23:1 | Dan s-gnap perkumpolan itu bangun, dan bawa dia di dpan Pilatus. |
23:2 | Dan dia-orang mula'i d'awa sama dia, dan kata, "Kita sudah jumpa ini orang ssatkan kita punya bangsa, dan larangkan orang bayer hasil k-pada Kaisar, dan dia ada bilang yang dia-lah Almaseh, satu raja." |
23:3 | Pilatus tanya sama dia, "Angkau-kah Raja orang Yahudi?" Isa jawab, kata sama dia, "Sperti angkau bilang." |
23:4 | Pilatus kata sama kpala-kpala imam dan sama orang-banyak, "Sahya t'ada dapat apa-apa salah dalam ini orang." |
23:5 | Ttapi dia-orang jadi lbeh kras, dan kata, "Dia ada usutkan ini bangsa, dan mngajar dalam sluroh tanah Yahudiah, dan mula'i deri Galil sampai di sini." |
23:6 | Bila Pilatus dngar ini, dia tanya kalau itu orang satu orang Galil. |
23:7 | Dan bila dia sudah dapat tahu yang dia ada dalam prentah Herodis, dia hantarkan dia k-pada Herodis, kerna dia pun ada di Yerusalim itu tempo. |
23:8 | Bila Herodis tengok Isa, dia banyak suka skali: kerna sudah lama juga dia mau tengok dia, sbab dia sudah dngar deri-hal dia; dan lagi pun dia harap mau tengok dia buat satu tanda. |
23:9 | Dan dia tanya sama Isa banyak perkara, ttapi satu apa pun Isa t'ada jawab sama dia. |
23:10 | Dan kpala-kpala imam sama orang pnulis berdiri dan d'awa sama dia kuat-kuat. |
23:11 | Dan Herodis sama dia punya soldado-soldado buat s-barang sama dia, dan olok-olokkan dia, dan bila dia-orang sudah knakan dia pakaian yang bagus-bagus, dia hantarkan balek k-pada Pilatus. |
23:12 | Dan itu hari juga Herodis sama Pilatus jadi bersohbat: kerna dhulu dia-orang ada bermusoh satu sama lain. |
23:13 | Dan Pilatus panggil kpala-kpala imam sama pnghulu-pnghulu bangsa itu berkumpol, |
23:14 | dan dia kata sama dia-orang, "Kamu smoa sudah bawa ini orang k-pada sahya, spertikan dia satu orang yang ssatkan orang bangsa ini: ttapi bila sahya sudah preksa sama dia di dpan kamu, sahya t'ada dapat apa-apa salah sama dia deri-hal perkara-perkara yang kamu d'awa sama di: |
23:15 | dan Herodis pun bgitu juga: kerna dia sudah hantarkan dia balek k-pada kita; dan tengok, t'ada satu pun dia punya perbuatan yang dia patut mati. |
23:16 | Sbab itu sahya nanti ssahkan dia, dan kmdian lpaskan. |
23:17 | [KOSONG] |
23:18 | Ttapi itu orang smoa bertriak sama skali, "Kasi mampus sama ini orang, dan lpaskan Bar-Abbas sama kita:" |
23:19 | dia ini satu orang yang sudah kna masok jel deri sbab satu huru-hara yang sudah jadi dalam itu negri, dan sbab bunoh orang. |
23:20 | Pilatus chakap sama dia-orang lagi satu kali, maksud-nya mau lpaskan Isa: |
23:21 | ttapi dia-orang bertriak-triak, kata, "Salibkan, salibkan dia." |
23:22 | Dan sampai tiga kali Pilatus kata sama dia-orang, "Apa kjahatan pula dia sudah buat? Satu apa pun sahya t'ada dapat dalam ini orang yang dia patut mati: sbab itu sahya rami ssahkan dia, dan kmdian lpaskan." |
23:23 | Ttapi makin kras dia-orang bertriak, minta biar dia kna salib. Dan dia-orang punya suara mnang. |
23:24 | Dan Pilatus putuskan hukum boleh jadi sperti dia-orang minta. |
23:25 | Dan dia lpaskan itu orang yang sudah kna masok jel sbab buat huru-hara dan sbab bunoh orang, ia'itu orang yang dia-orang smoa minta; ttapi Isa dia srahkan k-pada dia-orang punya kahandak. |
23:26 | Dan ktika dia-orang bawa dia pergi, dia-orang tangkap satu orang bernama Simon, orang Kurini, yang datang deri dusun, dan dia-orang tarohkan salib atas dia, spaya dia boleh pikul deri blakang Isa. |
23:27 | Dan ada ikut sama Isa banyak skali orang bangsa itu, dan prempuan-prempuan pun, yang mratap dan mnangiskan dia. |
23:28 | Ttapi Isa balek muka sblah dia-orang, dan kata, "Hei anak-anak prempuan Yerusalim, jangan mnangiskan sahya, ttapi mnangiskan diri kamu sndiri dan anak-anak kamu. |
