2:1 | Itu waktu kluar satu hukum deri-pada Kaisar Augustus suroh banchikan smoa dunia punya orang. |
2:2 | Ini-lah banchi yang mula-mula yang sudah jadi bila Kurenius mnjadi gobernor di tanah Suriah. |
2:3 | Dan smoa orang pergi kna banchi, masing-masing orang dalam masing-masing punya negri. |
2:4 | Dan Yusof pun datang deri Galil, deri negri Nasarat, masok tanah Yahudiah pergi negri Da'ud yang bernama Bait-Lahim, kerna dia deri isi rumah dan kturunan Da'ud; |
2:5 | spaya kna banchi sama-sama Mariam, yang sudah tunang sama dia, dan ada mngandong. |
2:6 | Jadi tempo dia-orang di sana, hari sudah gnap yang dia patut beranak. |
2:7 | Dan dia beranakkan anak-nya yang sulong; dan bdong-kan dia, dan ltakkan dalam palongan, sbab t'ada tmpat kerna dia-orang di dalam itu rumah tumpangan. |
2:8 | Dan di tanah itu juga ada gombala-gombala, yang tinggal di padang mnjaga kawan domba-nya tempo malam. |
2:9 | Dan ada satu mla'ikat Tuhan berdiri dkat dia-orang, dan kmulia'an Tuhan berchahya-chahya kliling dia-orang, dan dia-orang mnjadi takot skali. |
2:10 | Itu mla'ikat kata sama dia-orang, "Jangan-lah takot; kerna tengok, sahya bawa sama kamu khabar baik deri-hal ksuka'an bsar yang nanti jadi sama s-gnap bangsa ini: |
2:11 | kerna ini hari sudah di-beranakkan sbab kamu dalam negri Da'ud satu Juru-Slamat, ia'itu Almaseh, Tuhan itu. |
2:12 | Dan ini-lah tanda-nya k-pada kamu; kamu nanti jumpa satu anak-kchil terbdong dan terbaring dalam palongan." |
2:13 | Dan tiba-tiba ada sama-sama itu mla'ikat bukan sikit banyak punya tntra shorga puji-puji Allah, dan kata, |
2:14 | "Mulia k-pada Allah dalam ktinggian, Dan di atas bumi sjahtra antara orang yang berknan sama dia." |
2:15 | Dan bila itu mla'ikat-mla'ikat sudah pergi deri-pada dia-orang masok shorga, itu gombala-gombala kata satu sama lain, "Skarang mari-lah kita pergi sampai di Bait-Lahim, dan tengok apa-kah ini perkara yang sudah jadi, yang Tuhan sudah nyatakan sama kita." |
2:16 | Dan dia-orang datang dngan chpat, dan jumpa Mariam sama Yusof pun, dan itu anak kchil ada terbaring di dalam palongan. |
2:17 | Dan bila dia-orang sudah tengok, dia-orang khabarkan itu perkara yang sudah di-katakan sama dia-orang fasal ini anak. |
2:18 | Dan smoa orang yang dngar itu jadi hairan deri-hal smoa perkara yang itu gombala-gombala sudah bilang sama dia-orang. |
2:19 | Ttapi Mariam simpan smoa ini perkata'an, dan ingat itu smoa dalam hati-nya. |
2:20 | Dan itu gombala-gombala pulang, sambil muliakan dan pujikan Allah kerna smoa perkara yang dia-orang sudah dngar dan sudah tengok, sama sperti sudah di-katakan sama dia-orang. |
2:21 | Dan bila sudah gnap lapan hari mau sunatkan budak itu dia-orang panggil nama-nya ISA, yang itu mla'ikat sudah namakan s-blum dia jadi di prot. |
2:22 | Dan bila dia-orang punya hari ksuchian sudah gnap, sperti hukum Musa, dia-orang bawa dia di Yerusalim, mau mnghadapkan dia sama Tuhan |
2:23 | (sperti ada tersurat dalam hukum Tuhan, "Masing-masing anak dlaki yang mula-mula kluar prot nanti di-sbotkan kudus k-pada Tuhan"), |
2:24 | dan mau kasi korban sperti ada kata di dalam hukum Tuhan, "s-pasang burong tkukor, atau dua ekor anak burong komba." |
2:25 | Ada satu orang di Yerusalim nama-nya Shim'un, satu bnar dan berbakti punya orang, yang nantikan pnghiburan Isra'el: dan Roh Alkudus pun ada di atas dia. |
2:26 | Dan Roh Alkudus sudah nyatakan sama dia yang dia t'ada nanti mati s-blum dia tengok Tuhan punya Almaseh. |
