan spaya bakar stanggi. |
1:10 | Dan ktika dia ada bakar stanggi, smoa orang bangsa itu ada minta do'a di sblah luar. |
1:11 | Dan ternampak sama Zakaria satu mla'ikat Tuhan terdiri di sblah kanan tmpat bakar stanggi. |
1:12 | Dan Zakaria terkjut tengokkan dia dan naik ktakotan. |
1:13 | Ttapi itu mla'ikat kata sama dia, "Jangan takot, Zakaria, kerna angkau punya perminta'an sudah di-dngarkan, dan angkau punya istri Ilisabat nanti beranakkan satu anak dlaki sama angkau, dan angkau msti namakan dia 'Yahya.' |
1:14 | Dan angkau nanti dapat ksuka'an dan kgmaran; dan banyak orang nanti suka-hati sbab budak itu jadi. |
1:15 | Kerna dia nanti jadi bsar di dpan muka Tuhan, dan dia t'ada nanti minum ayer-anggor atau minuman yang kras: dan dia nanti di-pnohkan dngan Roh Alkudus deri prot mak-nya. |
1:16 | Dan banyak orang Isra'el dia nanti balekkan k-pada Allah, dia-orang punya Tuhan. |
1:17 | Dan dia nanti berjalan dpan dia itu dngan roh dan kuasa Ilia, spaya balekkan hati bapa-bapa k-pada anak-anak-nya, dan orang derhaka k-pada orang bnar punya bijaksana; spaya siapkan kerna Tuhan satu bangsa yang lngkap." |
1:18 | Zakaria kata sama itu mla'ikat, "Bagimana-kah sahya boleh tahu ini perkara? kerna sahya ini satu orang tua, dan bini sahya pun sudah banyak umor." |
1:19 | Dan itu mla'ikat jawab, kata sama dia, "Sahya-lah Jibra'el, yang berdiri di dpan Allah; dan sahya sudah di-hantarkan mau chakap sama angkau, dan bawa angkau ini khabar yang baik. |
1:20 | Dan tengok, angkau nanti jadi bisu dan ta'boleh berchakap, sampai itu hari bila smoa ini nanti jadi, sbab angkau sudah t'ada perchaya sahya punya perkata'an yang nanti di-sampaikan bila tempo-nya." |
1:21 | Dan orang bangsa itu ada nanti-nantikan Zakaria, dan dia-orang hairan sbab dia lambat di dalam ka'abah. |
1:22 | Dan bila dia kluar pula, dia ta'boleh berchakap sama dia-orang: dan dia-orang dapat tahu dia sudah tengok satu pnglihatan dalam ka'abah: dan dia kasi-kasi tanda sama dia-orang, dan tinggal bisu juga. |
1:23 | Dan bila dia punya hari pkerja'an sudah habis, dia pulang rumah-nya. |
1:24 | Kmdian deri-pada itu, dia punya bini Ilisabat mngandong, dan dia kurong diri lima bulan punya lama, serta kata, |
1:25 | "Bgini-lah sudah Tuhan buat sama sahya bila dia tengok hal sahya, mau hilangkan sahya punya malu di antara manusia." |
1:26 | Datang anam bulan, Allah hantarkan mla'ikat Jibra'el pergi satu negri di tanah Galil, bernama Nasarat, |
1:27 | k-pada satu anak-dara yang sudah bertunang sama satu orang bernama Yusof, deri kturunan Da'ud: dan nama itu anak-dara Mariam. |
1:28 | Dan Jibra'el masok datang sama dia, dan kata, "Slamat-lah angkau yang sudah trima anugrah, Tuhan ada sama-sama angkau." |
1:29 | Dia terkjut sbab ini perkata'an, dan terfikir-fikir 'ntah apa macham punya tabek ini? |
1:30 | Dan itu mla'ikat kata sama dia, "Jangan-lah takot, hei Mariam: kerna angkau sudah dapat anugrah deri-pada Allah. |
