2:1 | Dan ada brapa hari kmdian, bila dia masok Kafarnahum lagi skali, orang dngar yang dia ada di rumah. |
2:2 | Dan banyak orang berhimpon, sampaikan tidak ada tmpat lagi, dan di muka pintu pun t'ada: dan Isa katakan itu perkata'an k-pada dia-orang. |
2:3 | Dan ada orang yang datang sama dia, mmbawa satu orang sakit tepok, yang di-pikul oleh ampat orang. |
2:4 | Dan itu orang-orang ta'boleh datang dkat Isa, sbab itu orang-banyak; jadi dia-orang bukakan gnting-rata di mana Isa ada: dan bila itu gnting sudah pchah, dia-orang turunkan itu tmpat-tidor di mana itu orang sakit ada berbaring. |
2:5 | Dan bila Isa tengok dia-orang punya perchaya, dia kata sama itu orang sakit, "Hei anak, angkau punya dosa-dosa sudah di-ampunkan." |
2:6 | Ttapi ada orang-orang pnulis dudok di situ, dan berrondeng dalam hati-nya, |
2:7 | "Knapa ini orang berchakap bgini? dia ada mnghujat: siapa ada kuasa ampunkan dosa, chuma satu saja, ia'itu Allah?" |
2:8 | Itu juga Isa tahu dalam roh-nya yang itu orang smoa ada berrondeng bgitu dalam diri-nya, dan dia kata sama dia-orang, "Knapa kamu berrondeng ini smoa dalam kamu punya hati? |
2:9 | Mana lbeh snang? kata sama orang sakit tepok ini, 'Angkau punya dosa-dosa sudah di-ampunkan, 'atau kata, 'Bangun, angkat angkau punya tmpat-tidor, dan jalan-lah. |
2:10 | Ttapi spaya kamu boleh tahu yang Anak-manusia ada kuasa di atas bumi ampunkan dosa (dia kata sama itu orang sakit tepok), |
2:11 | sahya kata sama angkau, bangun, angkat angkau punya tmpat-tidor, dan pulang rumah." |
2:12 | Dan itu orang bangun, dan itu juga dia angkat tmpat-tidor-nya, dan kluar di dpan sklian-nya, sampaikan smoa orang terchngang-chngang dan muliakan Allah. Dia-orang kata, "Blum-pernah kita tengok ini macham punya hal." |
2:13 | Dan Isa kluar berjalan lagi di tpi tasek; dan smoa orang-banyak datang sama dia, dan dia ajarkan dia-orang. |
2:14 | Dan s-tngah dia berjalan, dia tengok Liwi anak Halfi dudok di tmpat orang bayer chukai, dan Isa kata sama dia, "Ikut-lah sama sahya." Dan dia bangun ikut sama Isa. |
2:15 | Dan Isa ada dudok makan dalam rumah Liwi, dan ada banyak orang yang pungut chukai sama orang-orang berdosa pun ada dudok makan sama-sama Isa dngan murid-murid-nya: kerna ada banyak orang, dan dia-orang ikut dia. |
2:16 | Dan bila orang Farisi punya orang pnulis tengok Isa makan sama-sama orang-orang berdosa dngan orang yang pungut chukai, dia-orang kata sama dia punya murid-murid, "Dia ada makan minum sama-sama orang yang pungut chukai dan orang berdosa pun!" |
2:17 | Dan bila Isa dngar, dia kata sama dia-orang, "Doktor ada berguna bukan-nya sama orang yang sihat, ttapi sama orang yang sakit: sahya datang bukan-nya mau panggil orang yang bnar, ttapi orang yang berdosa." |
2:18 | Yahya punya murid-murid sama orang Farisi ada puasa: dan orang datang sama Isa, dan kata, "Knapa murid-murid Yahya dan murid-murid orang Farisi pun puasa, ttapi tuan punya murid-murid t'ada puasa?" |
2:19 | Dan Isa kata sama dia-orang, "Boleh-kah satu kmantin jantan punya sohbat-sohbat puasa waktu kmantin jantan ada sama-sama dia-orang? s-lama-nya dia-orang ada kmantin jantan sama-sama dia-orang, tntu t'ada boleh dia-orang puasa. |
2:20 | Ttapi ada hari-nya nanti datang bila kmantin jantan itu nanti kna ambil deri-pada dia-orang, bharu-lah dia-orang nanti puasa. |
2:21 | T'ada orang tampalkan kain bharu atas pakaian yang lama: kalau bgitu kain-tampalan kain yang bharu itu nanti koyakkan pula, ia'itu yang bharu koyak yang lama, dan jadi lbeh bsar punya rabek. |
2:22 | Dan lagi, orang bukan taroh ayer-anggor bharu dalam botol-kulit yang lama: kalau bgitu, itu ayer-anggor nanti rabekkan itu kulit, dan ayer-anggor sama kulit pun nanti rosak: ttapi ayer-anggor bharu tmpat-nya dalam kulit yang bharu." |
2:23 | Dan ada satu hari perhentian, Isa berjalan lalu ladang trigu; dan sambil berjalan dia punya murid-murid mula'i ptek tangkai-tangkai trigu. |
2:24 | Dan orang Farisi kata sama dia, "Tengok, knapa dia-orang buat perkara yang t'ada halal orang buat kalau hari perhentian?" |
2:25 | Ttapi Isa kata sama dia-orang, "Blum pernah-kah kamu bacha deri-hal apa yang Da'ud sudah buat, bila dia sudah terkurang, dan naik lapar, dia dngan orang-orang yang sama-sama dia? |
2:26 | Bagimana dia sudah masok dalam rumah Allah, jman Abiatar mnjadi imam-bsar, dan sudah makan roti persmbahan, yang t'ada halal dia makan, chuma imam-imam saja, dan dia sudah kasikan sama orang-orang yang ada sama-sama dia?" |
2:27 | Kmdian dia kata sama dia-orang, "Hari perhentian itu sudah di-jadikan kerna manusia, bukan-nya manusia di-jadikan kerna hari perhentian. |
2:28 | Sbab itu Anak-manusia mnjadi hari perhentian pun punya tuan." |