22:1 | Itu hari-bsar makan roti ta'ragi yang di-sbot Paska, sudah dkat. |
22:2 | Dan kpala-kpala imam sama orang-orang pnulis chari jalan mau bunoh dia; kerna dia-orang takot orang bangsa itu. |
22:3 | Dan Setan masok dalam Yudas yang berglar Iskariot, ia'itu satu orang dalam bilangan dua-blas murid itu. |
22:4 | Dia pergi chakap-chakap sama kpala-kpala imam dan pnghulu-pnghulu bagimana dia boleh srahkan Isa k-pada dia-orang. |
22:5 | Dia-orang suka-hati, dan janji mau kasi wang sama dia. |
22:6 | Dan dia s-tuju, dan chari tempo yang baik mau srahkan Isa k-pada dia-orang bila t'ada orang-banyak. |
22:7 | Dan sudah sampai hari yang orang makan roti ta'ragi, itu hari bila Paska msti kna smbleh. |
22:8 | Dan Isa hantarkan Petrus sama Yahya, dan kata, "Pergi-lah sdiakan Paska kerna kita, spaya kita makan." |
22:9 | Dia-orang kata sama dia, "Di mana tuan mau kita sdiakan?" |
22:10 | Isa kata sama dia-orang, "Bila kamu masok negri, nanti ada satu orang berjumpa sama kamu, yang angkat satu buyong ayer; ikut dia masok itu rumah di mana dia sndiri masok. |
22:11 | Dan kamu boleh kata sama tuan rumah itu, 'Guru kata sama tuan, "Mana bilek perjamuan, di mana sahya boleh makan Paska sama-sama murid-murid sahya?"' |
22:12 | Dan dia nanti tunjokkan kamu satu bilek bsar di loteng yang ada siap: di situ sdiakan." |
22:13 | Dia-orang pergi, dan dapat sperti dia sudah bilang sama dia-orang: dan dia-orang sdiakan-lah Paska. |
22:14 | Bila sudah chukop jam-nya, dia dudok, dan rasul-rasul sama-sama. |
22:15 | Dia kata sama dia-orang, "Sahya sudah banyak ingin mau makan ini Paska sama-sama kamu smoa, s-blum sahya kna sngsara; |
22:16 | kerna sahya kata sama kamu, sahya t'ada nanti makan ini Paska sampai sudah di-gnapkan dalam kraja'an Allah. |
22:17 | Dan dia trima chawan, dan bila dia sudah mnguchap shukor, dia kata, "Ambil ini, bhagikan antara kamu sndiri: |
22:18 | kerna sahya kata sama kamu, deri-pada ini waktu sahya t'ada nanti minum ayer buah anggor, sampai kraja'an Allah sudah datang." |
22:19 | Kmdian dia ambil roti, dan bila dia sudah mnguchap shukor, dia pchahkan, dan kasi sama dia-orang serta kata, "Ini-lah badan sahya yang di-bri kerna kamu: buat ini jadi peringatan atas sahya." |
22:20 | Dan chawan pun bgitu juga bila habis makan dan dia kata, "Ini chawan jadi perjanjian bharu dalam darah sahya, yang terchurah kerna kamu. |
22:21 | Ttapi ingat baik-baik, tangan orang yang nanti srahkan sahya ada sama-sama sahya di atas ini meja. |
22:22 | Kerna Anak-manusia nanti pergi juga, sperti sudah di-tntukan; ttapi susah-lah itu orang yang srahkan sama dia!" |
22:23 | Dan dia-orang mula'i tanya satu sama lain mana satu deri-pada-nya nanti buat ini. |
22:24 | Dan ada pula satu perbantahan antara itu murid-murid, mana satu-kah deri-pada dia-orang di-bilangkan yang bsar skali. |
22:25 | Isa kata sama dia-orang, "Orang bangsa-asing punya raja-raja pegang prentah atas dia-orang; dan orang yang ada kuasa atas dia-orang ia'itu di-sbot Orang Pnolong. |
