14:1 | Lagi dua hari nanti jadi hari-bsar Paska, dan hari-bsar makan roti ta'ragi: dan kpala-kpala imam sama orang pnulis chari jalan bagimana mau tangkap sama Isa dngan tipu-daya, dan bunoh dia: |
14:2 | kerna dia-orang kata, "Jangan tempo hari-bsar, takot nanti jadi gadoh antara bangsa kita." |
14:3 | Tempo Isa ada di Bait-Ani, dalam rumah Simon orang tai-ko, bila dia dudok makan, ada satu prempuan datang sama dia, bawa satu botol berisi minyak wangi yang t'ada champur, dan yang herga bsar punya; dia pchahkan itu botol, dan tuangkan di atas kpala Isa. |
14:4 | Ttapi ada orang yang naik gram dalam diri-nya, dan kata, "Apa buat buangkan minyak bgini? |
14:5 | Kerna ini minyak boleh jual lbeh deri-pada tiga-ratus dinar, dan wang-nya boleh kasi orang miskin." Dan dia-orang bersungut-sungut sama itu prempuan. |
14:6 | Ttapi Isa kata, "Biarkan sama dia; knapa kamu kasi susah sama dia? dia sudah buat satu baik punya kerja atas sahya. |
14:7 | Kerna slalu kamu ada orang miskin sama-sama kamu, dan bila-bila kamu suka kamu boleh buat baik sama dia-orang, ttapi sahya ini t'ada slalu sama kamu. |
14:8 | Ini prempuan sudah buat apa yang dia boleh: dia sudah minyakkan sahya punya badan lbeh-dhulu kerna mau tanam. |
14:9 | Dan dngan sunggoh sahya kata sama kamu, di mana-mana injil nanti di-khabarkan dalam sluroh dunia, apa yang ini prempuan sudah buat nanti di-chakapkan, mnjadi satu peringatan kerna dia." |
14:10 | Kmdian Yudas Iskariot, satu orang deri-pada itu dua-blas murid, pergi sama kpala-kpala imam spaya dia boleh srahkan Isa sama dia-orang. |
14:11 | Dan dia-orang suka-hati, bila dia-orang dngar, dan janji mau kasi wang sama dia. Dan Yudas chari tempo yang baik mau srahkan Isa. |
14:12 | Itu hari yang pertama deri-pada hari-bsar makan roti yang ta'ragi, bila orang smblehkan itu Paska, murid-murid-nya kata sama dia, "Di mana Tuhan mau kita pergi sdiakan spaya Tuhan makan Paska?" |
14:13 | Dan Isa suroh dua murid-nya pergi, dan dia kata sama dia-orang, "Pergi masok negri, dan di sana kamu nanti jumpa satu orang yang angkat satu buyong ayer: |
14:14 | ikut sama dia, dan baik di mana dia masok, kamu kata sama tuan-rumah itu, 'Guru bilang, "Di mana sahya punya bilek tumpangan, tmpat sahya boleh makan Paska sama sahya punya murid-murid?"' |
14:15 | Dan dia sndiri nanti tunjokkan kamu satu bilek loteng yang bsar, siap dan sdia; di situ-lah kamu boleh sdiakan kerna kita." |
14:16 | Dan itu dua murid kluar, dan masok negri, dan jumpa sperti Isa sudah bilang sama dia-orang: dan dia-orang sdiakan Paska. |
14:17 | Bila sudah ptang, Isa datang sama-sama itu dua-blas orang. |
14:18 | Dan waktu dia-orang dudok makan, Isa kata, "Dngan sunggoh sahya kata sama kamu, satu orang antara kamu nanti srahkan sahya, ia'itu orang yang makan satu meja sama sahya." |
14:19 | Dia-orang mula'i mnjadi susah-hati, dan kata sama Isa satu-satu, "Sahya-kah?" |
14:20 | Dia kata sama dia-orang, "Satu orang antara ini dua-blas, ia'itu yang chlop pinggan sama-sama sahya. |
14:21 | Kerna Anak-manusia pergi, sperti ada tersurat fasal dia: ttapi susah-lah itu orang yang srahkan Anak-manusia! lagi baik kerna dia jikalau dia t'ada di-beranakkan." |
14:22 | Dan waktu dia-orang ada makan, Isa ambil roti, minta berkat, dan pchahkan; habis itu dia kasi sama dia-orang, dan kata, "Ambil-lah: ini-lah badan sahya." |