1:31 | Dan tengok, angkau nanti mngandong, dan nanti beranakkan satu anak dlaki, dan msti namakan di ISA. |
1:32 | Dia nanti mnjadi bsar, dan nanti di-namakan Yang Maha Tinggi punya anak: dan Tuhan kita Allah nanti kasi sama dia punya nenek-moyang Da'ud punya takhta: |
1:33 | dan dia nanti jadi raja atas isi-rumah Yakob s-lama-lama-nya; dan dia punya kraja'an t'ada nanti ada pnghabisan." |
1:34 | Dan Mariam satu sama itu mla'ikat, "Bagimana ini boleh jadi, sbab satu orang dlaki pun sahya blum knal lagi?" |
1:35 | Itu mla'ikat jawab kata sama dia, "Roh Alkudus nanti turun atas angkau, dan Yang Maha Tinggi punya kuasa nanti lindongkan angkau: sbab ini-lah itu anak yang nanti jadi nanti di-namakan kudus dan Anak Allah. |
1:36 | Dan lagi pun angkau punya sudara Ilisabat pun sudah mngandong satu anak dlaki ktika dia ada tua: dan skarang dia sudah pun anam bulan, yang dhulu orang sbotkan mandul. |
1:37 | Kerna perkata'an yang kluar deri Allah satu pun t'ada nanti jadi kurang kuasa." |
1:38 | Dan Mariam kata, "Tengok-lah, sahya ini Tuhan punya hamba; biar-lah jadi sama sahya sperti tuan ini punya perkata'an." Kmdian itu mla'ikat undur deri-pada dia. |
1:39 | Dan itu ktika Mariam bangun pergi di tanah gunong dngan pantas, di satu negri dalam tanah Yahuda. |
1:40 | Dia masok rumah Zakaria, dan kasi tabek sama Ilisabat. |
1:41 | Jadi bila Ilisabat dngar Mariam punya tabek, anak kchil berlompat di prot-nya, dan Ilisabat pnoh-lah dngan Roh Alkudus: |
1:42 | dan dia angkat suara-nya dan bertriak kuat-kuat, "Terpuji-lah angkau antara sgala prempuan, dan terpuji-lah angkau punya kandongan. |
1:43 | Dan apa ini hal sahya yang sahya punya Tuhan punya mak sudah datang sama sahya? |
1:44 | Kerna tengok, bila angkau punya tabek punya bunyi masok di kuping sahya, ini anak berlompat dalam prot sahya deri sbab suka-hati. |
1:45 | Dan berkat-lah itu prempuan yang sudah perchaya: kerna apa-apa yang sudah di-katakan k-pada dia deri-pada Tuhan nanti di-sampaikan." |
1:46 | Dan Mariam kata, "Jiwa sahya bsarkan Tuhan, |
1:47 | Dan roh sahya sudah bersuka-suka dalam Allah, Juru-Slamat sahya. |
1:48 | Sbab dia sudah perhatikan hamba-nya punya hal rndah. Kerna deri-pada ini tempo sgala kturunan nanti triak sahya berkat. |
1:49 | Sbab Yang Maha Kuasa sudah buat sama sahya perkara yang bsar-bsar; Dan nama-nya pun kudus. |
1:50 | Dan dia punya ksian ada turun mnurun, K-pada orang yang takot sama dia. |
1:51 | Dngan lngan-nya dia sudah tunjokkan kuasa; Dan orang yang sombong dia sudah chrai-braikan dalam fikiran hati dia-orang. |
1:52 | Raja-raja pun dia sudah turunkan deri dia-orang punya takhta, Dan sudah angkatkan orang yang rndah. |
1:53 | Orang yang lapar dia sudah knnyangkan dngan barang yang baik: Dan orang yang kaya-kaya dia suroh pergi dngan kosong. |
1:54 | Dia sudah tolong hamba-nya Isra'el, Spaya dia boleh ingat ksian |