22:26 | Ttapi kamu ini jangan bgitu; mlainkan orang yang bsar skali antara kamu, biar dia jadi sperti yang muda; dan orang yang jadi kpala, sperti orang yang mlayan. |
22:27 | Kerna yang mana lbeh bsar? orang yang dudok meja-kah atau orang yang mlayan? bukan-kah dia yang dudok meja? ttapi sahya ini ada antara kamu sperti orang yang mlayan. |
22:28 | Ttapi kamu-lah orang-orang yang sudah tinggal ttap sama-sama sahya dalam sahya punya pnchoba'an smoa; |
22:29 | dan sahya tntukan kamu satu kraja'an, sama sperti Bapa sahya sudah tntukan sama sahya, |
22:30 | spaya kamu boleh makan-minum di meja sahya dalam sahya punya kraja'an; dan kamu nanti dudok atas takhta mnjadi hakim atas dua-blas suku-bangsa Isra'el. |
22:31 | Hei Simon, Simon, ingat-lah, Setan sudah minta kamu smoa, spaya dia boleh tampikan kamu sperti trigu: |
22:32 | ttapi sahya sudah minta do'a kerna angkau, spaya jangan hilang angkau punya perchaya: dan bila angkau sudah balek, angkau msti ttapkan angkau punya sudara-sudara." |
22:33 | Dan Petrus kata sama dia, "Ya Tuhan, sama-sama Tuhan sahya ada sdia mau pergi jel atau mati pun." |
22:34 | Isa kata, "Sahya bilang sama angkau, hei Petrus, ini hari ayam ta'nanti berkokoh kalau s-blum angkau kata tiga kali yang angkau t'ada knal sama sahya." |
22:35 | Dan dia kata sama dia-orang, "Bila sahya sudah suroh kamu kluar dngan t'ada bawa pundi-pundi atau tmpat bkal atau kasut pun, ada-kah apa-apa kurang sama kamu?" Dia-orang kata, "T'ada apa-apa." |
22:36 | Dan dia kata sama dia-orang, "Ttapi skarang orang yang ada pundi-pundi baik dia bawa, dan tmpat bkal bgitu juga: dan orang yang tidak ada pdang, baik dia jual baju-nya dan bli pdang. |
22:37 | Kerna sahya kata sama kamu, ini yang ada tersurat msti di-sampaikan dalam hal sahya; ia'itu, 'Dia sudah di-bilangkan sama-sama dngan orang yang derhaka:' kerna sgala sahya punya hal ada pnghabisan-nya." |
22:38 | Dan dia-orang kata, "Tuhan, ini-tah ada dua pdang." Isa kata sama dia-orang, "Sudah chukop." |
22:39 | Dan dia kluar pergi Bukit Zaitun sperti adat-nya, dan murid-murid-nya ikut sama dia. |
22:40 | Dan bila dia sudah sampai itu tmpat, dia kata sama dia-orang, "Minta-lah do'a spaya jangan kamu masok pnchoba'an." |
22:41 | Dan dia undor deri-pada dia-orang ada kira-kira satu lemparan batu punya jauh; habis itu dia berlutut minta do'a, |
22:42 | kata, "Ya Bapa, jikalau berknan sama Bapa, lalukan ini chawan deri-pada sahya: dalam pada itu, bukan-nya kahandak sahya, ttapi biar-lah kahandak Bapa jadi." |
22:43 | Dan ada ternampak sama dia satu mla'ikat deri shorga yang kuatkan dia. |
22:44 | Dan waktu dia ada dalam sngsara, dia minta do'a dngan lbeh tkun: dan dia punya ploh jadi sperti titek-titek darah mnitek di tanah. |
22:45 | Dan bila dia bangun deri minta do'a, dia datang k-pada murid-murid, dan jumpa dia-orang ada tertidor deri sbab susah-hati, |
22:46 | dan dia kata sama dia-orang, "Knapa kamu tidor? bangun minta do'a, spaya jangan kamu masok pnchoba'an." |
22:47 | Waktu dia lagi berchakap ada satu perkumpolan, dan itu orang yang bernama Yudas, ia'itu satu deri-pada itu dua-blas orang, ada jalan dpan dia-orang; dan dia datang dkat Isa mau chium sama dia. |
