15:1 | Bila siang hari, itu juga kpala-kpala imam sama ktua-ktua dngan orang pnulis, dan smoa orang majlis itu, berbichara satu sama lain, dan ikat sama Isa, kmdian bawa pergi srahkan dia k-pada Pilatus. |
15:2 | Pilatus pula tanya sama Isa, "Angkau-kah raja orang Yahudi?" Dan Isa jawab kata sama dia, "Sperti angkau bilang." |
15:3 | Dan kpala-kpala imam d'awa sama dia macham-macham. |
15:4 | Jadi Pilatus lagi satu kali tanya, dan kata sama dia, "T'ada-kah angkau jawab apa-apa? tengok brapa banyak perkara dia-orang d'awa sama angkau." |
15:5 | Ttapi Isa t'ada jawab apa-apa lagi; sampaikan Pilatus naik hairan. |
15:6 | Ktika hari-bsar dia sudah biasa lpaskan kerna orang-banyak satu orang jel, barang-siapa yang dia-orang mintakan sama dia. |
15:7 | Dan itu waktu ada satu orang bernama Bar-Abbas yang ada kna pasong sama-sama orang yang sudah buat huru-hara, ia'itu orang yang sudah bunoh orang dalam itu huru-hara. |
15:8 | Dan orang-banyak pergi mnghadap, dan mula'i minta dia buat sperti dia biasa buat sama dia-orang. |
15:9 | Dan Pilatus jawab, kata sama dia-orang, "Ada-kah kamu mau sahya lpaskan kerna kamu Raja orang Yahudi?" |
15:10 | Kerna dia sudah tahu yang sbab dngki kpala-kpala imam sudah srahkan Isa. |
15:11 | Ttapi kpala-kpala imam usutkan orang-banyak spaya lbeh baik Pilatus lpaskan Bar-Abbas sama dia-orang. |
15:12 | Dan lagi skali Pilatus jawab kata sama dia-orang, "Kalau bgitu, apa-kah sahya msti buat sama dia yang kamu triak 'Raja orang Yahudi?'" |
15:13 | Dan lagi satu kali dia-orang bertriak-triak kata, "Salibkan dia." |
15:14 | Pilatus kata sama dia-orang, "Apa kjahatan pula dia sudah buat?" Ttapi dia-orang bertriak-triak bukan sikit lagi, "Salibkan dia." |
15:15 | Dan Pilatus, sbab dia mau puaskan orang-banyak punya hati, lpaskan Bar-Abbas sama dia-orang, ttapi Isa dia ssahkan, dan srahkan spaya kna salib. |
15:16 | Itu soldado-soldado bawa Isa pergi masok itu balai, ia'itu istana gobernor; dan dia-orang panggilkan s-gnap pasokan itu. |
15:17 | Dan dia-orang pakaikan dia baju werna ungu, dan bila dia-orang sudah anyamkan satu makota deri-pada duri, dia-orang tarohkan atas kpala-nya; |
15:18 | dan dia-orang mula'i kasi tabek sama dia, "Tabek, Raja orang Yahudi." |
15:19 | Dan dia-orang pukol kpala-nya dngan satu bambu, dan ludahkan dia, dan berlutut smbah sama dia. |
15:20 | Bila dia-orang sudah tertawakan dia, dia-orang bukakan itu baju ungu, dan pakaikan pakaian-nya sndiri, dan bawa dia kluar mau salibkan dia. |
15:21 | Ada satu orang yang lalu di situ, ia'itu Simon orang Kurini, yang datang deri dusun, bapa Iskandar sama Rufus, dia ini dia-orang paksakan suroh pikul kayu salib Isa. |
15:22 | Dan dia-orang bawa dia pergi tmpat yang bernama Golgota, yang kalau tersalin arti-nya "Tmpat tngkorak." |
15:23 | Dan dia-orang kasi dia ayer-anggor champur mur, ttapi dia t'ada trima. |
15:24 | Dan dia-orang salibkan dia, dan bhagikan pakaian-nya, dngan buang undi atas-nya apa-kah masing-masing patut dapat. |