23:29 | Kerna ada datang hari-nya bila orang nanti bilang. 'Berkat-lah prempuan mandul, dan prot yang ta'pernah mngandong, dan tetek yang ta'pernah kasi susu.' |
23:30 | Itu jam orang nanti mula'i kata sama gunong-gunong, 'Timpakan kita;' dan sama bukit-bukit, 'Tutopkan-lah sama kita.' |
23:31 | Kerna jikalau dia-orang buat ini smoa dalam hal pokok yang basah, apa lagi nanti jadi dalam hal pokok yang sudah kring?" |
23:32 | Dan dia-orang bawa dua orang salah mau bunoh dia-orang sama-sama Isa. |
23:33 | Bila dia-orang sampai di tmpat yang bernama Tngkorak, di sana dia-orang salibkan dia, dan itu dua orang salah pun, satu sblah kanan, satu sblah kiri. |
23:34 | Dan Isa kata, "Ya Bapa, ampunkan-lah sama dia-orang; kerna dia-orang ta'tahu apa dia-orang ada buat." Dan dia-orang bhagikan Isa punya pakaian dngan buang undi. |
23:35 | Dan orang bangsa itu berdiri tengokkan. Dan pnghulu-pnghulu pun olok-olokkan dia, dan kata, "Dia sudah slamatkan lain orang; biar dia slamatkan diri-nya sndiri, jikalau dia ini Allah punya Almaseh, yang dia sudah pileh." |
23:36 | Dan soldado-soldado pun olok-olokkan dia, dan datang bawa chuka sama dia. |
23:37 | dan dia-orang kata, "Jikalau angkau Raja orang Yahudi, slamatkan angkau punya diri." |
23:38 | Dan sblah atas dia pula ada satu surat, "INI-LAH RAJA ORANG YAHUDI." |
23:39 | Dan deri-pada itu orang salah yang tergantong, satu umpatkan sama Isa, dan kata, "Bukan-kah angkau Almaseh? slamatkan angkau punya diri dan kita pun." |
23:40 | Ttapi yang lagi satu itu jawab dan tgurkan dia, serta kata, "T'ada-kah angkau takot sama Allah pun? sdang angkau pun dalam ini hukuman juga? |
23:41 | Dan kita ini dngan s-patut-nya, kerna kita trima balasan yang s-padan dngan perbuatan kita: ttapi ini orang t'ada buat satu apa pun yang tidak patut." |
23:42 | Dan dia kata, "Ya Isa, ingat-lah sama sahya bila tuan datang dalam tuan punya kraja'an." |
23:43 | Dan Isa kata sama dia, "Dngan sunggoh sahya bilang sama angkau, ini hari juga angkau nanti ada sama-sama sahya dalam Firdus." |
23:44 | Skarang ada pukol dua-blas tngah hari bgitu, dan satu kglapan datang atas sluroh tanah itu sampai pukol tiga ptang, |
23:45 | dan chahya matahari hilang: dan ka'abah punya tirai blah dua di tngah-tngah. |
23:46 | Dan Isa bertriak dngan suara yang bsar, dan kata, "Ya Bapa, dalam Bapa punya tangan sahya srahkan roh sahya?" dan bila dia sudah kata bgini, nyawa-nya pun putus. |
23:47 | Dan bila itu hulubalang tengok apa yang sudah jadi, dia muliakan Allah, dan kata, "Tntu-lah dia ini satu orang yang bnar." |
23:48 | Dan smoa orang-banyak yang berhimpon mau tengokkan itu, bila dia-orang sudah tengok apa-apa yang sudah jadi, pulang, sambil tpok-tpok dada-nya. |
23:49 | Dan sgala orang yang knal sama dia, dan prempuan-prempuan yang sudah ikut sama dia deri Galil, ada berdiri deri jauh tengokkan itu smoa. |
23:50 | Dan ada satu orang bernama Yusof, yang jadi satu orang majlis bichara, orang yang baik dan bnar |
23:51 | (dia ini t'ada s-tuju sama dia-orang punya bichara dan perbuatan), ia'itu orang Arimatiah, negri orang Yahudi, dan lagi pun dia ada mnantikan kraja'an Allah: |
23:52 | ini orang-lah pergi k-pada Pilatus, dan minta Isa punya mayat. |
23:53 | Dan dia bawa turun, dan gulongkan dngan kain linin, dan tarohkan dia dalam kubor yang sudah di-pahatkan dalam batu karang, di mana orang blum pernah di-taroh lagi. |
23:54 | Itu ktika hari-sdiakan, dan hari-perhentian sudah mau dkat. |
23:55 | Dan itu prempuan-prempuan yang datang sama-sama dia deri Galil ada ikut blakang, dan tengok itu kubor, dan bagimana badan-nya sudah di-ltakkan. |
23:56 | Kmdian itu prempuan-prempuan pulang, dan sdiakan rmpah-rmpah sama minyak wangi. Dan hari-perhentian dia-orang brenti, ikut sperti itu hukum. |