1:55 | (Sperti dia sudah kata sama kita punya nenek-moyang) Ia'itu ksian k-pada Ibrahim dan k-pada kturunan-nya sampai s-lama-lama-nya." |
1:56 | Dan Mariam tinggal sama Ilisabat ada dkat tiga bulan, kmdian dia pulang rumah-nya. |
1:57 | Itu waktu Ilisabat sudah chukop bulan mau beranak; dan dia beranakkan satu anak dlaki. |
1:58 | Dan dia punya orang-orang s-kampong sama daging-darah-nya dngar yang Tuhan sudah bsarkan ksian-nya k-pada dia; dan dia-orang suka-suka sama-sama dia. |
1:59 | Dan hari yang k-lapan orang datang mau sunatkan budak itu; dan mau triak dia Zakaria, ikut nama bapa-nya. |
1:60 | Ttapi mak-nya pula jawab kata, "Jangan bgitu; ttapi dia msti di-namakan Yahya." |
1:61 | Dia-orang kata sama dia, "Antara angkau punya daging-darah t'ada satu yang orang namakan bgini." |
1:62 | Dan dia-orang bikin tanda sama bapa-nya apa-kah dia pula mau namakan sama dia. |
1:63 | Dan dia minta satu papan tulis, dan tulis bgini: "Nama-nya Yahya." Dan smoa orang naik hairan. |
1:64 | Dan itu juga mulut-nya sudah terbuka, dan lidah-nya pun, dan dia berchakap dan puji Allah. |
1:65 | Dan ktakotan datang atas smoa orang yang tinggal kliling: dan smoa ini perkata'an jadi mashhur dalam sluroh Yahudiah punya tanah gunong. |
1:66 | Dan smoa orang yang dngar taroh itu hal dalam hati, dan kata, "Apa pula ini budak nanti jadi?" Kerna tangan Tuhan ada sama-sama dia. |
1:67 | Dan bapa-nya Zakaria pnoh dngan Roh Alkudus, dan dia bernabuat kata, |
1:68 | "Sgala puji k-pada Allah, Tuhan orang Isra'el: Kerna dia sudah mlawat dan buat tbusan kerna bangsa-nya, |
1:69 | Dan sudah angkat satu tandok slamat kerna kita Di antara isi rumah hamba-nya Da'ud |
1:70 | (Sperti dia sudah chakap dngan mulut nabi-nabi-nya yang suchi deri dhulu kala) |
1:71 | Ia'itu slamat deri-pada musoh-musoh kita, dan deri-pada tangan smoa orang yang bnchi kita; |
1:72 | Spaya tunjokkan ksian k-pada kita punya nenek-moyang, Dan spaya ingat perjanjian-nya yang suchi itu; |
1:73 | Itu sumpah yang dia sudah sumpahkan k-pada nenek-moyang kita Ibrahim, |
1:74 | Mau kasi kita lpas deri-pada tangan musoh-musoh kita, Sampaikan boleh smbah sama dia dngan t'ada takot, |
1:75 | Dngan ksuchian dan kbnaran dpan dia s-panjang umor kita. |
1:76 | Dan angkau ini, hei anak sahya, nanti di-namakan Yang Maha Tinggi punya nabi: Kerna angkau-lah nanti berjalan dpan muka Tuhan spaya sdiakan jalan-jalan-nya; |
1:77 | Dan mau kasi tahu sama bangsa-nya fasal slamat Dalam ampunan dosa-dosa-nya, |
1:78 | Sbab kita punya Allah punya hati ksian, Yang oleh-nya trang siang deri atas nanti mlawat sama kita, |
1:79 | Mau trangkan orang-orang yang dudok dalam glap dan bayang- bayang kmatian; Spaya btulkan kaki kita masok jalan sntosa." |
1:80 | Dan budak itu mnjadi bsar, dan bertambah-tambah kuat roh-nya, dan dia ada dalam tmpat yang sunyi-sunyi sampaikan hari yang dia di-nyatakan k-pada Isra'el. |