15:25 | Itu waktu pukol smbilan pagi, dan dia-orang salibkan dia. |
15:26 | Dan di sblah atas kpala-nya ada tertulis surat d'awa'an-nya, "RAJA ORANG YAHUDI." |
15:27 | Dan sama-sama dia dia-orang salibkan dua-orang pnyamon, satu sblah kanan-nya satu sblah kiri. |
15:28 | [KOSONG] |
15:29 | Dan orang-orang yang lalu di situ umpatkan dia, dan gonchang-gonchang kpala, dan kata, "Wah, angkau yang rubohkan ka'abah, dan naikkan dalam tiga hari, |
15:30 | turun-lah deri itu salib, dan slamatkan angkau punya diri." |
15:31 | Bgini juga kpala-kpala imam tertawakan dia sama sndiri-nya dngan orang-orang pnulis, dan kata, "Lain orang dia sudah slamatkan, ttapi dia sndiri dia ta'rupa slamatkan. |
15:32 | Biar Almaseh, Raja orang Isra'el, skarang turun deri salib, spaya kita boleh tengok dan perchaya." Dan orang-orang yang kna salib sama-sama dia itu pun maki sama dia. |
15:33 | Dan bila pukol dua-blas tngah hari, datang kglapan di sluroh tanah itu, sampai pukol tiga ptang. |
15:34 | Dan pukol tiga ptang, Isa bertriak dngan suara yang bsar, "Ilui, Ilui, lama sabaktani?" yang kalau tersalin arti-nya, "Tuhan-ku, Tuhan-ku, knapa tinggalkan sahya?" |
15:35 | Ada orang yang berdiri di situ bila dia-orang dngar, kata, "Tengok, dia ini ada triak Ilia." |
15:36 | Dan ada satu orang pula lari isikan chuka dalam lumut karang, dan taroh di hujong bambu kasi Isa minum, serta kata, "Diamkan, biar kita tengok kalau Ilia datang turunkan sama dia." |
15:37 | Dan Isa bertriak dngan suara yang bsar, dan putus nyawa. |
15:38 | Dan ka'abah punya tirai blah dua deri atas sampai bawah. |
15:39 | Dan bila hulubalang yang berdiri tntang dia tengokkan dia putus nyawa bgitu, dia kata, "Btul-lah ini orang Anak Allah." |
15:40 | Dan di situ ada prempuan-prempuan pun yang pandang deri jauh: antara ini smoa ada Mariam orang Magdala, Mariam mak si Yakob kchil sama Yosis, dan Salomi; |
15:41 | ini prempuan smoa sudah ikut sama Isa dan layankan dia waktu dia ada di Galil; dan ada banyak lain prempuan lagi, yang sudah pergi Yerusalim sama-sama dia. |
15:42 | Dan bila sudah ptang, sbab itu hari hari-sdiakan, ia'itu hari yang lbeh dhulu hari perhentian, |
15:43 | Yusof orang Arimatiah itu datang, satu orang majlis bichara yang terhormat, dan dia pun ada nantikan kraja'an Allah; dia ini-lah masok mnghadap Pilatus dngan brani-hati, dan minta Isa punya mayat. |
15:44 | Dan Pilatus naik hairan sudah-kah dia mati: dan dia panggil itu hulubalang, dan tanya dia kalau sudah lama-kah dia mati. |
15:45 | Dan bila dia sudah dapat tahu deri-pada itu hulubalang, dia kasikan itu mayat sama Yusof. |
15:46 | Dan Yusof pula bli kain linin, dan bila dia sudah turunkan, dia gulongkan dia dalam itu kain linin, dan tarohkan dalam kubor yang sudah di-pahatkan dalam batu gunong; dan golekkan satu batu di pintu kubor itu. |
15:47 | Dan Mariam orang Magdala sama Mariam mak si Yosis tengok itu tmpat yang dia sudah di-tarohkan. |