2:1 | K-pada eklisia yang di Ifisus punya mla'ikat, tulis bgini: Ini-lah smoa yang di-katakan oleh dia itu yang pegang itu tujoh bintang di tangan kanan-nya, yang berjalan di tngah-tngah itu tujoh kaki-plita mas: |
2:2 | sahya tahu angkau punya perbuatan, dan angkau punya pnat dan sabar, dan sahya tahu angkau ta'boleh tahan sama orang yang jahat, dan sudah choba sama orang yang katakan diri-nya rasul-rasul, dan yang bukan-nya rasul, dan sudah dapat tahu dia-orang pmbohong, |
2:3 | dan angkau ada sabar, dan sudah tahan susah deri sbab nama sahya, dan t'ada angkau pnat. |
2:4 | Ttapi sahya ada ini perkara atas angkau, ia'itu angkau sudah tinggalkan angkau punya kaseh yang mula-mula. |
2:5 | Sbab itu, ingat-lah deri mana angkau sudah jatoh, dan bertobat, dan buat-lah mula-mula punya perbuatan; kalau tidak sahya nanti datang k-pada angkau, dan nanti pindahkan angkau punya kaki-plita deri tmpat-nya, jikalau angkau t'ada bertobat. |
2:6 | Ttapi ini satu perkara angkau ada, ia'itu angkau bnchi orang Nikola'i punya perbuatan smoa, yang sahya pun bnchi. |
2:7 | Orang yang ada kuping, biar dia dngar apa Roh bilang sama itu eklisia smoa Orang yang mnang, k-pada dia sahya nanti kasi makan deri pokok hidop yang di dalam Firdus Allah. |
2:8 | Dan pada eklisia yang di Smurnah punya mla'ikat, tulis bgini: Ini-lah smoa yang di-katakan oleh dia itu yang mula-mula dan yang kmdian skali, yang sudah mati, dan hidop s-mula: |
2:9 | sahya tahu angkau punya ksusahan dan angkau punya hal miskin (ttapi kaya juga angkau), dan sahya tahu umpat orang-orang yang katakan diri-nya orang Yahudi, dan yang bukan Yahudi, ttapi Setan punya kumpolan. |
2:10 | Jangan takot itu ksusahan yang angkau nanti kna: ingat, ada orang antara kamu yang iblis nanti masokkan dalam jel, spaya kamu kna choba; dan kamu nanti mrasa s-puloh hari punya ksusahan. Jadi-lah angkau stiawan sampai mati, dan sahya nanti kasi angkau hidop punya makota. |
2:11 | Orang yang ada kuping, biar dia dngar apa Roh bilang sama itu eklisia smoa. Orang yang mnang skali-kali t'ada nanti kna chlaka oleh nombor dua kali punya kmatian. |
2:12 | Dan k-pada eklisia yang di Pergamun punya mla'ikat, tulis bgini; Ini-lah smoa yang di-katakan oleh dia itu yang ada itu pdang tajam yang mata dua: |
2:13 | sahya tahu di mana angkau ada tinggal, ia'itu di tmpat di mana ada Setan punya takhta: dan angkau sudah pegang sahya punya nama, dan t'ada sangkalkan sahya punya iman, tempo Antipas skali pun, ia'itu sahya punya saksi yang kperchaya'an yang sudah kna bunoh di antara kamu, di mana Setan ada tinggal. |
2:14 | Ttapi sahya ada sikit perkara atas angkau, sbab di situ angkau ada orang yang pegang pngajaran Bil'am, yang sudah ajarkan Balak kasi satu batu terantok k-pada anak-anak Isra'el, ia'itu makan lauk-datok dan buat perchabolan. |
2:15 | Bgitu juga ada orang antara kamu yang pegang pngajaran orang Nikola'i pun sama juga. |
2:16 | Sbab itu, bertobat-lah; kalau tidak, sahya nanti datang k-pada angkau dngan sgra, dan sahya nanti berprang sama itu orang smoa dngan sahya punya mulut punya pdang. |
2:17 | Orang yang ada kuping, biar dia dngar apa Roh bilang k-pada itu eklisia smoa. Orang yang mnang, k-pada dia sahya nanti kasi manna yang tersmbunyi itu, dan sahya nanti kasi dia satu batu lichin yang puteh, dan atas itu batu ada tertulis satu nama bharu, yang satu orang pun ta'tahu chuma orang yang trima. |
2:18 | Dan k-pada eklisia yang di Tuatirah punya mla'ikat, tulis bgini; Ini-lah smoa yang di-katakan oleh Anak Allah, yang mata-nya sperti satu nyala api, dan kaki-nya sperti tmbaga yang sudah di-kilatkan: |
2:19 | sahya tahu angkau punya perbuatan, dan angkau punya kaseh dan perchaya dan playanan dan sabar, dan sahya tahu angkau punya perbuatan yang kmdian ada lbeh deri-pada yang mula-mula punya. |
2:20 | Ttapi sahya ada ini satu perkara atas angkau, ia'itu angkau ada biarkan itu prempuan Izibil yang katakan diri-nya satu nabi; dan dia ajarkan dan ssatkan sahya punya hamba-hamba, sampaikan dia-orang buat perchabolan dan makan lauk-datok. |
2:21 | Dan sahya sudah kasi dia tempo spaya boleh bertobat; ttapi ta'mau juga dia bertobat deri-pada dia punya persundalan. |
2:22 | Ingat, sahya nanti kasi dia baring atas tmpat-tidor, dan itu orang smoa yang buat zina sama dia sahya nanti kasi kna ksusahan yang bsar, jikalau dia-orang t'ada bertobat deri-pada itu prempuan punya perbuatan. |
2:23 | Dan smoa anak-anak-nya sahya nanti kasi mati; dan smoa eklisia nanti dapat tahu yang sahya-lah yang preksa orang punya jiwa dan hati: dan sama masing-masing kamu sahya nanti kasi sperti kamu punya perbuatan. |
2:24 | Ttapi sahya bilang sama kamu, ia'itu sama orang yang lain di Tuatirah, s-brapa banyak kamu yang t'ada pegang itu pngajaran, dan yang t'ada knal perkara Setan yang dalam-dalam itu (sperti orang kata); sahya t'ada ltakkan atas kamu lain apa-apa punya pikulan. |
2:25 | Ttapi apa yang kamu ada, pegang-lah sampai sahya datang. |
2:26 | Dan orang yang mnang, dan orang yang simpan sahya punya perbuatan sampai ksudahan, sama dia-lah sahya nanti kasi kuasa atas smoa bangsa-asing; |
2:27 | dan dia nanti prentahkan dia-orang dngan tongkat bsi, sperti priok blanga kna orang rmokkan; bgitu-lah sahya pun sudah trima deri-pada sahya punya Bapa: |
2:28 | dan sahya nanti kasi sama dia bintang pagi. |
2:29 | Orang yang ada kuping, biar dia dngar apa Roh bilang k-pada itu eklisia smoa. |