22:48 | Ttapi Isa kata sama dia, "Hei Yudas, angkau mau srahkan Anak-manusia dngan chium-kah?" |
22:49 | Dan bila orang-orang yang kliling Isa tengok apa nanti jadi, dia-orang kata, "Ya Tuhan, baik-kah kita ttak sama pdang?" |
22:50 | Dan ada satu orang ttakkan imam-bsar punya hamba, dan kratkan dia punya kuping kanan. |
22:51 | Ttapi Isa jawab, kata, "Biarkan sampai bgini:" dan dia jamah itu kuping, dan kasi baik. |
22:52 | Dan Isa kata sama kpala-kpala imam dan pnghulu-pnghulu ka'abah dan ktua-ktua, yang sudah datang mau tangkap dia, "Ada-kah kamu kluar sperti mau tangkap satu pnyamon, dngan pdang dan tongkat? |
22:53 | Bila sahya ada sama-sama kamu s-hari-hari dalam ka'abah, kamu t'ada naikkan tangan atas sahya: ttapi ini-lah kamu punya ktika, dan kuasa kglapan." |
22:54 | Dan kmdian orang tangkap sama Isa, dan bawa dia pergi masok rumah imam-bsar. Ttapi Petrus ikut deri jauh. |
22:55 | Bila orang sudah nyalakan api di tngah-tngah hlaman, dan sudah dudok sama-sama, Petrus pun dudok antara dia-orang. |
22:56 | Dan ada satu budak prempuan tengok sama dia waktu dia ada dudok dkat chahya api, dan dia mrnong sama dia, dan kata, "Ini orang pun sudah ada sama-sama dia itu." |
22:57 | Ttapi Petrus bersangkal, dan kata, "Hei nyonya, sahya t'ada knal sama dia." |
22:58 | Dan lagi s-kjap lain orang pula tengok, dan kata sama dia, "Angkau pun s-bhagian sama dia-orang." Ttapi Petrus kata, "Hei angkau, bukan sahya." |
22:59 | Dan ada kira-kira satu jam lagi, lain orang pula kata dngan tntu, "Dngan sunggoh ini orang pun sudah ada sama-sama dia itu: kerna dia satu orang Galil." |
22:60 | Ttapi Petrus kata, "Hei angkau, sahya ta'tahu 'ntah apa-kah angkau ada chakap." Dan itu juga, waktu dia ada lagi berchakap, ayam berkokok. |
22:61 | Dan Tuhan balek muka tengok sama Petrus. Dan Petrus ingat Tuhan punya perkata'an, bagimana dia sudah bilang sama dia, "S-blum ayam berkokok ini hari, angkau nanti sangkalkan sahya tiga kali." |
22:62 | Dan Petrus kluar mnangis tersdeh-sdeh. |
22:63 | Dan orang-orang yang pegang sama Isa olok-olokkan dan pukol sama dia. |
22:64 | Dan dia-orang tutopkan muka-nya, dan tanya sama dia, "Siapa sudah pukol angkau? nabuat-lah." |
22:65 | Dan ada banyak lain perkara yang jahat dia-orang kata sama dia. |
22:66 | Dan bila hari sudah siang, majlis ktua-ktua bangsa itu, ia'itu kpala-kpala imam sama orang pnulis smoa berhimpon; dan dia-orang bawa dia pergi dpan majlis bichara, dan kata, |
22:67 | "Jikalau angkau Almaseh, bilang sama kita." Ttapi dia kata sama dia-orang, "Jikalau sahya bilang sama kamu pun, kamu t'ada skali-kali nanti perchaya: |
22:68 | dan jikalau sahya tanya pula, skali-kali kamu ta'nanti jawab. |
22:69 | Ttapi deri-pada ini waktu-lah nanti Anak-manusia di-dudokkan sblah kanan kuasa Allah." |
22:70 | Dan smoa-nya kata, "Kalau bgitu, angkau Anak Allah-kah?" Dia kata sama dia orang, "Kamu ini bilang sahya-lah dia." |
22:71 | Dia-orang kata, "Apa guna lagi saksi-saksi sama kita? kerna kita sndiri sudah dngar deri-pada mulut-nya?" |