| 14:1 | Dan sahya tengok, dan ada itu Anak-domba berdiri di gunong Sion, dan sama-sama dia ada s-ratus ampat-puloh-ampat ribu orang yang ada nama Anak-domba dan nama Bapa-nya tertulis di dahi-nya. |
| 14:2 | Dan sahya dngar satu suara deri langit, sperti bunyi ayer banyak, dan sperti bunyi satu guntor yang bsar: dan itu suara yang sahya sudah dngar ada sperti bunyi orang berkchapi yang ada main kchapi-nya: |
| 14:3 | dan dia-orang mnyanyi satu nyanyian sperti bharu rasa-nya di dpan itu takhta, dan dpan itu ampat hidop-hidopan dan sgala ktua-ktua: dan satu orang pun ta'boleh blajar itu nyanyian, chuma itu s-ratus ampat-puloh-ampat ribu orang, yang sudah di-tbuskan deri bumi. |
| 14:4 | Ini-lah orang-orang yang t'ada najiskan diri-nya dngan prempuan; kerna smoa-nya anak-dara. Ini-lah smoa yang ikut itu Anak-domba di mana-mana dia pergi. Smoa-nya sudah di-bli deri antara manusia, mnjadi buah-bungaran k-pada Allah dan k-pada Anak-domba. |
| 14:5 | Dan dalam dia-orang punya mulut t'ada dapat apa-apa bohong: dia-orang t'ada berchla. |
| 14:6 | Dan sahya tengok lagi satu mla'ikat terbang di tngah langit, yang ada injil yang kkal, mau khabarkan k-pada sgala orang yang tinggal di bumi, dan k-pada tiap-tiap bangsa dan suku dan bhasa dan kaum; |
| 14:7 | dan dngan suara yang bsar dia kata, "Takot-lah sama Allah, dan kasi hormat sama dia; kerna waktu hukuman-nya sudah sampai: dan smbah-lah sama dia yang sudah jadikan langit dan bumi dan lautan dan sgala mata-ayer. |
| 14:8 | Dan ada lagi satu, ia'itu mla'ikat yang nombor dua, ikut dia dan kata, "Sudah ruboh-lah, sudah ruboh-lah, Babil yang bsar itu, yang sudah kasi sgala bangsa punya orang minum deri-pada itu ayer-anggor, ia'itu marah yang datang sbab dia punya perchabolan. |
| 14:9 | Dan ada lagi satu mla'ikat, ia'itu nombor tiga, ikut itu dua, dan kata dngan suara yang bsar, "Jikalau satu orang smbah itu binatang sama dia punya patong, dan trima dia punya chap di dahi-nya, atau di tangan-nya, |
| 14:10 | dia pun nanti minum deri-pada itu ayer-anggor, ia'itu Allah punya marah, yang sudah di-sdiakan dngan t'ada champur dalam chawan marah-nya: dan dia nanti kna sngsara dngan api dan blerang di dpan sgala mla'ikat yang kudus, dan di dpan Anak-domba: |
| 14:11 | dan dia-orang punya sngsara punya asap naik sampai s-lama-lama-nya; dan dia-orang t'ada perhentian siang-malam, ia'itu orang-orang yang smbah itu binatang dan patong-nya, dan siapa-siapa yang trima nama-nya punya chap. |
| 14:12 | Di sini-lah orang-orang kudus punya sabar, ia'itu yang simpan Allah punya hukum-hukum, dan Isa punya iman. |
| 14:13 | Dan sahya dngar satu suara deri langit yang kata, "Tulis, 'Berkat-lah sgala orang mati yang mati dalam Tuhan deri-pada ini waktu:' 'Ya,' kata Roh, 'spaya dia-orang boleh brenti deri pnat-nya; kerna dia-orang punya perbuatan smoa ikut sama-sama dia-orang.'" |
| 14:14 | Dan sahya tengok, ada satu awan puteh; dan di atas itu awan ada dudok satu orang yang sperti Anak-manusia, yang pakai makota mas di kpala-nya, dan pegang satu sabit yang tajam di tangan-nya. |
| 14:15 | Dan lagi satu mla'ikat kluar deri itu ka'abah, dan bertriak dngan suara yang bsar k-pada dia yang dudok di atas awan, "Kluarkan-lah angkau punya sabit itu, dan mnyabit: kerna musim mnuai sudah sampai; sbab bumi punya tuaian sudah chukop masak." |
| 14:16 | Dan dia yang dudok di atas awan itu pakai-lah dia punya sabit di bumi; dan bumi sudah di-tuai. |
| 14:17 | Dan lagi satu mla'ikat kluar deri dalam tmpat kudus yang di shorga, dan dia pun ada satu sabit yang tajam. |
| 14:18 | Dan lagi satu mla'ikat kluar deri tmpat korban, dia yang ada kuasa atas api; dan dia bertriak dngan suara yang bsar k-pada dia yang ada sabit tajam itu, dan kata, "Kluarkan-lah angkau punya sabit itu, dan kumpolkan sgala tangkai anggor di dunia, kerna buah-nya sudah masak. |
| 14:19 | Dan itu mla'ikat pakai-lah dia punya sabit di dunia, dan kumpolkan dunia punya buah anggor, dan champakkan dalam irekan yang bsar, ia'itu Allah punya marah. |
| 14:20 | Dan orang irek itu irekan di luar negri, dan terkluar darah deri itu irekan, s-tinggi kuda punya tali kang, dan s-jauh dua-ratus batu. |
Wahyu 14 - Alkitab Melayu Baba
