16:1 | Dan sahya dngar satu suara yang bsar kluar deri tmpat kudus, yang kata sama itu tujoh mla'ikat, "Pergi-lah, tumpahkan itu tujoh mangkok marah Allah di bumi." |
16:2 | Dan yang pertama pergi tumpahkan dia punya mangkok di bumi; dan itu jadi satu pkong yang susah dan jahat atas orang-orang yang ada itu binatang punya chap, dan yang smbah dia punya patong. |
16:3 | Dan yang nombor dua tumpahkan dia punya mangkok di laut; dan itu jadi darah sperti orang mati punya; dan tiap-tiap nyawa yang hidop itu mati-lah, ia'itu smoa yang ada di laut. |
16:4 | Dan yang nombor tiga tumpahkan dia punya mangkok dalam sungai-sungai dan sgala mata-ayer; dan itu jadi darah. |
16:5 | Dan sahya dngar itu ayer punya mla'ikat kata, "Ya Tuhan, yang ada, dan yang sudah ada, dan yang kudus, bnar-lah Tuhan, sbab Tuhan sudah putuskan hukum yang bgini: |
16:6 | kerna itu orang smoa sudah sumpahkan orang-orang kudus dan nabi-nabi punya darah, dan darah-lah yang Tuhan sudah kasi dia-orang minum: dan patut dia-orang bgini. |
16:7 | Dan sahya dngar itu tmpat-persmbahan kata, "Ya Allah, Tuhan yang maha kuasa, btul dan bnar-lah Tuhan punya hukuman smoa." |
16:8 | Dan yang nombor ampat tumpahkan dia punya mangkok di atas matahari; dan itu di-bri kuasa hanguskan manusia dngan api. |
16:9 | Dan manusia kna hangus dngan hangat yang bsar: dan dia-orang hujatkan nama Allah, yang ada kuasa atas ini chlaka smoa; dan dia-orang t'ada juga bertobat mau kasi hormat sama dia. |
16:10 | Dan yang nombor lima tumpahkan dia punya mangkok atas itu binatang punya takhta; dan dia punya kraja'an mnjadi glap; dan orang gigit-gigit masing-masing punya lidah sbab sakit, |
16:11 | dan hujatkan Allah yang di shorga deri sbab sakit dan pkong-nya; dan dia-orang t'ada juga bertobat deri-pada perbuatan-nya. |
16:12 | Dan yang nombor anam tumpahkan dia punya mangkok atas itu sungai bsar, ia'itu sungai Frat; dan ayer-nya jadi kring, spaya boleh sdia satu jalan kerna raja-raja yang datang deri sblah matahari hidop. |
16:13 | Dan sahya tengok tiga jin yang najis, rupa-nya sperti kodok, terkluar deri mulut naga, dan deri mulut binatang itu dan deri mulut nabi bohong itu: |
16:14 | kerna itu smoa jadi jin setan, yang buat tanda-tanda; dan yang pergi k-pada s-gnap dunia punya raja-raja, mau himponkan dia-orang kerna pprangan, waktu Allah yang maha kuasa punya hari yang bsar itu. |
16:15 | (Ingat-lah sahya ada datang sperti pnchuri. Berkat-lah orang yang berjaga dan simpankan dia punya pakaian, spaya jangan dia berjalan dngan tlanjang, dan jangan orang tengok dia punya malu.) |
16:16 | Dan itu tiga jin himponkan itu raja-raja di tmpat yang bernama dalam bhasa Ibrani Har-Magaddun. |
16:17 | Dan yang nombor tujoh tumpahkan dia punya mangkok di udara; dan satu suara yang bsar terkluar deri dalam tmpat kudus deri itu takhta, yang kata, "Sudah habis:" |
16:18 | dan datang-lah kilat dan suara-suara dan guntor; dan jadi satu gmpa bumi yang bsar skali, yang t'ada sama-nya s-lama ada manusia di atas bumi, bgitu bsar punya gmpa bumi dan bgitu kuat. |
16:19 | Dan itu negri yang bsar terblah tiga, dan sgala bangsa-asing punya negri-negri ruboh: dan Babil yang bsar itu t'ada di-lupakan di dpan Allah, mau kasi sama dia chawan ayer-anggor, ia'itu marah-nya yang panas itu. |
16:20 | Dan smoa pulau lnnyap, dan gunong-gunong pun ta'boleh terdapat lagi. |
16:21 | Dan hujan batu bsar, yang satu tlanta punya brat, turun deri langit timpa manusia: dan manusia mnghujat sama Allah deri sbab itu chlaka hujan batu; kerna sangat-lah bsar itu chlaka. |