14:23 | Dan dia ambil mangkok, dan mnguchap shukor, dan kasi sama dia-orang, dan dia-orang smoa minum deri mangkok itu. |
14:24 | Dia kata sama dia-orang, "Ini-lah darah sahya, ia'itu darah perjanjian, yang di-churahkan kerna banyak orang. |
14:25 | Dngan sunggoh sahya kata sama kamu, t'ada-lah lagi sahya nanti minum ini ayer buah anggor, sampaikan itu hari bila sahya minum dia bharu dalam kraja'an Allah." |
14:26 | Bila dia-orang smoa sudah nyanyi puji-pujian, dia-orang kluar pergi Bukit Zaitun. |
14:27 | Kmdian Isa kata sama dia-orang, "Kamu sklian nanti terantok: kerna ada tersurat, 'Sahya nanti pukol gombala, dan domba-domba nanti chrai-brai.' |
14:28 | Ttapi bila sahya sudah di-bangkitkan, sahya nanti pergi Galil lbeh dhulu kamu." |
14:29 | Ttapi Petrus kata sama dia, "Jikalau smoa skali pun terantok, sahya ini t'ada." |
14:30 | Dan Isa kata sama dia, "Dngan sunggoh sahya kata sama angkau, ini hari, ya ini malam juga, s-blum ayam berkokok dua kali, angkau nanti sangkalkan sahya tiga kali." |
14:31 | Ttapi lagi-lagi Petrus kata sama dia, "Jikalau sahya msti mati pun sama-sama Tuhan, t'ada juga sahya nanti sangkalkan Tuhan." Bgitu juga smoa-nya kata. |
14:32 | Dan dia-orang sampai dalam satu kbun yang bernama Gatsemani: dan Isa kata sama murid-murid-nya, "Dudok-lah di sini, waktu sahya minta do'a." |
14:33 | Dan Isa bawa sama-sama dia Petrus dan Yakob dan Yahya, dan mula'i mnjadi terchngang dan sangat-lah terkachau. |
14:34 | Dan dia kata sama dia-orang, "Jiwa sahya sangat-lah susah, bagai mau mati bgitu: tunggu-lah di sini, dan berjaga." |
14:35 | Dan dia jalan dpan sikit, dan jatoh di tanah, serta minta do'a spaya, jikalau boleh, biar itu waktu lalu deri-pada dia. |
14:36 | Dia kata, "Ya Abba, Bapa, sama Bapa smoa perkara boleh jadi, lalukan ini chawan deri-pada sahya: dalam pada itu, bukan-nya kahandak sahya, ttapi kahandak Bapa." |
14:37 | Isa datang, dan jumpa dia-orang tertidor, dan kata sama Petrus, "Hei Simon, angkau tidor-kah? angkau t'ada kuasa berjaga satu jam-kah? |
14:38 | Berjaga-lah dan minta do'a, spaya kamu jangan masok dalam pnchoba'an: btul roh itu suka, ttapi badan ada lmah." |
14:39 | Dan lagi skali dia pergi minta do'a, kata itu perkata'an juga. |
14:40 | Dan lagi skali dia datang, dan jumpa dia-orang tertidor, kerna mata dia-orang sudah rasa banyak brat: jadi dia-orang ta'tahu apa-kah mau jawab sama dia. |
14:41 | Dan nombor tiga kali dia datang, dan kata sama dia-orang, "Skarang tidor-lah, dan snangkan kamu punya diri: sudah chukop; waktu-nya pun sudah sampai; tengok, Anak-manusia sudah di-srahkan k-pada tangan orang berdosa. |
14:42 | Bangun, mari-lah kita berjalan; tengok, itu orang yang srahkan sahya sudah dkat." |
14:43 | Dan itu juga, s-tngah Isa ada lagi berchakap, Yudas datang, ia'itu satu deri-pada itu dua-blas orang, dan sama-sama dia ada banyak orang dngan pdang dan tongkat, datang deri-pada kpala-kpala imam dan orang pnulis dan ktua-ktua. |
14:44 | Itu orang yang srahkan Isa sudah kasi satu tanda sama itu orang smoa dan kata, "Barang-siapa yang sahya chium, itu-lah dia: tangkap sama dia, dan bawa pergi baik-baik." |
14:45 | Dan bila Yudas sudah sampai, itu juga dia datang sama Isa, dan kata, "Hei Rabbi," dan chium dia. |
14:46 | Dan dia-orang taroh tangan atas Isa, tangkap sama dia. |
14:47 | Ttapi antara orang yang berdiri di situ ada satu orang chabotkan pdang-nya, dan ttak imam-bsar punya hamba, sampai kratkan kuping-nya. |