2:27 | Jadi dalam Roh dia datang masok ka'abah: dan bila mak-bapa-nya bawa masok itu anak kchil Isa, spaya dia-orang boleh buat sama dia sperti hukum-taurit. |
2:28 | itu ktika Shim'un sambot dokong sama dia, dan puji Allah bgini: |
2:29 | "Ya Tuhan, skarang lpaskan-lah Tuhan punya hamba, Dngan sjahtra, sperti Tuhan punya perkata'an, |
2:30 | Kerna sudah-lah mata sahya tengok Tuhan punya slamat. |
2:31 | Yang Tuhan sudah sdiakan di dpan sgala bangsa: |
2:32 | Satu chahya mau kasi trang sama orang bangsa-asing, Dan kmulia'an Tuhan punya bangsa Isra'el." |
2:33 | Dia punya bapa dan dia punya mak naik hairan deri-hal itu perkara yang di-katakan deri-hal dia, |
2:34 | dan Shim'un berkatkan dia-orang, dan kata sama dia punya mak Mariam, "Ingat, dia ini sudah di-tntukan spaya jatohkan atau bangunkan banyak orang dalam Isra'el; dan mnjadi satu tanda yang orang nanti chlakan; |
2:35 | dan angkau punya jiwa sndiri nanti kna tikam pdang; spaya banyak orang punya fikiran hati boleh di-nyatakan." |
2:36 | Lagi pula, ada satu nabi prempuan bernama Hannah anak Panu'el, deri bangsa Ashir (dia sudah banyak umor, laki-nya sudah hidop sama dia ada tujoh tahun punya lama deri tempo dia anak dara, |
2:37 | dan dia dudok bujang sudah lapan-puloh-ampat tahun punya lama), dia t'ada lpas ka'abah, ttapi buat smbahyang dngan puasa dan minta do'a siang malam. |
2:38 | Itu ktika juga ini prempuan datang mnguchap shukor k-pada Allah, dan chakap-chakap fasal itu anak kchil k-pada smoa orang yang mnantikan tbusan Yerusalim. |
2:39 | Bila dia-orang sudah habiskan sgala perkara ikut hukum Tuhan, dia-orang pulang Galil, pergi Nasarat negri-nya sndiri. |
2:40 | Dan itu budak makin bsar dan bertambah-tambah kuat, dan mnjadi pnoh dngan bijaksana, dan anugrah Allah pun ada di atas dia. |
2:41 | Dan tiap-tiap tahun dia punya mak-bapa pergi di Yerusalim waktu hari-bsar Paska. |
2:42 | Dan bila umor-nya sudah dua-blas tahun, dia-orang pergi sana ikut adat hari-bsar itu; |
2:43 | dana bila dia-orang sudah gnapkan hari-nya, dan waktu dia-orang pulang, itu budak Isa tinggal di Yerusalim, dan mak-bapa-nya ta'tahu; |
2:44 | ttapi dia-orang sangkakan dia ada antara orang-orang yang berjalan sama-sama, jadi dia-orang berjalan satu hari punya jalan: dan dia-orang chari-chari sama dia antara dia-orang punya sudara-sudara dan orang yang dia-orang knal; |
2:45 | dan bila dia-orang ta'boleh dapat sama dia, dia-orang balek pergi Yerusalim chari sama dia. |
2:46 | Lpas tiga hari, dia-orang jumpa dia dalam ka'abah, dudok di tngah guru-guru, serta dngar sama dia-orang dan tanya-mnanya sama dia-orang: |
2:47 | smoa orang yang dngar sama dia jadi hairan sama pngertian dan jawab-nya. |
2:48 | Bila dia punya mak-bapa tengok sama dia, dia-orang terchngang, dan mak-nya kata sama dia, "Hei anak, knapa-kah angkau sudah buat bgini sama kita? tengok angkau punya bapa sama sahya sudah terchari-chari sama angkau dngan susah-hati." |
2:49 | Dia kata sama dia-orang, "Knapa kamu chari sama sahya? t'ada-kah kamu tahu yang sahya msti ada dalam sahya punya Bapa punya rumah?" |
2:50 | Ttapi dia-orang ta'mngerti itu chakap yang dia kata sama dia-orang. |
2:51 | Kmdian dia turun sama dia-orang pergi di Nasarat; dan dia turut dia-orang punya prentah: dan mak-nya simpan smoa ini perkata'an dalam hati-nya. |
2:52 | Dan Isa bertambah-tambah bijaksana dan bsar-nya, dan makin lbeh dia berknan sama Allah dan manusia pun. |