| 16:1 | Lpas hari perhentian, Mariam orang Magdala sama Mariam mak si Yakob, sama Salomi, bli rmpah-rmpah, spaya dia-orang boleh datang minyakkan dia. |
| 16:2 | Dan pagi-pagi skali pada hari yang pertama dalam minggo itu, itu prempuan-prempuan datang di kubor bila matahari sudah kluar. |
| 16:3 | Dan dia-orang ada terkata-kata satu sama lain, "Siapa-kah boleh golekkan itu batu deri pintu kubor kerna kita?" |
| 16:4 | Dan bila dia-orang angkat mata, dia-orang tengok itu batu sudah pun di-golekkan, kerna batu itu bsar skali. |
| 16:5 | Bila dia-orang masok itu kubor, dia-orang tengok satu orang muda ada dudok di sblah kanan, pakai pakaian puteh; dan prempuan-prempuan itu terchngang. |
| 16:6 | Dan dia kata sama dia-orang, "Jangan terchngang: kamu ada chari Isa orang Nasarat itu, yang sudah kna salib: dia sudah bangkit; dia t'ada sini: tengok-lah, ini tmpat di mana orang tarohkan dia. |
| 16:7 | Ttapi pergi bilang sama murid-murid-nya, dan sama Petrus, 'Dia ada pergi lbeh dhulu kamu di Galil: di situ-lah kamu nanti tengok dia, sperti dia sudah bilang sama kamu.'" |
| 16:8 | Dan prempuan-prempuan itu kluar, dan lari deri itu kubor; kerna dia-orang naik mngglitar dan terpranjat: dan satu apa pun dia-orang t'ada kata sama siapa-siapa pun, sbab dia-orang takot. |
| 16:9 | Bila dia sudah bangkit pagi-pagi hari yang pertama dalam itu minggo, dia ternampak mula-mula k-pada Mariam orang Magdala, yang dia sudah buangkan tujoh jin deri-pada-nya. |
| 16:10 | Dan dia pergi bilangkan orang-orang yang sudah ada sama-sama Isa, waktu dia-orang ada susah-hati dan mnangis. |
| 16:11 | Ttapi bila dia-orang dngar yang Isa sudah bangkit, dan sudah ternampak sama Mariam, dia-orang pula ta'mau perchaya. |
| 16:12 | Kmudian deri-pada itu, Isa ternampak dngan rupa yang lain pula k-pada dua murid, s-tngah dia-orang berjalan pergi dusun. |
| 16:13 | Dan dia-orang pula pergi bilangkan sama yang lain itu; dan sama dia-orang pun orang-orang itu t'ada perchaya. |
| 16:14 | Dan kmdian lagi, dia ternampak k-pada itu s-blas murid pula, s-tngah dia-orang ada dudok makan; dan dia kalotkan dia-orang sbab dia-orang punya kurang perchaya dan kras hati, kerna dia-orang t'ada perchaya orang yang sudah tengok sama dia kmdian deri-pada kbangkitan-nya. |
| 16:15 | Dan dia kata sama dia-orang, "Pergi-lah kamu sluroh dunia, khabarkan injil k-pada s-gnap kjadian. |
| 16:16 | Orang yang perchaya dan yang di-baptiskan nanti slamat; ttapi orang yang ta'mau perchaya nanti di-hukumkan. |
| 16:17 | Dan ini-lah tanda-tanda yang nanti ikut sama orang yang perchaya: dalam nama sahya dia-orang nanti buangkan jin; dia-orang nanti chakap dngan bhasa yang bharu-bharu; |
| 16:18 | dia-orang nanti pegang ular, dan jikalau dia-orang minum apa-apa yang bawa mati, itu barang t'ada skali-kali nanti buat chlaka sama dia; dia-orang nanti taroh tangan atas orang yang sakit, dan orang sakit itu nanti baik." |
| 16:19 | Jadi bgitu, bila Tuhan Isa sudah habis chakap sama dia-orang, dia tersambot masok shorga, dan dudok di sblah kanan Allah. |
| 16:20 | Dan dia-orang pula pergi kluar khabarkan injil sini-sana, dan Tuhan bkerja sama-sama, dan tgohkan perkata'an itu dngan tanda-tanda yang berikut. Amin. |
Mark 16 - Alkitab Melayu Baba