14:48 | Dan Isa jawab kata sama dia-orang, "Ada-kah kamu kluar sperti mau tangkap pnyamon, dngan pdang sama tongkat, mau tangkap sahya? |
14:49 | Hari-hari sahya sudah ada sama-sama kamu di dalam ka'abah, dan mngajar, ttapi kamu t'ada tangkap sahya: ttapi ini smoa spaya bnarkan kitab-kitab." |
14:50 | Kmdian smoa murid-murid lari tinggalkan dia. |
14:51 | Ttapi ada juga satu orang muda ikut sama Isa, yang pakai s-lai kain linin saja di badan-nya: dan orang pegang sama dia; |
14:52 | ttapi dia tinggalkan itu kain linin, dan lari dngan tlanjang. |
14:53 | Dan dia-orang bawa Isa pergi k-pada imam-bsar: dan sama-sama dia ada datang smoa kpala-kpala imam sama ktua-ktua dan orang pnulis. |
14:54 | Dan Petrus sudah ikut sama dia deri jauh, sampai masok dalam rumah imam-bsar; dan dia dudok sama-sama mata-mata, dan ada panaskan diri-nya dkat trang api. |
14:55 | Kpala-kpala imam sama sgala orang majlis itu chari saksi mlawan Isa, mau bunoh dia; ttapi ta'boleh dapat. |
14:56 | Kerna banyak juga orang yang naik saksi bohong atas dia, ttapi ksaksian-nya t'ada s-tuju. |
14:57 | Dan ada pula orang yang bangun naik saksi bohong atas dia, serta kata, |
14:58 | "Kita ini dngar dia kata, 'Sahya nanti rubohkan ini ka'abah yang tangan manusia sudah buat, dan dalam tiga hari sahya nanti naikkan satu yang lain, yang bukan tangan manusia buat.'" |
14:59 | Ttapi bgini pun t'ada juga ksaksian-nya s-tuju. |
14:60 | Kmdian imam-bsar berdiri di tngah-tngah, dan tanya sama Isa, kata "T'ada-kah angkau jawab apa-apa? apa ini yang ini orang smoa saksikan atas angkau?" |
14:61 | Ttapi Isa diam saja, t'ada jawab satu patah pun. Lagi skali imam-bsar tanya dia, dan kata, "Ya-kah angkau Almaseh, Anak dia itu yang di-puji?" |
14:62 | Dan Isa kata, "Sahya-lah dia: dan kamu nanti tengok Anak-manusia dudok di sblah kanan kuasa itu, dan datang dngan awan-awan langit." |
14:63 | Itu imam-bsar koyakkan pakaian sndiri, dan kata, "Apa guna sama saksi lagi? |
14:64 | Kamu sudah dngar itu hujatan: apa kamu punya fikir?" Dia-orang smoa jatohkan hukum yang dia patut mati. |
14:65 | Ada orang yang mula'i ludahkan dia dan tutopkan muka-nya, dan tumbok dia, serta kata sama dia, "Nabuat-lah:" dan itu mata-mata pun tampar sama dia bila dia-orang sambot. |
14:66 | Waktu Petrus ada di bawah dalam hlaman imam-bsar, ada satu imam-bsar punya tman prempuan datang; |
14:67 | dan bila dia tengok Petrus panaskan diri-nya, dia mrnong sama dia, dan kata, "Angkau pun sudah ada sama-sama itu orang Nasarat, Isa." |
14:68 | Ttapi Petrus bersangkal, kata, "Sahya ta'tahu, dan t'ada mngerti 'ntah apa-kah angkau ini ada kata:" habis itu dia kluar di srambi, dan ayam pun berkokok. |
14:69 | Itu tman prempuan tengok sama dia, dan lagi skali mula'i kata sama orang-orang yang berdiri di situ, "Dia ini pun s-bhagian sama dia-orang." |
14:70 | Ttapi lagi skali dia bersangkal. Dan lagi s-kjap pula orang-orang yang berdiri dkat situ kata sama Petrus, "Btul skali angkau s-bhagian sama dia-orang smoa; kerna angkau orang Galil." |
14:71 | Ttapi dia mula'i berkutok dan bersumpah, "Sahya ta'knal ini orang yang kamu ada chakap." |
14:72 | Dan itu juga ayam berkokok nombor dua kali. Kmdian Petrus teringat itu perkata'an, bagimana Isa sudah kata sama dia, "S-blum ayam berkokok dua kali, angkau nanti sangkalkan sahya tiga kali." Dan bila dia ingat itu, dia mnangis. |